រួមរ័កអស់កម្លាំង ប្រុសដេកលក់មួយភាំង ស្រីលួចលុយម៉ត់

ភ្នំពេញ ៖ បុរសជាជនបរទេសម្នាក់ បាននាំនារីជនជាតិខ្មែរម្នាក់ ឡើងសណ្ឋាគាររួមរ័កមេត្រី លុះចុះពីឋានសួគ៌មកវិញ ខាងប្រុសរាងអស់កម្លាំង ក៏ប្រះខ្លួនដេកលង់លក់ទៅ ចំណែកខាងស្រីឃើញឱកាសល្អ ក៏លួចលុយកាក់របស់ប្រុសស្នេហ៍អស់គ្មានសល់ លុះខាងប្រុសភ្ញាក់ដឹងខ្លួនមកវិញ ផ្អើលឆោឡោទៅដាក់ពាក្យបណ្តឹងឱ្យសមត្ថកិច្ចជួយអន្តរាគមន៍ រហូតឃាត់ខ្លួននារីជើងល្អបាន កាលពីវេលាម៉ោង៧យប់ ថ្ងៃទី១៧ ខែកញ្ញា ឆ្នាំ២០១៨ នៅចំណុចសួនច្បារមាត់ទន្លេ ម្តុំកន្លែងហាត់ប្រាណ ស្ថិតក្នុងសង្កាត់ផ្សារកណ្តាលទី១ ខណ្ឌដូនពេញ។

នារីសង្ស័យ ដែលត្រូវសមត្ថកិច្ចចាប់ឃាត់ខ្លួន មានឈ្មោះសឿន សុខលី អាយុ៣៣ឆ្នាំ មុខរបរនិងស្នាក់នៅមិនពិតប្រាកដ។ ចំណែកបុរសរងគ្រោះមានឈ្មោះ PAUL REYNOLD SAIKOVSKI អាយុ៥៩ឆ្នាំ ជាជនជាតិអូស្ត្រាលី មុខរបរទេសចរណ៍ កាន់លិខិតឆ្លងដែនលេខ PA 4847972 ស្នាក់នៅសណ្ឋាគារមូនស៊ូន បន្ទប់លេខ១៦ ជាន់ទី២ ផ្ទះលេខ៥១-៥៣-៥៥ ផ្លូវលេខ១៣០ សង្កាត់ផ្សារកណ្តាលទី១ ខណ្ឌដូនពេញ។ ដោយឡែកសម្ភារៈដែលបាត់បង់ រួមមានលុយចំនួន៦០០ដុល្លារ លុយអូស្ត្រាលីចំនួន១០០០ដុល្លារ លុយបាតចំនួន២ម៉ឺនបាត ទូរស័ព្ទដៃម៉ាក HTC10 មួយគ្រឿង ពណ៌ស និង TAPLET ពណ៌ខ្មៅមួយ។

សមត្ថកិច្ចប៉ុស្តិ៍នគរបាលរដ្ឋបាលផ្សារកណ្តាលទី១ បានឱ្យដឹងថា នៅមុនពេលកើតហេតុ កាលពីវេលាម៉ោង៧យប់ ថ្ងៃទី១៦ ខែកញ្ញា ឆ្នាំ២០១៨ ជនរងគ្រោះបាននាំជនសង្ស័យមករួមរ័កនៅសណ្ឋាគារមូនស៊ូន កន្លែងដែលខ្លួនស្នាក់នៅ។ លុះក្រោយមកជនរងគ្រោះបានដេកលក់ ហើយឆ្លៀតពេលនោះ ជនសង្ស័យបានលួចយកលុយ ទូរស័ព្ទដៃ និង TAPLET ខាងលើដែលជារបស់ជនរងគ្រោះ រួចគេចខ្លួនបាត់។

ក្រោយកើតហេតុ ជនរងគ្រោះបានដាក់ពាក្យបណ្តឹងឱ្យសមត្ថកិច្ចជួយអន្តរាគមណ៍ និងត្រូវបានសមត្ថកិច្ចចុះ ស្រាវជ្រាវ ដោយសហការជាមួយជនរងគ្រោះ រហូតដល់ថ្ងៃទី១៧ ខែកញ្ញា ឆ្នាំ២០១៨ វេលាម៉ោង៧យប់ ក៏ប្រទះឃើញជនសង្ស័យកំពុងដើរនៅសួនច្បារមាត់ទន្លេ ម្តុំកន្លែងហាត់ប្រាណ ក្នុងសង្កាត់ផ្សារកណ្តាលទី១ ខណ្ឌដូនពេញ ក៏បានឃាត់ខ្លួនជនសង្ស័យយកមកប៉ុស្តិ៍នគរបាលរដ្ឋបាលផ្សារកណ្តាលទី១តែម្តង៕