ខេត្តកោះកុង ៖ នារីរូបស្រស់ចំនួន២នាក់ មិនដឹងជាមានជំលោះនឹងគ្នាពីរឿងអ្វី និងត្រូវគេសង្ស័យថាជារឿងស្នេហាត្រីកោណ ទើបធ្វើឱ្យកើនកំដៅក្នុងចិត្តរៀងខ្លួន រហូតឈានដល់ផ្ទុះចេញជាអំពើហិង្សាវាយតប់គ្នាយ៉ាងចាស់ដៃ បណ្តាលឱ្យភាគីម្ខាងរងរបួសរយះថ្ពាល់ និងជាំគល់កចំណែកភាគីម្ខាងទៀតបានព្យាយាមរត់គេចខ្លួន តែត្រូវបានសមត្ថកិច្ចតាមចាប់ឃាត់ខ្លួនបាន កាលពីវេលាម៉ោង២រសៀល ថ្ងៃទី០៧ ខែមីនា ឆ្នាំ២០១៨ នៅចំណុចភូមិត្រពាំង ឃុំស្រែអំបិល ស្រុកស្រែអំបិល។
ហេតុការណ៍ហិង្សាស្រីស្អាតវ៉ៃគ្នារយះថ្ពាល់នេះ បានកើតឡើងកាលពីវេលាម៉ោង៩ព្រឹក ថ្ងៃទី០៦ ខែមីនា ឆ្នាំ២០១៨ នៅចំណុចភូមិ ត្រពាំង ឃុំស្រែអំបិល ស្រុកស្រែអំបិល និងត្រូវជាសង្ស័យថា ជំលោះឈានដល់ហិង្សានេះ ផ្តើមចេញពីគំនុំស្នេហាត្រីកោណ។
ស្រីស្អាតជាជនបង្កដែលត្រូវសមត្ថកិច្ចចាប់ឃាត់ខ្លួន មានឈ្មោះលៀង គឹមលីន ហៅលីន លីន អាយុ២៩ឆ្នាំ មានលំនៅក្នុងភូមិឃុំ កើតហេតុខាងលើ។ ចំណែកស្រីស្អាតជាជនរងគ្រោះ មានឈ្មោះឡេង គីមយី អាយុ២១ឆ្នាំ មានលំនៅក្នុងភូមិជាមួយគ្នា រងរបួសរយះថ្ពាល់ និងមានស្នាមជាំត្រង់គល់ក។
តាមប្រភពពីកន្លែងកើតហេតុ បានឱ្យដឹងថា នៅមុនពេលកើតហេតុ គេឃើញស្រីស្អាតទាំង២នាក់ខាងលើ បានមកជួបគ្នា និងមិនដឹងជាមានរឿងអ្វី ឬមានគំនុំអ្វីនឹងគ្នាពីណាមកមិនដឹង ឬអាចជាគំនុំរឿងស្នេហា ក៏ស្រាប់តែមកឈ្លោះប្រកែកគ្នាយ៉ាងតឹងសរសៃក រហូតដល់ភាគីទាំង សងខាងកើនកំដៅក្នុងចិត្ត ទប់លែងជាប់ដូចគ្នា ក៏ផ្ទុះជាអំពើហិង្សា ចាប់បោចសក់វាយតប់គ្នាទៅវិញទៅមក បណ្តាលឱ្យភាគីរងគ្រោះរងរបួស រយះថ្ពាល់ និងជាំក ចំណែកភាគីម្ខាងទៀត មិនមានរងរបួសអ្វីគួរឱ្យកត់សម្គាល់នោះទេ។
ក្រោយកើតហេតុ ភាគីទាំងសងខាងបានបែកផ្លូវគ្នារៀងខ្លួនអស់ បន្ទាប់មកភាគីរងគ្រោះបានដាក់ពាក្យបណ្តឹងឱ្យសមត្ថកិច្ចជួយ អន្តរាគមន៍ ទើបសមត្ថកិច្ចបានចុះធ្វើការស្រាវជ្រាវ រហូតឈានដល់ការឃាត់ខ្លួនភាគីបង្កបាន នៅវេលាម៉ោង២រសៀល ថ្ងៃទី០៧ ខែមីនា ឆ្នាំ២០១៨។
ស្រីស្អាតដែលជាជនបង្ក ត្រូវបានសមត្ថកិច្ចរៀបចំកសាងសំណុំរឿងបញ្ជូនខ្លួនទៅកាន់ស្នងការដ្ឋាននគរបាលខេត្ត ដើម្បីចាត់ការបន្តតាមនីតិវិធី៕