ខេត្តកណ្តាល ៖ ជនសង្ស័យ២នាក់ បានធ្វើសកម្មភាពលួចកាច់កម៉ូតូ១គ្រឿងបានសម្រេច តែត្រូវម្ចាស់ឃើញទាន់ ស្រែកឆោឡោ ផ្អើលដល់ប្រជាពលរដ្ឋដេញព័ទ្ធចាប់ ធ្វើឱ្យជនសង្ស័យម្នាក់ភ័យស្លន់ស្លោពេក រត់មិនរួច ក៏ផ្តួលម៉ូតូចោលរត់គេចខ្លួន និងត្រូវប្រជាពលរដ្ឋតាមចាប់ក្របួចជាប់ លុះផ្ទុះកំហឹងខ្លាំងពេកទប់មិនជាប់ ក៏ព្រួតវ៉ៃម្នាក់១ដៃ១ជើង រហូតដល់ស្លាប់កប់ភក់នៅនឹងកន្លែង ចំណែកបក្ខពួកម្នាក់ទៀត សំណាងល្អ ជិះម៉ូតូរបស់ជនរងគ្រោះដែលលួចកាច់កបាន រត់គេចខ្លួនទាន់ពេលវេលា។
ហេតុការណ៍តុលាការប្រជាជនកាត់ទោសចោរលួចកាច់កម៉ូតូ បណ្តាលឱ្យស្លាប់កប់ភក់នេះ បានកើតមានការភ្ញាក់ផ្អើលឡើង កាលពីវេលាម៉ោង៥ល្ងាច ថ្ងៃទី២៥ ខែកក្កដា ឆ្នាំ២០១៨ នៅចំណុចខ្នងប្រឡាយ ភូមិតោតម៉ា ឃុំកណ្តោក ស្រុកកណ្តាលស្ទឹង។
ជនរងគ្រោះជាម្ចាស់ម៉ូតូ មានឈ្មោះសាន ជីវ័ន្ត ភេទប្រុស អាយុ៣៥ឆ្នាំ មុខរបរកសិករ មានលំនៅក្នុងភូមិឃុំកើតហេតុខាងលើ។ ចំណែកម៉ូតូដែលជនសង្ស័យលួចកាច់កយកទៅបាត់ ម៉ាកហុងដាឌ្រីម សេ១២៥ ពណ៌ខ្មៅ បិតតែម២០១៧។
ដោយឡែក ជនសង្ស័យដែលត្រូវប្រជាពលរដ្ឋព្រួតវាយសម្លាប់នៅនឹងកន្លែង មានឈ្មោះហួយ លឿង ភេទប្រុស អាយុ៣៤ឆ្នាំ ស្នាក់នៅភូមិដើមមៀន សង្កាត់ដើមមៀន ក្រុងតាខ្មៅ។ រីឯបក្ខពួកម្នាក់ទៀត មិនស្គាល់អត្តសញ្ញាណ (គេចខ្លួនបាត់)។ វត្ថុតាងដែលដកហូតបាន រួមមាន
ម៉ូតូ១គ្រឿង ម៉ាកហុងដាឌ្រីម សេ១២៥ ពណ៌ខ្មៅ បិតតែមឆ្នាំ២០១៨ ពាក់ស្លាកលេខ ភ្នំពេញ 1GL-0132 ទូរស័ព្ទ Nokia (ចុចពិល)ពណ៌ខ្មៅ១គ្រឿង កាបូបលុយពណ៌សូកូឡា មានប្រាក់ចំនួន៦ពាន់រៀល ដែកកេះ១ និងរូបថត១សន្លឹក។
តាមប្រភពពីសមត្ថកិច្ច បានឱ្យដឹងថា នៅមុនពេលកើតហេតុ កាលពីវេលាម៉ោង៥ល្ងាច ថ្ងៃទី២៥ ខែកក្កដា ឆ្នាំ២០១៨ ជនរងគ្រោះបានជិះម៉ូតូ១គ្រឿង ម៉ាកហុងដាឌ្រីម សេ១២៥ ពណ៌ខ្មៅ បិតតែម២០១៧ មកទុកលើខ្នងប្រឡាយ ហើយចុះដាក់ម៉ងបាត់។ ភ្លាមនោះជនសង្ស័យទាំង២នាក់ខាងលើ បានធ្វើសកម្មភាពកាច់កម៉ូតូរបស់ជនរងគ្រោះ លុះបានសម្រេចហើយ ជនសង្ស័យម្នាក់ដែលមិនស្គាល់ឈ្មោះ បានជិះម៉ូតូជនរងគ្រោះទៅបាត់។ ចំណែកជនសង្ស័យឈ្មោះហួយ លឿង រត់គេចមិនទាន់ ក៏ត្រូវប្រជាពលរដ្ឋដេញតាមព័ទ្ធចាប់បាន លុះម្នាក់ៗផ្ទុះកំហឹងខ្លាំងពេក ទប់មិនជាប់ ក៏ព្រួតគ្នាវ៉ៃជនសង្ស័យខាងលើ រហូតដល់ស្លាប់តែម្តង ទើបរាយការណ៍ប្រាប់សមត្ថកិច្ចឱ្យចុះមកជួយអន្តរាគមន៍។
បន្ទាប់ពីទទួលបានសេចក្តីរាយការណ៍ខាងលើ សមត្ថកិច្ចបានបង្កើតគណៈកម្មការពិនិត្យ រួមមានកម្លាំងជំនាញខេត្ត កម្លាំងជំនាញស្រុក កម្លាំងប៉ុស្តិ៍ និងគ្រូពេទ្យចុះពិនិត្យដល់កន្លែងកើតហេតុ រួចបញ្ជាក់ថា សាកសពមានកម្ពស់១,៦៥ម៉ែត្រ ស្លៀកលីអូក្នុងពណ៌ឈាមជ្រូក ស្លៀក ខោខូវប៊យជើងវែង ពណ៌ទឹកប៊ិក ពាក់អាវក្នុងដៃវែងឆ្នូត ពណ៌ស្វាយលាយស និងមានអាវក្រៅធំពណ៌ខ្មៅ ខ្នងមានសាក់រូបនាគ ដៃខាងឆ្វេង មានសាក់ I LOV YOU រីកប្រស្រីភ្នែកទាំងសងខាង របួសក្បាលផ្នែកខាងក្រោយខាងស្តាំ របួសទី១ ប្រវែង 5Cm x 1Cm ជម្រៅដល់លលាដ៍ របួសទី២ ទន្ទឹមជាប់គ្នា 4Cm x 1Cm ជម្រៅដល់លលាដ៍ របួសទី៣មានប្រវែង 7Cm x 1Cm ជម្រៅដល់លលាដ៍ របួសទី៤ មានប្រវែង 5.5Cm x 1Cm ជម្រៅដល់លលាដ៍ របួសទី៥លើបន្ទូលក្បាលប្រវែង 7Cm x 1Cm ជម្រៅដល់លលាដ៍។ ចំណែកលើដងខ្លួន និងអវយវពុំមានស្លាកស្នាមអ្វីឡើយ៕