ខេត្តស្ទឹងត្រែង ៖ នារីម្នាក់ បានពឹងឱ្យបុរសជាអ្នកស្គាល់គ្នាម្នាក់ ជួយដឹកម៉ូតូជូននាងត្រឡប់ ទៅផ្ទះវិញ ព្រោះយប់ជ្រៅ មិនហ៊ានទៅតែម្នាក់ឯង លុះទៅដល់ផ្ទះ ជួនពេលឪពុកម្តាយនាងមិននៅផ្ទះឃើញឱកាសស្ងាត់ល្អប្រុសកំហូច ក៏បានធ្វើសកម្មភាពចាប់រំលោភនារីរងគ្រោះ រហូតបានសម្រេច។ លុះនារីរងគ្រោះប្រាប់ម៉ែឪ ក៏ប្តឹងសមត្ថកិច្ចឃាត់ខ្លួន ចាត់ការតាមច្បាប់។
ករណីប្រុសព្រានអូសដៃកូនក្រមុំគេឡើង ឋានសួគ៌នេះ បានកើតឡើងកាលពីវេលាម៉ោង៨យប់ ថ្ងៃទី០៦ ខែឧសភា ឆ្នាំ២០១៨ នៅចំណុចលើផ្ទះនារីរងគ្រោះ។ លុះនារីរងគ្រោះរៀបរាប់ប្រាប់ឪពុកម្តាយដាក់ពាក្យបណ្តឹង ក៏ត្រូវសមត្ថកិច្ចព្រហ្មទណ្ឌកម្រិតធ្ងន់ខេត្តស្ទឹងត្រែង ចុះឃាត់ខ្លួនជនសង្ស័យបាន កាលពីថ្ងៃទី០៨ ខែឧសភា ឆ្នាំ២០១៨។
ជនសង្ស័យល្មោភកាម ដែលត្រូវសមត្ថកិច្ច ចាប់ឃាត់ខ្លួននោះ មានឈ្មោះគុយ កី អាយុ៣៣ឆ្នាំ មុខរបរជាកសិករ មានស្រុកកំណើតនៅភូមិពពេញ ឃុំពពេញ ស្រុកសូទ្រនិគម ខេត្តសៀមរាប។ ចំណែកនារីរងគ្រោះ មានអាយុ ២៥ឆ្នាំ មុខរបរកសិករ។
តាមសម្តីនារីរងគ្រោះ បានរៀបរាប់ប្រាប់ថា នៅមុនពេលកើតហេតុ កាលពីវេលាម៉ោង៨យប់ ថ្ងៃទី០៦ ខែឧសភា ឆ្នាំ២០១៨ នាងបានពឹងឱ្យជនសង្ស័យជួយបើកម៉ូតូជូននាងទៅផ្ទះវិញ ព្រោះយប់ជ្រៅណាស់ទៅហើយ នាងមិនហ៊ានដើរទៅផ្ទះវិញតែម្នាក់ឯងនោះទេ។ លុះពេលជិះម៉ូតូនៅតាមផ្លូវ ក៏ស្រាប់តែដួលម៉ូតូ បណ្តាលឱ្យនាងទទួលរងរបួសតិចតួច។
នារីរងគ្រោះបន្តថា លុះពេលដែលជូននាងទៅដល់ផ្ទះ គាប់ជួនឪពុកម្តាយរបស់នាង មិននៅផ្ទះ ចំណែកជនសង្ស័យ ក៏បានរកថ្នាំមកលាបរបួសឱ្យនាង លុះឃើញផ្ទះស្ងាត់ឈឹង ក៏សាកសួរនាងថា ប៉ាម៉ាក់អត់នៅទេអី? ពេលនោះនាងក៏បានឆ្លើយប្រាប់ជនសង្ស័យ តាមត្រង់ថា ប្រហែលជាពួកគាត់មិននៅទេ ព្រោះក្នុងផ្ទះស្ងាត់ច្រៀប។ គ្រាន់តែឮបែបនេះ ជនសង្ស័យក៏ផុសគំនិតអាក្រក់ឡើង ដោយស្ទុះមកចាប់ឱបនាង ព្រមទាំងគំរាមមិនឱ្យនាងរើបម្រះទៀត។ បន្ទាប់មក ជនសង្ស័យក៏ធ្វើសកម្មភាពចាប់រំលោភសេពសន្ថវៈនាងរហូតដល់បានសម្រេចតែម្តង ទើបក្រោកទៅបើកម៉ូតូត្រឡប់ទៅផ្ទះវិញបាត់ទៅ។ លុះមកដល់ព្រឹកឡើង នាងក៏បានរៀបរាប់ប្រាប់ឪពុកម្តាយ រួចនាំគ្នាទៅដាក់ពាក្យបណ្តឹងឱ្យសមត្ថកិច្ចជួយអន្តរាគមន៍តែម្តង។
សមត្ថកិច្ចមូលដ្ឋាន បញ្ជាក់ថា ក្រោយទទួលបានពាក្យបណ្តឹងពីនារីរងគ្រោះ សមត្ថកិច្ចបានចុះធ្វើការស្រាវជ្រាវ រហូតឈានដល់ការចាប់ឃាត់ខ្លួនជនសង្ស័យបាន នៅថ្ងៃទី០៨ ខែ ឧសភា ឆ្នាំ២០១៨ នាំយកមកសាកសួរ។
នៅចំពោះមុខសមត្ថកិច្ច ជនសង្ស័យឈ្មោះ គុយ កី បានឆ្លើយសារភាពថា រូបគេពិតជាបាន លួងលោមនារីរងគ្រោះ រួមរ័កបានម្តងមែន។
ជនសង្ស័យបន្តសារភាពថា នៅមុនពេលកើតហេតុ នារីរងគ្រោះបានពឹងរូបគេឱ្យជូនទៅផ្ទះវិញទាំងយប់ តែដោយពេលជិះតាមផ្លូវ ដួលម៉ូតូ ទើបរូបគេបានជួយរកថ្នាំមកលាបរបួសឱ្យនាង បន្ទាប់មក ឃើញឱកាសស្ងាត់ល្អ គេក៏ដឹកដៃនាងឡើងឋានសួគ៌តែម្តង ដឹងអី! ព្រឹកឡើងខាងស្រីដាក់ពាក្យបណ្តឹង ក៏ត្រូវសមត្ថកិច្ចស្រាវជ្រាវចាប់ខ្លួនគេតែម្តង។
ជនសង្ស័យខាងលើ ត្រូវបានសមត្ថកិច្ច រៀបចំកសាងសំណុំរឿង បញ្ជូនទៅកាន់សាលាដំបូងខេត្ត ដើម្បីចាត់ការទៅតាមនីតិវិធី៕