ខេត្តកំពង់ស្ពឺ ៖ បុរសជាប្តីម្នាក់ ត្រូវប្រពន្ធអះអាងថា គឺជាមនុស្សញៀនថ្នាំ និងញៀនស្រា តែងបង្ករឿងអុកឡុកក្នុងផ្ទះ និងឧស្សាហ៍ប្រើអំពើហិង្សាដាក់ប្រពន្ធខ្លាំងណាស់ ជាក់ស្តែង ក្រោយពីផឹកស្រាស្រវឹងធ្លាក់ភ្នែក ក៏បានមកសុំលុយប្រពន្ធយកទៅផឹកស៊ីជក់ថ្នាំបន្តទៀត លុះ ប្រពន្ធមិនឱ្យ ក៏ផ្ទុះកំហឹង ស្ទុះវាយប្រពន្ធ បណ្តាលឱ្យប៉ោងមុខ និងថែមទាំងគំរាមសម្លាប់ប្រពន្ធចោលទៀតផង។
ករណីអំពើហិង្សាក្នុងគ្រួសារខាងលើនេះ បានកើតឡើង កាលពីវេលាល្ងាច ថ្ងៃទី១៣ ខែកក្កដា ឆ្នាំ២០១៨ នៅចំណុចភូមិកាកាប ឃុំក្សេមក្សាន្ត ស្រុកឧដុង្គ។
ជនបង្កហេតុ ជាប្តីដែលវ៉ៃប្រពន្ធប៉ោងមុខ មានឈ្មោះយ៉ុង សូវៀត អាយុ៣៤ឆ្នាំ មុខរបរមិនពិតប្រាកដ និងជាមុខសញ្ញាប្រើប្រាស់ថ្នាំញៀន មានលំនៅក្នុងភូមិឃុំ កើតហេតុខាងលើ។
តាមសម្តីស្ត្រីជាប្រពន្ធ បានរៀបរាប់ទាំងទឹកភ្នែកប្រាប់ថា ប្តីរបស់នាង គឺជាមនុស្សដែលមិនមានមុខរបរអ្វីពិតប្រាកដនោះទេ មួយថ្ងៃៗ ចេះតែដើរពពាក់ពពូនជាមួយនឹងក្រុមក្មេងស្ទាវក្នុងភូមិ ផឹកស៊ីប៉ោឡែ អត់ប្រយោជន៍ មិនដែលជួយគិតគូររកស៊ីចិញ្ចឹមប្រពន្ធកូននោះទេ។ មិនតែប៉ុណ្ណោះ ប្តីនេះនៅធ្លាក់ក្នុងអន្លង់ថ្នាំញៀនទៀតផង ហើយឱ្យតែផឹកស្រាស្រវឹង ឬបែកថ្នាំម្តងៗ តែងបង្ករឿងក្នុងផ្ទះមិនឈប់។
ស្ត្រីជាប្រពន្ធរូបនេះ បន្តថា នៅមុនពេលកើតហេតុ ប្តីនេះ មិនដឹងជាទៅផឹកស្រានៅឯណានោះទេ ត្រឡប់មកដល់ផ្ទះវិញស្រវឹងជោកជាំ ធុំក្លិនស្រាហួង បានមកសុំលុយពីនាង បំណងយកទៅទិញថ្នាំញៀនជក់ តែនាងមិនព្រមឱ្យ ទើបធ្វើឱ្យប្តីកំណាចផ្ទុះកំហឹង រករឿងអុកឡុកពេញផ្ទះ និងថែមទាំងបានស្ទុះមកវាយនាងជាប្រពន្ធ បណ្តាលឱ្យប៉ោងមុខម្ខាង បន្ទាប់មកប្តីកំណាចថែមទាំងបានគំរាមសម្លាប់នាងចោលទៀតផង ទើបនាងទ្រាំលែងបាន ក៏រាយការណ៍ប្រាប់សមត្ថកិច្ចចុះអន្តរាគមន៍ចាប់ខួន បុរសជាប្តីនាំយកទៅចាត់ការតាមច្បាប់។
សមត្ថកិច្ចបញ្ជាក់ថា ក្រោយទទួលបានសេចក្តីរាយការណ៍ពីស្ត្រីរងគ្រោះជាប្រពន្ធរួចមក សមត្ថកិច្ចក៏បានចុះឃាត់ខ្លួនជនបង្កហេតុជាប្តី នាំយកទៅសួរ៕