សុខ ពិសី គេចទ្រុងស្នេហ៍

សុខ ពិសី ដែលគេចាត់ទុកថា ជាស្រីស្អាតម្នាក់ក្នុងចង្កោមអ្នកចម្រៀងនោះ តែងតែទៅដល់ទីណាមានការចាប់អារម្មណ៍ពី​អ្នកនៅជុំវិញខ្លួនជានិច្ច ពិសេស គឺប្រុសៗតែម្តង ដែលគ្រឺតក្នាញ់​សម្រស់សាច់សខ្ចីតារារូបនេះ ដោយប្រាថ្នាចង់ប៉ះអង្អែលថ្នមបី តែគួរឱ្យស្តាយ ព្រោះថ្មីៗនេះ ព័ត៌មានជាច្រើនបានផ្សព្វផ្សាយថា តារាចម្រៀងស្រីក្នុងស្រទាប់យុវវ័យរូបនេះ ស្និទ្ធស្នេហ៍ថៅកែផលិតកម្មសាន់ដេ លោកឡាយ សុខចំរើន បើទោះជាអ្នកទាំង២ មិនដែលទទួលស្គាល់ថា ជាការពិតក៏ដោយ។

ជាក់ស្តែងនៅពេលដែលសុខ ពិសី លេចមុខក្នុងការបង្ហាញខ្លួនកម្មវីធីមង្គលការប្អូនស្រីអ្នកនាងចន ច័ន្ទលក្ខិណា កាលពីពេលថ្មីៗនេះ នាងត្រូវបានគេចោមព័ទ្ធជុំជិតសុំថតរូប ហើយរូបសម្រស់ពិសី ពិតជាធ្វើឱ្យអ្នកជំនួញល្បីៗ និងលោកឧកញ៉ាជាច្រើននោះ មានការជ្រួលជ្រើមខ្លាំង ខណៈដែលតារាចម្រៀងរូបនេះមិនបានបណ្តើរលោកថៅកែផលិតកម្មទៅ ដូចលើកមុនៗឡើយ។

ប្រភពបានឱ្យដឹងថា សឹងគ្រប់កម្មវិធីដែលសុខ ពិសី ទៅចូលរួមបង្ហាញខ្លួននោះ អ្នកចម្រៀងរូបនេះ គឺគេចមិនផុតពីការតាមស្នេហ៍ពីប្រុសៗអ្នកមានឡើយ ហើយនោះមិនមែនជារឿងចម្លែកឡើយ សម្រាប់ពិសី គឺបានកើតឡើង រយៈពេលជាច្រើនឆ្នាំមកហើយ ប្រសិនបើតារារូបនេះចង់បានទ្រព្យជាធំនោះ ម៉្លេះពេលនេះ នាងធ្លាក់ក្នុងទ្រុងស្នេហ៍ប្រុសៗទាំងនោះ ហើយមិនអាចដើរហើរដោយពេញលេញ ដូចពេលនេះបានឡើយ។

ព័ត៌មានបានឱ្យដឹងថា មានប្រុសៗអ្នកមានខ្លះបានសុំស្នេហ៍តារារូបនេះ ដោយផ្ទាល់ និងខ្លះទៀតចង់ចូលស្តីដណ្តឹងទៀតផង បើទោះជាកន្លងមក ពិសី ធ្លាប់លេចឮថា នាងជាសង្សារលោកឡាយ សុខចំរើន ក្តី តែក្រុមប្រុសៗដែលចាយលុយមិនអស់ទាំងនោះ នៅតែតាមស្នេហ៍តារាចម្រៀងរូបស្រស់នេះដដែល ទើបធ្វើឱ្យលេចឮថា មានពេលខ្លះ នាងមិនចង់ហ៊ានដើរទៅណាម្នាក់ឯងឡើយ ព្រោះខ្លាចមានគេតាមឆ្មក់ស្នេហ៍កណ្តាលផ្លូវ។

សុខ ពិសី ក្លាយជាតារាចម្រៀងស្រីឈានមុខគេរបស់ផលិតកម្មសាន់ដេ នារយៈពេលចុងក្រោយនេះ បើទោះជាអ៊ីវ៉ា ហក់ឡើងលឿនក្តី តែទាំងបទចម្រៀង និងភាពយន្ត គឺពិសី នៅតែជាតួឯករបស់ផលិតកម្មនេះដដែល ទើបធ្វើឱ្យមិនស្ងប់សោះ រឿងដែលគេថា ពិសី ជាសង្សារថៅកែក្មេងផលិតកម្មសាន់ដេ នោះ ព្រោះសាន់ដេ ក្រៅពីយកចិត្តទុកដាក់លើពិសី ជាងគេនោះ មានពេលខ្លះ តារាចម្រៀងរូបនេះបានជិះ​រថយន្តទំនើបម៉ាក Audi របស់លោកសេង ដូចក្រុមគ្រួសារតែមួយទៀតផង ខណៈដែលថៅកែសាន់ដេ ក៏គេធ្លាប់បានឃើញជិះរថយន្ត Range Rover របស់សុខ ពិសី ដូចគ្នាដែរ។

អ្នកសិល្បៈដែលស្និទ្ធសុខ ពិសី បានឱ្យដឹងថា ការលេចឮថា ពិសី ជាគូស្នេហ៍លោកសេង នោះ អាចធ្វើឱ្យតារារូបនេះ មានសុវត្ថិភាពច្រើនជាងមុន ពីការតាមស្នេហ៍ពីប្រុសៗអ្នកមានទ្រព្យ និងមានអំណាចទាំងនោះ គឺដូចគ្នានឹងការលេចឮថា ឱក សុគន្ធកញ្ញា បង្កាត់ភ្លើងស្នេហាជាមួយប្អូនថៅកែផលិតកម្មរស្មីហង្សមាស លោកអ៊ឹង សុខលី ដែរ។

សុខ ពិសី នៅឆ្នាំ២០១៨នេះ នាងហាក់បាត់ដៃឆ្វេងម្ខាង នៅពេលដែលដៃគូចម្រៀង និង​សម្តែងលោកខេមរៈ សិរីមន្ត បានទៅចូលហង្សមាស ហើយចាប់ដៃគូជាមួយឱក សុគន្ធកញ្ញា ម្តងនោះ ស្របពេលដែលពិសី ងាកទៅប្តូរដៃគូថ្មីជាមួយលោកឆាយ វីរៈយុទ្ធ, ខាន់ ជេមស៍ និងនាយចឺម វិញម្តង ហើយនៅដើមឆ្នាំ២០១៨នេះ ភាពយន្តដែលនាងចាប់ដៃជាមួយលោកឆាយ វីរៈយុទ្ធ ជាតួឯករឿង “អាឡេវចូលក្រុង” នោះ នឹងត្រូវដាក់បញ្ចាំងហើយ ដែលទស្សនិកជនជាច្រើនបានរង់ចាំមើលថា តើការដែលពិសី ប្តូរដៃគូពីការចាប់ដៃលោកសិរីមន្ត មកលោកឆោម នោះ មួយណានឹងទទួលបានការគាំទ្រច្រើនជាងគេទៅ?

ប្រភពបានឱ្យដឹងថា លោកថៅកែសាន់ដេ នឹងនៅតែបន្តឱ្យពិសី ធ្វើជាតួឯកស្រីសម្រាប់ភាពយន្តរបស់លោក នាពេលបន្តបន្ទាប់ទៀត បើទោះជាមានតារារួមក្រុមមួយចំនួនហាក់ច្រណែន ហើយនាំគ្នាខ្សឹបខ្សៀវគ្នាថា ពិសី ត្រូវថៅកែថ្នាក់ថ្នមចិត្តជាងគេក្តី ហើយមានតារាខ្លះថែមទាំងហ៊ានថា សម្រាប់ការថត MV បទចម្រៀងរបស់ពិសី គឺថៅកែមានការចំណាយច្រើនជាងតារាផ្សេងៗទៀត​ក៏ដោយ។

អ្នកសិល្បៈជាច្រើនបានសម្តែងការសរសើរ និងរិះគន់សុខ ពិសី ព្រមគ្នាតែម្តង ដោយតារាខ្លះថា ពិសី ចង់ល្បី និងមានខ្នងបង្អែក សុខចិត្តសាងស្នេហ៍ជាមួយថៅកែផលិតកម្ម។ ប៉ុន្តែ អ្នកខ្លះទៀតថា បើសិនជាពិសី ចង់រស់នៅលើគំនរទ្រព្យ ដោយមិនបាច់ច្រៀង នាំតែហត់នោះ គឺនាងនឹងមានអ្វីៗគ្រប់យ៉ាងទៅហើយ តែពិសី ប្រកាន់ជំហរមិនស្នេហ៍ដាច់ខាត បើប្រុសណាមិននៅទំនេរ ព្រោះខ្លាចជាប់ទ្រុងស្នេហ៍ ហេតុនេះហើយ បានជានាងត្រូវការបុរសម្នាក់ដែលស្នេហ៍នាងស្មោះ ហើយបើសិនជានាងពិតជាមានទំនាក់ទំនងស្នេហ៍ជាមួយលោកសេង ថៅកែផលិតកម្មសាន់ដេ មែន រឿងអីដែលថាមិនអាចទៅរួច ព្រោះអ្នកទាំង២ មិនទាន់ឆ្លងកាត់ជីវិតអាពាហ៍ពិពាហ៍ដូចគ្នា តែពិសី មិនដែលសារភាពរឿងស្នេហ៍ដ៏រសើបនេះឡើយ។

គេថាស្រីស្អាតដូចសុខ ពិសី មានជម្រើសស្នេហ៍ច្រើនណាស់ ហើយនៅពេលនេះ កូនប្រុសលោកឧកញ៉ាមហាសេដ្ឋីម្នាក់ ដែលជាថៅកែសាំង និងសណ្ឋាគារនៅស្រុកខ្មែរ នោះ នៅតែរង់ចាំត្រងស្នេហ៍តារាចម្រៀងសុខ ពិសី នៅឡើយ…៕