យុវតីរូបស្រស់ដួលម៉ូតូ ត្រូវរ៉ឺម៉កដឹកបន្លែកិនបែកក្បាលស្លាប់

ភ្នំពេញ ៖ យុវតីរូបស្រស់ម្នាក់ជិះម៉ូតូចេញពីផ្ទះសំដៅទៅធ្វើការ ស្រាប់តែពេលធ្វើដំណើរតាមផ្លូវ ក៏ទាក់ដៃចង្កូតម៉ូតូជាមួយនឹងម៉ូតូ១គ្រឿងទៀត បណ្តាលឱ្យដួលទៅកណ្តាលផ្លូវ ស្របពេលនោះ រ៉ឺម៉កម៉ូតូដឹកបន្លែ១គ្រឿង បើកមកពីក្រោយគេចមិនទាន់ ក៏ជ្រុលកិនចំក្បាល បណ្តាលឱ្យបែកក្បាលស្លាប់នៅនឹងកន្លែងយ៉ាងអាណោចអធ័ម ចំណែកម៉ូតូដែលទាក់ដៃចង្កូតគ្នា រួមនឹងរ៉ឺម៉កម៉ូតូដឹកបន្លែ បានបន្តដំណើរទៅមុខ គេចបាត់ស្រមោល បន្សល់ទុកសាកសពយុវតីរងគ្រោះដេកស្លាប់ក្នុងថ្លុកឈាមនៅលើដងផ្លូវគួរឱ្យរន្ធត់បំផុត។

ហេតុការណ៍គ្រោះថ្នាក់ចរាចរណ៍ដ៏រន្ធត់ខាងលើនេះ បានកើតឡើង កាលពីវេលាម៉ោងប្រមាណ ៨ព្រឹក ថ្ងៃទី០៨ ខែកញ្ញា ឆ្នាំ២០១៨ នៅតាមបណ្តោយផ្លូវព្រះមុន្នីវង្ស ចំណុចមុខក្រុមហ៊ុនហុងដា ចំងាយប្រមាណ៥០០ម៉ែត្រពីច្រមុះជ្រូកក្បាលថ្នល់ ស្ថិតក្នុងសង្កាត់ទន្លេបាសាក់ ខណ្ឌចំការមន។

យុវតីរងគ្រោះដែលបាត់បង់ជីវិតក្នុងហេតុការណ៍គ្រោះថ្នាក់ចរាចរណ៍ខាងលើនេះ មានឈ្មោះលី សៀវហ្វុង អាយុ១៩ឆ្នាំ ជានិស្សិត ឆ្នាំទី១ នៅសកលវិទ្យាល័យភ្នំពេញអន្តរជាតិ (PPIU) មានលំនៅផ្ទះលេខ១៤៥ ភូមិព្រះពន្លា សង្កាត់ព្រែកប្រា ខណ្ឌច្បារអំពៅ។

តាមប្រភពព័ត៌មានពីកន្លែងកើតហេតុ បានរៀបរាប់ប្រាប់ថា នៅមុនពេលកើតហេតុ គេឃើញយុវតីរងគ្រោះខាងលើបានជិះម៉ូតូ១គ្រឿង ម៉ាកស្កុបពី ពណ៌ស ពាក់ស្លាកលេខ ភ្នំពេញ 1FA-1335 ជិះម្នាក់ឯង ដោយមិនបានពាក់មួកការពារសុវត្ថិភាពនោះទេ ធ្វើដំណើរតាមបណ្តោយផ្លូវព្រះមុន្នីវង្ស ក្នុងទិសដៅពីកើតទៅលិច លុះមកដល់ត្រង់ចំណុចមុខក្រុមហ៊ុនលក់ម៉ូតូហុងដា ទីតាំងកើតហេតុខាងលើ ក៏បានទាក់ដៃចង្កូតជាមួយម៉ូតូមួយគ្រឿងមិនចាំម៉ាក និងស្លាកលេខ បណ្តាលឱ្យម៉ូតូយុវតីរងគ្រោះដួលបោកក្បាលទៅនឹងថ្នល់ ភ្លាមៗនោះក៏មានរ៉ឺម៉កម៉ូតូដឹកបន្លែ១គ្រឿង មកពីក្រោយកិនចំក្បាលបែកក្បាលស្លាប់នៅក្នុងថ្លុកឈាមតែម្តង ចំណែករ៉ឺម៉កដឹកបន្លែ និងម៉ូតូ១គ្រឿងទៀតបើកគេចបាត់ស្រមោល។

តាមប្រភពពីក្រុមគ្រួសារយុវតីរងគ្រោះ បានរៀបរាប់ប្រាប់ថា យុវតីរងគ្រោះ សព្វថ្ងៃជានិស្សិតឆ្នាំទី១ផង និងឆ្លៀតពេលបម្រើការងារ ដើម្បីយកបទពិសោធន៍ និងរកប្រាក់ចំណូលផង។

នៅមុនពេលកើតហេតុ យុវតីរងគ្រោះទើបតែជិះម៉ូតូចេញពីផ្ទះ សំដៅទៅធ្វើការនៅម្តុំបាក់ទូក ស្រាប់តែអកុសល ក៏ជួបគ្រោះថ្នាក់ចរាចរណ៍នៅពាក់កណ្តាលផ្លូវ បណ្តាលឱ្យបាត់បង់ជីវិតទាំងវ័យក្មេងតែម្តង៕