ភ្នំពេញ ៖ បុរសម្នាក់ បានកើតមានជំលោះជាមួយនឹងកូនប្រុសរបស់ខ្លួន លុះឆួលកំហឹងខ្លាំងពេក ទប់ចិត្តមិនបាន ក៏ទាញកាំបិតគប់សំដៅកូនប្រុស តែភ្លាមនោះ កូនប្រុសឃើញទាន់ ក៏គេចផុត ស្រាប់តែកាំបិតបានហោះទៅចំក្បាលក្មេងប្រុសម្នាក់ ដែលកំពុងជិះកង់កាត់នោះ បណ្តាលឱ្យរយះក្បាល សន្លប់ស្តូកនៅនឹងកន្លែង។
ករណីហិង្សាខាងលើនេះ បានកើតឡើងកាលពីវេលាម៉ោង៣ និង១០នាទីរសៀល ថ្ងៃទី០៧ ខែមីនា ឆ្នាំ២០១៨ នៅចំណុចមុខផ្ទះ គ្មានលេខ ស្ថិតក្នុងភូមិដើមស្លែង សង្កាត់ច្បារអំពៅ២ ខណ្ឌច្បារអំពៅ។
ក្មេងប្រុសរងគ្រោះ មានឈ្មោះថន ភារម្យ អាយុ៣ឆ្នាំ រស់នៅក្នុងបន្ទុកឪពុកម្តាយ និងស្នាក់នៅភូមិសង្កាត់កើតហេតុខាងលើ។ ចំណែកជនបង្កហេតុ មានឈ្មោះ ហ៊ុត សាវឿន អាយុ៤៩ឆ្នាំ មុខរបរនគរបាលវរការពាព្រំដែន ស្នាក់នៅភូមិសង្កាត់កើតហេតុខាងលើជាមួយគ្នា។
តាមប្រភពពីកន្លែងកើតហេតុ បានឱ្យដឹងថា នៅមុនពេលកើតហេតុ គេឃើញជនបង្ក បានឈ្លោះប្រកែកគ្នាជាមួយនឹងកូនប្រុសបង្កើតរបស់ខ្លួន នៅចំណុចកើតហេតុខាងលើ លុះជំលោះកាន់តែតឹងសរសៃក ធ្វើឱ្យជនបង្កកាន់តែច្រឡោតខឹង ទប់ចិត្តមិនបាន ក៏ស្ទុះទៅទាញកាំបិតផ្គាក់ ដងឬស្សី មុខច្រែះចាប់ ប្រវែង១ម៉ែត្រ គប់សំដៅកូនប្រុសរបស់ខ្លួន តែភ្លាមនោះ កូនប្រុសក្រឡេកឃើញទាន់ក៏គេចផុត ធ្វើឱ្យកាំបិតហោះទៅ ចំក្បាលក្មេងប្រុសរងគ្រោះខាងលើ ដែលកំពុងជិះកង់លេងនៅក្បែរនោះ បណ្តាលឱ្យរយះក្បាលហូរឈាម សន្លប់បាត់ស្មារតីនៅនឹងកន្លែងតែម្តង។
ប្រភពដដែលបន្តថា ភ្លាមៗនោះ ឪពុកម្តាយក្មេងប្រុសរងគ្រោះក៏បានឃាត់ខ្លួនជនបង្ក រួមនឹងវត្ថុតាង ប្រគល់ឱ្យសមត្ថកិច្ច ដើម្បីចាត់ការតាមច្បាប់។
ក្រោយកើតហេតុ ក្មេងប្រុសរងគ្រោះ ត្រូវបានក្រុមគ្រួសារ ដឹកបញ្ជូនទៅកាន់មន្ទីរពេទ្យគន្ធបុប្ជា ដើម្បីសង្គ្រាះជីវិត៕