ភ្នំពេញ៖ ករណីម៉ូតូកង់បីប្រើល្បិចបោកយកក្តាមរបស់ស្ត្រីរងគ្រោះខាងលើនេះ បានកើតមានការភ្ញាក់ផ្អើលឡើង កាលពីថ្ងៃទី០២ ខែតុលា ឆ្នាំ២០១៨ ក្បែរទីតាំងលក់រថយន្ត១កន្លែង ស្ថិតក្នុងសង្កាត់វត្តភ្នំ ខណ្ឌដូនពេញ។
ស្ត្រីរងគ្រោះខាងលើ មិនត្រូវបានស្គាល់ពីអត្តសញ្ញាណនោះទេ គ្រាន់តែពិនិត្យតាមភិនភាគ មានវ័យប្រមាណជាង៤០ឆ្នាំ មុខរបរជាអ្នកទិញក្តាមស្រែមកលក់ និងមានស្រុកកំណើតនៅខេត្តកំពង់ចាម។ ចំណែកអ្នកបើកម៉ូតូកង់បីខាងលើ មិនត្រូវបានស្គាល់អត្តសញ្ញាណដូចគ្នា គ្រាន់តែដឹងថា ម៉ូតូកង់បីនោះ មានពណ៌ក្រហម។
តាមប្រភពពីកន្លែងកើតហេតុ បានឱ្យដឹងថា នៅមុនពេលកើតហេតុ ស្ត្រីរងគ្រោះខាងលើ បានជិះម៉ូតូកង់បីខាងលើដឹកក្តាមស្រែជាង៣០គីឡូក្រាម និងបន្លែ ចេញពីបេនឡានម្តុំព្រែកអញ្ចាញ សង្កាត់ជ្រោយចង្វារ រាជធានីភ្នំពេញ បំណងយកទៅលក់នៅផ្សារ ស្រាប់តែពេលធ្វើដំណើរមកដល់ចំណុចកើតហេតុខាងលើ ក៏ត្រូវអ្នកបើកម៉ូតូកង់៣ កុហកគាត់ថាអស់ហ្គាស ហើយឱ្យស្ត្រីរងគ្រោះចុះចាំនៅទីនោះមួយភ្លែត ចំណែកខ្លួន (ជនសង្ស័យ) ទៅរកកន្លែងបញ្ចូលហ្គាសសិន។
ភ្លាមនោះ ស្ត្រីរងគ្រោះក៏បានចុះចាំ តែក្តាម និងបន្លែ រួមនឹងអីវ៉ាន់មួយចំនួនទៀត ស្ត្រីរងគ្រោះ មិនបានយកចុះនោះទេ។ លុះក្រោយពីជិះចេញទៅ ម៉ូតូកង់បីនោះ ក៏ចេញទៅបាត់រហូតមិនឃើញត្រឡប់មកវិញឡើយ ដោយយកទាំងក្តម្តាស្រែ ជាង៣០គីឡូក្រាម ព្រមទាំងបន្លែរបស់ស្ត្រីរងគ្រាះទៅបាត់អស់ ដែលសរុបជាទឹកប្រាក់ប្រមាណជាង១៥ម៉ឺនរៀល។
ក្រោយកើតហេតុ ស្ត្រីរងគ្រោះបានត្រឹមតែដើរយំឱ្យគេជួយរក តែគេមិនដឹងជួបបែបណា តែសំណាងល្អ មានមន្ត្រីនគរបាលចិត្តល្អម្នាក់ បន្ទាប់ពីសួរនាំដឹងរឿងរបស់ស្ត្រីរងគ្រោះ ក៏បានជូនប្រាក់ទៅស្ត្រីរងគ្រោះចំនួន៥០ដុល្លារ ដើម្បីឱ្យគាត់មានដើមទុនរកស៊ីបន្តទៀត៕