ខេត្តកំពង់ចាម ៖ យុវជនម្នាក់កំពុងជិះម៉ូតូតាមផ្លូវ ស្រាប់តែមានក្រុមក្មេងស្ទាវចំនួន៣នាក់ បានធ្វើសកម្មភាពស្ទាក់វាយនឹងដំបងឬស្សី ចំកណ្តាលថ្ងាស បណ្តាលឱ្យបែកថ្ងាសរងរបួសធ្ងន់ កាលពីវេលាម៉ោង៥ និង៣០នាទីល្ងាច ថ្ងៃទី១៩ ខែកក្កដា ឆ្នាំ២០១៨ នៅចំណុចទំនប់ទឹកចាំនាង ស្ថិតក្នុងភូមិចាំនាង ឃុំផ្តៅជុំ ស្រុកជើងព្រៃ។
យុវជនរងគ្រោះ ដែលត្រូវក្មេងស្ទាវស្ទាក់វ៉ៃបណ្តាលឱ្យបែកថ្ងាស មានឈ្មោះវ៉ាន់ ធូ អាយុ១៦ឆ្នាំ រស់នៅភូមិបឹងជ្រោយ ឃុំសុំទូបិ ស្រុកជើងព្រៃ។ ចំណែកជនដៃដល់ទាំង៣នាក់ រួមមាន ទី១-ឈ្មោះតុន ឈុយ អាយុ២០ឆ្នាំ រស់នៅភូមិឃុំកើតហេតុខាងលើ ទី២-ឈ្មោះតុន មករា អាយុ១៩ឆ្នាំនៅ រស់នៅភូមិឃុំកើតហេតុខាងលើ និងទី៣-ឈ្មោះតុន សីហា ហៅតឿ អាយុ១៧ឆ្នាំ រស់នៅភូមិឃុំកើតហេតុខាងលើ។ ជនសង្ស័យទាំង៣នាក់ ក្រោយធ្វើសកម្មភាពវ៉ៃជនរងគ្រោះឱ្យរងរបួសធ្ងន់ហើយ ក៏បាននាំគ្នារត់គេចខ្លួនបាត់ស្រមោលអស់។
តាមប្រភពពីសមត្ថកិច្ចមូលដ្ឋាន បានឱ្យដឹងថា នៅមុនពេលកើតហេតុ គេឃើញយុវជនរងគ្រោះខាងលើ បានជិះម៉ូតូ១គ្រឿង ជិះម៉ូតូកាត់តាមភូមិកើតហេតុខាងលើ ស្រាប់តែមិនដឹងជាមានរឿងអ្វី ក៏ត្រូវក្រុមក្មេងស្ទាវទាំង៣នាក់ខាងលើ បានធ្វើសកម្មភាពស្ទាក់វាយនឹងដំបងឬស្សី ចំស្មា និងចំថ្ងាស បណ្តាលឱ្យបែកថ្ងាសរងរបួសធ្ងន់ និងត្រូវបានឪពុកម្តាយប្រញាប់ដឹកបញ្ជូនទៅសង្គ្រោះនៅមន្ទីរពេទ្យបង្អែកស្រុកជើងព្រៃ។ ចំណែកជនសង្ស័យទាំង៣នាក់ បាននាំគ្នាគេចខ្លួនចេញពីកន្លែងកើតហេតុបាត់ស្រមោលអស់៕