បន្ទាប់ពីទទួលបានការគាំទ្រតាមរយៈបទ«ក្រចេះស្នេហ៍បង»តារាចម្រៀងជើងថ្មីរបស់ផលិតកម្មសាន់ដេ លោកជ័យ សុវ៉ាត ទើបតែចេញបទថ្មីមួយទៀតមានចំណងជើងថា«សង្សារឡបល់យ៎អី»ជាមួយទឹកដមសំឡេងក្រអួនក្រអៅហើយកំពុងទាក់ចិត្តយុវវ័យនៅតាមបណ្ដាញសង្គមយូធូបនិងហ្វេសប៊ុកខណៈដែលលោករំពឹងថា បទនេះនឹងទាញបានប្រជាប្រិយភាពមួយកម្រិតថែមទៀតពេលចេញMVក្នុងពេលឆាប់ៗ។
តារាចម្រៀងវ័យក្មេងលោក ជ័យ សុវ៉ាត កំពុងត្រូវបានផលិតកម្មសាន់ដេ ជួយជ្រោមជ្រែងលើកស្ទួយជាខ្លាំងដោយបានសម្រិតសម្រាំងទាំងបទមនោសញ្ចេតនានិងបទញាក់កន្ទ្រាក់អារម្មណ៍ដើម្បីវាយលុកលើទីផ្សារ។ជាក់ស្ដែងក្រោយពេលទាញបានសំឡេងគាំទ្រតាមរយៈបទ«ក្រចេះស្នេហ៍បង»លោកទើបចេញបទថ្មីប្លែកមួយទៀតដែលជាស្នាដៃថ្មីរបស់ផលិតកម្មសាន់ដេ។
បទចម្រៀង«សង្សារ ឡបល់យ៎អី»ដែលជាការបកស្រាយរបស់លោកក៏ទទួលបាននូវការចាប់អារម្មណ៍ខ្លាំងក្លាផងដែរ ព្រមជាមួយនឹងការប្រកាសថានឹងត្រៀមបញ្ចេញស្ទីលសម្ដែងអោយប្លែក នៅក្នុងបទចម្រៀងមួយនេះ។ លោក ជ័យ សុវ៉ាត បានអះអាងថា បន្ទាប់ពីMV បទ«ក្រចេះស្ទឹងត្រែង»ទទួលបានការចាប់អារម្មណ៍នៅលើទីផ្សារ លោកកាន់តែមានកម្លាំងចិត្តក្នុងការរំលេចស្នាដៃថ្មីៗ បូករួមទាំងការសម្ដែងនៅក្នុងបទចម្រៀងអោយទទួលបាននូវការកោតសរសើរផង។ លោកថានៅក្នុងសាន់ដេ លោកបានថតទុកប្រមាណជា១០បទមកហើយ ប៉ុន្តែសាន់ដេនឹងចេញបង្ហោះបទចម្រៀងរបស់លោកជាដំណាក់កាលៗ ខណៈដែលបទ«សង្សារ ឡបល់យ៎អី» ដែលទើបចេញបង្អួតក៏ធ្វើអោយលោកទទួលបាននូវការគាំទ្រមិនតិចនោះដែរ ទើបលោកគម្រោងនឹងសម្ដែងនៅក្នុងMV មួយនេះអោយប្លែក អោយមើលទៅទាក់ភ្នែក ដើម្បីអោយសមនឹងការគាំទ្រ។
លោកថា បទចម្រៀង«សង្សារ ឡបល់យ៎អី!» ក៏ជាបទនិពន្ធថ្មីសុទ្ធសាធក្រោមការរៀបចំរបស់សាន់ដេនោះដែរ ដោយគ្រាន់តែបទចម្រៀងនេះ លោកគម្រោងបញ្ចេញស្ទីលថ្មីអោយទាក់ទាញខ្លាំង ដើម្បីអោយមហាជនមានការប្លែកភ្នែកផង។ យ៉ាងណាមិញ លោកថាមិនទាន់ចង់បង្ហើបថាស្ទីលថ្មីដែលលោកនឹងបង្ហាញក្នុងបទ«សង្សារ ឡបល់យ៎អី!» នោះទេ ដោយទុកអោយអ្នកគាំទ្រធ្វើការតាមដានច្រើនជាង។ លោកនឹងបង្ហាញខ្លួនលើឆាកតន្ត្រីអោយបានសស្រាក់សស្រាំ ដើម្បីប្រូម៉ូតបទចម្រៀងទាំងនោះអោយកាន់តែទាក់ទាញ ជាពិសេសគឺការឡើងឆាកទូរទស្សន៍។ លោក ជ័យ សុវ៉ាត បានអះអាងថាលោកនឹងធ្វើអោយជោគជ័យក្នុងនាមជាតារាចម្រៀងម្នាក់ ដោយមិនធ្វើអោយក្ដីស្រម៉ៃរបស់ខ្លួនមានការខកចិត្តនោះទេ បើទោះជាលោកមមាញឹកនឹងការរៀនពេទ្យមិនទាន់បញ្ចប់ទាំងស្រុង។ លោកថាសប្បាយចិត្តដែលបទចម្រៀង«សង្សារ ឡបល់យ៎អី»មានអ្នកស្គាល់ច្រើន ប៉ុន្តែលោកក៏រំពឹងយ៉ាងខ្លាំងថាក្រោយពីបទនេះចេញលក់ជាMV គឺរឹតតែមានអ្នកគាំទ្របន្ថែមទៀត៕