ខេត្តកំពង់ធំ ៖ បុរស២នាក់បងប្អូនបង្កើត បានបបួលគ្នាទៅបង់សំណាញ់យកត្រីនៅក្នុងប្រឡាយ ស្រាប់តែមិនជាប់ត្រី បែរជាជាប់ សត្វក្រពើ១ក្បាល ឃើញបែបនេះ បុរសក្លាហានទាំង២នាក់បងប្អូន ក៏ស្ទុះលោតចុះទឹកចាប់សត្វក្រពើនៅក្នុងទឹក តែទម្រាំចាប់បាន អ្នកទាំងពីរត្រូវ ក្រពើខាំ បណ្តាលឱ្យរងរបួសពេញរាងកាយ ប៊ិះស្លាប់។
ហេតុការណ៍ព្រលឹងចុងសក់ បង់សំណាញ់យកត្រី បែរជាជាប់ក្រពើនេះ បានកើតមានការភ្ញាក់ផ្អើលឡើងកាលពីវេលាម៉ោង២រសៀល ថ្ងៃទី២៣ ខែកក្កដា ឆ្នាំ២០១៨ នៅចំណុចប្រឡាយទឹកស្ថិតនៅខាងក្រោយរោងម៉ាស៊ីកិនស្រូវលោកគីម ប៉ូ ស្ថិតក្នុងភូមិក្រចាប់ សង្កាត់អាចារ្យ លាក់ ក្រុងស្ទឹងសែន។
បុរសទាំង២នាក់បងប្អូនដែលក្លាហានចាប់សត្វក្រពើ និងត្រូវសត្វក្រពើខាំប៊ិះស្លាប់ រួមមាន ទី១-ឈ្មោះជា វិចិត្រ អាយុ២៤ឆ្នាំ មុខរបរកសិករ និងទី២ ឈ្មោះជា ជឿន អាយុ២២ឆ្នាំ មុខរបរកសិករ។ ទាំងពីរនាក់បងប្អូនខាងលើ មានលំនៅក្នុងភូមិឃុំកើតហេតុខាងលើ។
តាមប្រភពពីកន្លែងកើតហេតុ បានឱ្យដឹងថា នៅមុនពេលកើតហេតុ គេឃើញជនរងគ្រោះទាំង២នាក់បងប្អូន បាននាំគ្នាទៅបង់សំណាញ់ រកត្រីនៅចំណុចប្រឡាយទឹក ក្រោយរោងម៉ាស៊ីនកិនស្រូវរបស់លោកគីម ប៉ូ (ទីតាំងកើតហេតុខាងលើ)។ លុះទៅដល់ អ្នកទាំងពីរក៏នាំគ្នា បង់សំណាញ់ ស្រាប់តែមិនជាប់ត្រី បែរជាទៅជាប់សត្វក្រពើ១ក្បាលទៅវិញ ធ្វើឱ្យសត្វក្រពើនោះ បានព្យាយាមរើបម្រះត្រដរចេញពីសំណាញ់បែកទឹកសំពោង ឃើញបែបនេះ បុរសជាបងឈ្មោះជា វិចិត្រ ក៏ស្ទុះលោតចូលទឹកទៅចាប់សត្វក្រពើនោះទាំងកំរោលតែម្តង ទើបត្រូវក្រពីខាំ បណ្តាលឱ្យមុតផ្ពាល់ខាងឆ្វេង និងថ្គាមខាងស្តាំ។
ប្រភពដដែលបន្តថា លុះឃើញបងប្រុសត្រូវសត្វក្រពើខាំឱ្យរបួសបែបនេះ ជនរងគ្រោះជាប្អូន ក៏ស្ទុះលោតចុះទឹកទៅជួយបងប្រុសចាប់សត្វក្រពើនោះដែរ ទើបត្រូវក្រពើខាំ បណ្តាលឱ្យមុតដើមទ្រូង១កន្លែង ចុងដោះ១កន្លែង។ ទីបំផុត ទម្រាំចាប់សត្វក្រពើ១ក្បាលនោះឡើងមកលើគោកបាន ទាំងពីរនាក់បងប្អូនត្រូវក្រពើខាំប៊ិះស្លាប់ និងត្រូវបានក្រុមគ្រួសារបញ្ជូនទៅមន្ទីរពេទ្យដើម្បីសង្គ្រោះជីវិតភ្លាមៗដែរ៕