ភ្នំពេញ ៖ បុរសមួយក្រុមបានជួបជុំគ្នាផឹកស៊ីទាំងព្រឹក លុះមួយសន្ទុះក្រោយមក ក៏លាន់ឮសំឡេងផ្ទុះអាវុធ១គ្រាប់ ជាហេតុធ្វើឱ្យក្រុមអ្នករត់ម៉ូតូឌុបក្បែរនោះ ភ័យឆោឡោ រាយការណ៍ប្រាប់សមត្ថកិច្ចចុះជួយអន្តរាគមន៍ បង្កឱ្យមានការភ្ញាក់ផ្អើលឡើង កាលវេលាម៉ោង៩និង៣០នាទីព្រឹក ថ្ងៃទី០៣ ខែមករា ឆ្នាំ២០១៨ នៅចំណុចតាមបណ្តោយផ្លូវសុធារស ក្រុម៤៧ ស្ថិតក្នុងភូមិ៩ សង្កាត់ទន្លេបាសាក់ ខណ្ឌចំការមន។
តាមប្រភពព័ត៌មានពីក្រុមអ្នករត់ម៉ូតូឌុប ដែលកំពុងចតចាំម៉ូយក្បែរម្តុំកន្លែងកើតហេតុ បានរៀបរាប់ប្រាប់ទាំងមិនហ៊ានបញ្ចោញឈ្មោះថា នៅមុនពេលកើតហេតុ គេឃើញបុរសមួយក្រុមបានជុំគ្នាផឹកស៊ីនៅក្នុងផ្ទះ ដោយក្នុងនោះ បានចតរថយន្តមួយគ្រឿង ម៉ាកហាយឡែនឌ័រ ពណ៌ស ពាក់ស្លាកលេខនគរបាល ២-០៦៥២ តែបានយកថង់ពណ៌ខ្មៅបិទស្លាកលេខយ៉ាងជិតឈឹងទៅវិញ។ លុះមួយសន្ទុះធំក្រោយមក ស្រាប់តែគាត់បានលាន់ឮសំឡេងផ្ទុះអាវុធ១គ្រាប់ តែមិនដឹងថាចេញពីផ្ទះមួយណាឱ្យប្រាកដនោះទេ ហើយក៏មិនប្រាកដថា ក្រុមអ្នកផឹកស៊ីនោះផ្ទុះអាវុធដែរ ព្រោះមិនបានឃើញផ្ទាល់ភ្នែក គ្រាន់តែឮសូរប៉ុណ្ណោះ។
តាមប្រភពពីសមត្ថកិច្ចមូលដ្ឋាន បានបញ្ជាក់ប្រាប់ថា ក្រោយពីទទួលបានសេចក្តីរាយការណ៍ពីប្រជាពលរដ្ឋមកថា មានករណីផ្ទុះអាវុធបាញ់ឡើងលើមេឃចំនួន១គ្រាប់ សមត្ថកិច្ចបានដឹកនាំកម្លាំងចុះទៅដល់កន្លែងកើតហេតុ។ លុះពេលទៅដល់សួរនាំអ្នកជិតខាង ដែលប្រកបរបររកស៊ីក្បែរនោះ មិនមានអ្នកណាដឹងទេ តែឃើញរថយន្តម៉ាកហាយឡែនឌ័រ ពណ៌ស ពាក់ស្លាកលេខនគរបាល យកថង់ខ្មៅបិតស្លាកលេខរថយន្ត ហើយចតនៅមុខផ្ទះលេខT៩៥ និងមានបុរស៣នាក់កំពុងផឹកស៊ីក្នុងផ្ទះ។
ប្រភពដដែលបន្តថា បន្ទាប់មកសមត្ថកិច្ចក៏បានចូលទៅធ្វើការសាកសួរ តែមិនដឹងថា បុរសទាំង៣នាក់នៅអង្គភាពខាងណាទេ តែពេ លសមត្ថកិច្ចយើងសួរនាំ បុរសទាំង៣នាក់នោះ បានឆ្លើយថា ខ្លួនជានគរបាលលពិតមែន តែមិនបានផ្ទុះអាវុធទេ គឺផឹកស៊ីជាមួយមិត្តភក្តិ មិនបានដឹងរឿងអ្វីទេ រហូតដល់ពេលសមត្ថកិច្ចមកសាកសួរ ទើបមានការភ្ញាក់ផ្អើលបែបនេះតែម្តង។
ក្រោយពីសាកសួរនាំបុរសទាំង៣នាក់នោះហើយ និងដោយសារតែរកមិនឃើញសំបកគ្រាប់ ម៉្យាងមិនមានសាក្សីណាម្នាក់ ចេញមុខអះអាង និងចង្អុលមុខចំៗថា អ្នកណាម្នាក់ជាអ្នកផ្ទុះអាវុធ ទើបកម្លាំងសមត្ថកិច្ចបានដកចេញមកវិញ និងមិនបានឃាត់ខ្លួនអ្នកណាម្នាក់នោះទេ៕
