ភ្នំពេញ៖ យុវជនម្នាក់ ចូលដកលុយពីទូATM ដើរចេញមកវិញ បម្រុងឡើងជិះម៉ូតូ ត្រូវជនប្រដាប់អាវុធបាញ់៣គ្រាប់ ដេកដួលក្នុងថ្លុកឈាមប្លន់យកលុយនិងម៉ូតូទៅបាត់ដោយសុវត្ថិភាព បង្កឲ្យ មានការភ្ញាក់ផ្អើលកាលពីវេលាម៉ៅង១និង៣០នាទីរំលងអាធ្រាតឈានចូលថ្ងៃទី១០ ខែសីហា មុខទូATM របស់ធនាគារឥណ្ឌូឆាយណា ស្ថិតនៅមុខហាងកាហ្វេដេលី តាមបណ្តោយផ្លូវព្រះសីហនុ កែងនឹងផ្លូវលេខ១១៣ ស្ថិតក្នុងសង្កាត់បឹងកេងកងទី២ ខណ្ឌចំការមន ។
ប្រភពពត៌មានជុំវិញកន្លែងកើតហេតុបានឱ្យដឹងថា នៅមុនពេលកើតហេតុគេបានឃើញយុវជនម្នាក់ជិះម៉ូតូម៉ាកហុងដាឌ្រីម សេរីឆ្នាំ២០១៦ ពណ៌ខ្មៅ មិនចាំស្លាកលេខ បានជិះមកឈប់ម៉ូតូនៅមុខកន្លែងដកលុយទូ ATM របស់ធនាគារឥណ្ឌូឆាយណា ស្ថិតនៅមុខហាងកាហ្វេដេលី រួចហើយជនរងគ្រោះបានដើរចូលទៅដកលុយពីទូ ATM បានហើយដើរចេញមកវិញបានប្រមាណ៦ម៉ែត្រឡើងអង្គុយលើម៉ូតូបម្រុងជិះចេញទៅហើយស្រាប់តែមានជនសង្ស័យ២នាក់ជិះម៉ូតូហុងដាឌ្រីម ស៊េរី២០១៦ ពណ៌ខ្មៅ មិនចាំស្លាកលេខ បានជិះមកដល់ វាយទៅលើជនរងគ្រោះដើម្បីប្លន់យកម៉ូតូនិងយកលុយដែលទើបនឹងដកពីទូATM តែជន រងគ្រោះមិនព្រមឲ្យតាមសម្រួលទេបានប្រតាយប្រតប់ជាមួយជនសង្ស័យហើយស្រែកថា ចោរៗទើបជនសង្ស័យដកកាំភ្លើងខ្លីមួយដើមបាញ់សំដៅជនរងគ្រោះចំនួន៣គ្រាប់ តែមួយ គ្រាប់ដំបូងអត់ផ្ទះ បានបាញ់២គ្រាប់ទៀតបណ្តាលឲ្យរបួសចំស្មាមួយគ្រាប់ និងភ្លៅមួយហូរ ឈាមពេញខ្លួនដេកដួលក្នុងថ្លុកឈាមនៅនឹងកន្លែងកើតហេតុ ។
សាក្សីនៅកន្លែងកើតហេតុបានឲ្យដឹងទៀតថា ពេលដែលជនរងគ្រោះប្រតាយប្រតប់ជាមួយជនសង្ស័យហើយស្រែកថាចោរៗ អ្នកឃើញហេតុការណ៍បម្រុងរត់ទៅជួយដែរ តែ ឃើញជនសង្ស័យដកកាំភ្លើងបាញ់សំដៅជនរងគ្រោះម្នាក់ៗលែងហ៊ានចូលទៅជួយ ទាល់ តែជនសង្ស័យប្លន់យកម៉ូតូនិងលុយទៅបាត់អស់ ទើបនាំគ្នាចូលទៅមើលជនរងគ្រោះដែល ដេកដួលក្នុងថ្លុកឈាមសន្លប់ស្តូកស្តឹង ។
ក្រោយពេលកើតហេតុសមត្ថកិច្ចមូលដ្ឋានបានចុះមកដល់កន្លែងកើតហេតុ និងបានត្រឹមមកឈរមើលជនរងគ្រោះដេកដួលក្នុងធ្លុកឈាមនៅនឹងកន្លែងកើតហេតុតែប៉ុណ្ណោះ ។ ចំណែកជនរគ្រោះត្រូវរថយន្តសាមុយដឹកយកទៅសង្គ្រោះនៅមន្ទីរពេទ្យកាល់ម៉ែត ។ នៅកន្លែងកើតហតុសម្ថកិច្ចបានរកឃើញសំបកកន្ទុះចំនួន២គ្រាប់ផងដែរ៕
ប៊ុន ស៊ុន្ធី