ខេត្តកំពត៖ ករណីហិង្សាដោយចេតនា ក្មេងស្ទាវដេញកាប់បុរស៣នាក់ឱ្យរងរបួសធ្ងន់ ចោទថាគេដឹកស្រីស្នេហ៍មកបង្អួតនេះ បានកើតមានការភ្ញាក់ផ្អើលឡើងកាលពីវេលាម៉ោង១និង១០នាទីរសៀល ថ្ងៃទី០៥ ខែធ្នូ ឆ្នាំ២០១៨ នៅចំណុចពីខាងកើតស្ពានមិត្តភាពកម្ពុជា-កូរ៉េ ក្បែរភោជនីយដ្ឋាន តាឪ ក្នុងទឹកដីភូមិកំពង់ បាយខាងត្បូង សង្កាត់កំពង់បាយ ក្រុងកំពត។
ជនសង្ស័យទាំង២នាក់ ដែលត្រូវសមត្ថកិច្ចចាប់ឃាត់ខ្លួន រួមមាន ទី១-ឈ្មោះភាព ផែន ភេទប្រុស អាយុ២០ឆ្នាំ មានលំនៅភូមិចង្ហោន ឃុំព្រែកត្នោត ស្រុកទឹកឈូ និងទី២-ឈ្មោះចេន វិត ភេទប្រុស អាយុ២៣ឆ្នាំ មុខរបរជាងម៉ូតូ ស្នាក់នៅភូមិក្រាំង សង្កាត់ក្រាំងអំពិល ក្រុងកំពត។ ចំណែកបក្ខពួកជនដៃដល់ម្នាក់ទៀត ដែលបានរត់គេចខ្លួន មានឈ្មោះឈិន ភេទប្រុស អាយុ២២ឆ្នាំ មុខរបរ និងស្នាក់នៅមិនពិតប្រាកដ។ ដោយឡែកជនរងគ្រោះទាំង៣នាក់ រួមមាន ទី១-ឈ្មោះអេង ហៃ ភេទប្រុស អាយុ២៩ឆ្នាំ មានលំនៅក្នុងភូមិសុវណ្ណសាគរ សង្កាត់កំពង់កណ្តាល ក្រុងកំពត ទី២-ឈ្មោះត្រឹង សីហា ភេទប្រុស អាយុ២៩ឆ្នាំ មានលំនៅភូមិស្វាយធំ សង្កាត់ក្រាំងអំពិល ក្រុងកំពត និងទី៣-មិនទាន់ស្គាល់ អត្តសញ្ញាណនៅឡើយ។
តាមប្រភពីកន្លែងកើតហេតុ បានឱ្យដឹងថា នៅមុនពេលកើតហេតុ កាលពីវេលាម៉ោង១និង១០នាទីរសៀល ថ្ងៃទី០៥ ខែធ្នូ ឆ្នាំ២០១៨ គេឃើញ ក្រុមជនបង្ក បាននាំគ្នាឈរនៅលើចិញ្ចើមផ្លូវ ត្រង់ចំណុចកើតហេតុខាងលើ លុះបន្តិចក្រោយមក ក៏ឃើញជនរងគ្រោះទាំង៣នាក់ខាងលើ ជិះម៉ូតូដឹកស្រីស្នេហ៍ ឆ្លងកាត់នោះ បន្ទាប់មក មិនដឹងថាមានរឿងអ្វីកើតឡើង ក៏ស្រាប់តែក្រុមក្មេងទំនើងទាំងនោះ បានស្ទុះទៅទាញដាវព្រួតគ្នា ដេញកាប់ជនរងគ្រោះទាំង៣នាក់ បណ្តាលឱ្យរងរបួសធ្ងន់តែម្តង៕