ភ្នំពេញ៖ ហេតុការណ៍នេះកើតឡើងកាលពីវេលាម៉ោង៨និង៣០នាទីយប់ ថ្ងៃទី០៦ ខែធ្នូ ឆ្នាំ២០១៨ នៅចំណុចរោងទុកចោលផ្លូវ១០៥១ ភូមិវិមានទ្រង់ សង្កាត់ក្រាំងធ្នង់ ខណ្ឌសែនសុខ។
ជនសង្ស័យដែលត្រូវសមត្ថកិច្ចចាប់ឃាត់ខ្លួន មានឈ្មោះយិន ដា អាយុ៣៣ឆ្នាំ មុខរបរមិនពិតប្រាកដ ស្នាក់នៅរោងទុកចោល ផ្លូវ១០៥១ ភូមិវិមានទ្រង់ សង្កាត់ក្រាំងធ្នង់ ខណ្ឌសែនសុខ (មានសារធាតុញៀន)។ ចំណែកជនរងគ្រោះមានឈ្មោះប្រាក់ ម៉ាញ អាយុ២៤ឆ្នាំ មុខរបររត់ ម៉ូតូកង់បី ស្នាក់នៅភូមិត្នោតជុំ សង្កាត់បឹងទំពន់ ខណ្ឌមានជ័យ។
តាមសម្តីជនរងគ្រោះ បានរៀបរាប់ប្រាប់ថា នៅមុនពេលកើតហេតុ គាត់បានដឹកជនសង្ស័យចេញពីម្តុំមន្ទីរពេទ្យលោកសង្ឃ ដោយធ្វើដំណើរមកដល់ចំណុចកើតហេតុខាងលើ ជនសង្ស័យក៏បានខ្ចីទូរស័ព្ទរបស់គាត់ ដោយប្រាប់ថា យកទៅបំភ្លឺមើលផ្លូវ លុះក្រោយពេលខ្ចីរួចជនសង្ស័យ ស្រាប់តែមិនព្រមប្រគល់ទូរស័ព្ទឱ្យខ្លួនវិញសោះ ពោលគឺប្រុងស៊ីដាច់តែម្តង ហើយពេលនោះ ខ្លួនបានស្រែកហៅជនសង្ស័យដែរ តែមិនឆ្លើយតប ស្របពេលដែលកម្លាំងល្បាតចុះមកដល់ សួរនាំ ទើបខ្លួនបានរៀបរាប់ប្រាប់សមត្ថកិច្ចតាមដំណើររឿង ពេលនោះសមត្ថកិច្ចក៏បានធ្វើការឃាត់ខ្លួនជនសង្ស័យ រួមទាំងវត្ថុតាងយកមកធ្វើការសាកសួរ នៅប៉ុស្តិ៍រដ្ឋបាលក្រាំងធ្នង់តែម្តង៕