តារាចម្រៀង និងសម្តែង អ្នកនាងឡាយ លក្ខិណា នឹងហោះចេញទៅច្រៀងសម្តែងនៅប្រទេសកាណាដា នៅយប់ថ្ងៃទី២១ ខែតុលា ឆ្នាំ២០១៨ នេះ ដោយអ្នកនាងនឹងផ្ញើខ្លួននៅទឹកដីត្រជាក់នេះ រយៈពេល៣ខែ ទើបត្រូវវិលត្រឡប់មកស្រុកខ្មែរវិញ។
អ្នកនាងឡាយ លក្ខិណា បានឱ្យដឹងថា “នេះជាលើកទី១ហើយ សម្រាប់អ្នកនាងដែលចេញទៅច្រៀងនៅសម្តែងនៅក្រៅប្រទេស ហើយតាមគម្រោង នាងនឹងវិលមកស្រុកខ្មែរវិញ តាមការកំណត់ គឺដើមឆ្នាំ២០១៩ ខាងមុខ”។
តារាចម្រៀងសម្តែងដែលបាត់មុខពីសិល្បៈជាង១០ឆ្នាំ ទើបតែវិលត្រឡប់មកប្រឡូកអាជីពចាស់វិញ នៅឆ្នាំ២០១៦ អ្នកនាងឡាយ លក្ខិណា ថា ដោយសារអ្នកនាងអាចច្រៀងបទពីដើមៗ បានសឹងតែគ្រប់ទម្រង់ ហេតុនេះហើយ មិនមានការព្រួយបារម្ភច្រើនក្នុងការច្រៀងសម្តែងនៅបរទេសនោះទេ ព្រោះថា បងប្អូននៅក្រៅប្រទេស គាត់ចូលចិត្តស្តាប់បទពីដើមៗ អ៊ីចឹងអ្នកនាងបានត្រៀមខ្លួនរួចជាស្រេច ក្នុងការច្រៀងនៅទឹកដីកាដាណា ជាលើកទី១នេះ។
ការចេញទៅស្គាល់រសជាតិលើកដំបូងរបស់អ្នកនាងឡាយ លក្ខិណា លើដីកាណាដា នេះ បន្ទាប់ពីអ្នកនាងបានអាក់ខានចេញទៅច្រៀងសម្តែងនៅអាមេរិក អំឡុងខែមេសា ឆ្នាំ២០១៨ កន្លងមក ខណៈដែលមានប្រទេស២ផ្សេងទៀត បានទាក់ទងឱ្យអ្នកនាងលក្ខិណា ចេញទៅរកលុយនៅក្រៅស្រុកដែរ ប៉ុន្តែចុងក្រោយ លក្ខិណា បានវីសាចេញទៅកាណាដា។
តាមរយៈរូបសម្រស់នៅតែផូរផង់ ហើយសម្ងំលក់ខាអាវនៅផ្សារអូរប្ញស្សី ជាច្រើនឆ្នាំ ទើបវិលរកឆ្នាំងចាស់វិញនេះ គេជឿថា អ្នកមេម៉ាយឡាយ លក្ខិណា អាចនឹងជួបគូស្នេហ៍ថ្មីលើដីកាណាដា ជាមិនខានឡើយ ស្របពេលដែលកន្លងមក តារាដែលមិនព្រមចាស់ទៅតាមវ័យ ព្រោះរូបសម្រស់នៅតែផូរផង់ ទ្រលុកទ្រលន់ហើយលេចមុខក្នុងរឿង “ផ្កាថ្ម” របស់ហង្សមាស នេះ បានអះអាងថា អ្នកនាងមានបុរសម្នាក់តាមស្រលាញ់ តែមិនច្បាស់លាស់នោះទេ គឺកំពុងតែស្វែងមើលចិត្តគ្នាប៉ុណ្ណោះ៕
