តារាចម្រៀងផលិតកម្មសាន់ដេ ខាន់ ជេមស៍ បានចុះទៅជួបនិងសួរសុខទុក្ខតារាចម្រៀងដែលកំពុងធ្លាក់ខ្លួន លោកចាន់ សម័យ ហើយអ្នកចម្រៀងរូបនេះមានការរន្ធត់ចិត្តខ្លាំង នៅពេលដែលឃើញលោកសម័យ បានផ្លាស់ប្តូរអាជីពពីច្រៀងទៅសម្ងំស្ទូចត្រីចិញ្ចឹមជីវិត ដោយបណ្តែតខ្លួនយ៉ាងកម្សត់ លាក់បាំងការលំបាកមិនឱ្យអ្នកណាដឹងនោះ។ ទោះជាយ៉ាងណា ក្រោយដឹងថា នៅពេលដែលដឹងថា សម្តេចតេជោ ហ៊ុន សែន បានឧបត្ថម្ភទឹកប្រាក់1ម៉ឺនឺដុល្លារអាមេរិក ឱ្យលោកចាន់ សម័យ សាងសង់ផ្ទះ ហើយឧកញ៉ាក្មេងឡេងណាវ៉ាត់ត្រា បានឱ្យដីមួយប្លង់ទៅលោកសម័យ ដើម្បីសង់ផ្ទះនោះ ខាន់ ជេមស៍ ក៏បានឧបត្ថម្ភជាទឹកប្រាក់មួយចំនួន និងខ្សាច់5ឡាន សម្រាប់ជួយដល់ការសង់ផ្ទះនោះដែរ។
តារាម្រៀងខាន់ ជេមស៍ បានប្រាប់ “នគរធំ” កាលពីព្រឹកថ្ងៃទី14 ខែកក្កដា ថា “ខ្ញុំមានការរន្ធត់ចិត្តខ្លាំង នៅពេលដែលដឹងថា លោកចាន់ សម័យ គាត់ធ្លាក់ខ្លួនឈឺជំងឺរបេងឆ្អឹងជើង ធ្វើការមិនកើត ហើយគាត់លាក់រឿងនេះជាច្រើនឆ្នាំ មិនឱ្យគេដឹងពីការលំបាករបស់គាត់ប្រាប់គេទេ សុខចិត្តពិបាកតែម្នាក់ឯង។ នៅពេលដែលខ្ញុំចុះទៅសួរសុខទុក្ខបងចាន់ សម័យ គាត់មានការភ្ញាក់ផ្អើលយើងខ្លាំងណាស់ ហើយខ្ញុំបានប្រាប់គាត់ថា បងឯងមិនឯកានោះទេ។ ខ្ញុំមានការលើកទឹកចិត្តច្រើនដល់បងសម័យ ឱ្យគាត់ កុំអស់សង្ឃឹម និងថែរក្សាសុខភាព ហើយខ្ញុំក៏បានជូនថវិកាមួយចំនួនដល់គាត់ដែរ។ ថ្មីៗនេះដែរ ខ្ញុំបានទទួលព័ត៌មានថា សម្តេចតេជោ ហ៊ុន សែន គាត់បានឧបត្ថម្ភទឹកប្រាក់1ម៉ឺនដុល្លារ ដល់លោកចាន់ សម័យ ដើម្បីឱ្យគាត់សាងសង់ផ្ទះ ហើយលោកឡេងណាវ៉ាត់ត្រា ឱ្យដីធ្វើផ្ទះទៀត ខ្ញុំមានអារម្មណ៍រំភើបណាស់ជំនួសគាត់ ហើយខ្ញុំប្រាប់គាត់ថា ខ្ញុំឱ្យខ្សាច់គាត់5ឡាន ហើយបងត្រូវការពេលណាខ្ញុំនឹងឱ្យគេដឹកជូនបងភ្លាម”។
ខាន់ ជេមស៍ បានឱ្យដឹងដែរថា លោកមិនមែនសម្តែងទេ ក្នុងការមានទឹកចិត្តជួយលោកចាន់ សម័យ នេះ គឺជាទឹកចិត្តដ៏បរិសុទ្ធ ដែលកើតចេញពីបេះដូងពិតប្រាកដ ព្រោះថា ខ្សាច់1ឡាន តម្លៃត្រឹមជាង100ដុល្លារប៉ុណ្ណោះ អ៊ីចឹងយើងចង់ជួយគាត់តាមលទ្ធភាព ដែលយើងអាចធ្វើទៅបាន។ ខ្ញុំបានប្រាប់បងចាន់ សម័យ ផងដែរថា ខ្ញុំចង់ច្រៀងឆ្លងឆ្លើយជាមួយគាត់ 1បទ នៅពេលដែលគាត់មានសុខភាពល្អវិញ ព្រោះខ្ញុំឃើញថា សមត្ថភាពបងសម័យ នៅតែល្អច្រៀងបានគ្រប់ទម្រង់ទាំងអស់ តែពេលនេះ បញ្ហាសំខាន់ គឺគាត់ត្រូវព្យាបាលជំងឺរបេងជើង ឱ្យជាសិន។
ខាន់ ជេមស៍ មិនទាន់ប្រាប់ឱ្យដឹងថា បទចម្រៀងដែលត្រៀមឆ្លងឆ្លើយជាមួយលោកចាន់ សម័យ នោះ ជាប្រភេទបទយ៉ាងណានោះទេ តែអ្នកចម្រៀងសាន់ដេ នេះថា កាលពី មុនលោកច្រៀងតែបទចាន់ សម័យ ទេ នៅពេលដែលមិនទាន់មានបទចម្រៀងផ្ទាល់ខ្លួនច្រៀងនោះ។
បើទោះជាមានចិត្តអាណិតអាសូរទៅលើរៀមច្បង ចាន់ សម័យ ដែលកំពុងធ្លាក់ខ្លួន និងជួយជ្រោមជ្រែងទាំងទេ ប្រាក់និងថវិកាខ្លះៗមែន តែពេលនេះ ខាន់ ជេមស៍ ក៏មួម៉ៅមិនតិចដែរ ព្រោះ Account ហ្វេសប៊ុករបស់ខ្លួន ត្រូវគេ Hack យកទៅខ្ចីលុយគេជាច្រើននាក់ នាំឱ្យតារាចម្រៀងរូបនេះខ្មាសគេមិនតិចឡើយ។
ខាន់ មករា ហៅខាន់ ជេសម៍ បញ្ជាក់ថា “ខ្ញុំត្រូវក្រុមចោរ Hack យកហ្វេសប៊ុកខ្ញុំដើរខ្ចីលុយគេពេញហ្នឹង តែនៅព្រឹកមិញ (14 កក្កដា) នេះ ខ្ញុំឱ្យអ្នក IT ធ្វើការយកបានមកវិញហើយ តែពួកចោរបែរជាទៅ Hack ហ្វេសប៊ុកប្រពន្ធខ្ញុំទៀត។ ខ្ញុំសូមឱ្យគ្រប់គ្នាមានការប្រុងប្រយ័ត្ន ពីរឿងនេះ ព្រោះគេអាចធ្វើឱ្យយើងមានបញ្ហា ព្រោះប៉ុន្មានថ្ងៃនេះ គេបានយកឈ្មោះខ្ញុំទៅខ្ចីលុយគេ ហើយធ្វើឱ្យយើងជួបការពិបាកណាស់រឿងនេះ។ អ៊ីចឹងខ្ញុំសូមឱ្យអ្នកសិល្បៈទាំងអស់ ឬអ្នកក្រៅសិល្បៈក៏ដោយ សូមឱ្យមានការប្រុងប្រយ័ត្នទាំងអស់គ្នា បើគេ Hack ហើយយើងទៅប្តឹងក្រសួងមហាផ្ទៃ ឬក៏ឱ្យអ្នកជំនាញ IT គេធ្វើការងារនេះភ្លាមៗ ចៀសវាងមានបញ្ហា”៕
