ខេត្តបាត់ដំបង៖ ករណីភ្ជង់ប្លន់កាប់ឈើនេះ បានកើតមានការភ្ញាក់ផ្អើលឡើងកាលពីវេលាម៉ោង៥និង៤០នាទីល្ងាច ថ្ងៃទី១០ ខែធ្នូ ឆ្នាំ២០១៨ នៅត្រង់ចំណុចថ្មតម្រួត ស្ថិតក្នុងភូមិអូររំចេកក្រោម ឃុំអូរសំរិល ស្រុកសំឡូត។
ជនសង្ស័យទាំង៦នាក់ ដែលភ្ជង់គំរាមប្លន់ឈើគេ និងត្រូវបានសមត្ថកិច្ចចាប់ឃាត់ខ្លួន រួមមាន ទី១-ឈ្មោះយី ម៉ង់ អាយុ២៤ឆ្នាំ មុខរបរមិនពិតប្រាកដ រស់នៅភូមិអូរសំរិលលើ ឃុំអូរសំរិល ស្រុកសំឡូត ទី២-ឈ្មោះប៉ែត សំអ៊ុន អាយុ៣២ឆ្នាំ មុខរបរមិនពិតប្រាកដ រស់នៅស្រុកបសេដ្ឋ ខេត្តកំពង់ស្ពឺ ទី៣-ឈ្មោះឆៃ ណាក់ អាយុ២៥ឆ្នាំ មុខរបរមិនពិតប្រាកដ រស់នៅភូមិកន្តួត ឃុំសំឡូត ស្រុកសំឡូត ទី៤-ឈ្មោះនាក់ មឿន អាយុ៣៧ឆ្នាំ មុខរបរមិនពិតប្រាកដ ទី៥-ឈ្មោះសៀង សុខា អាយុ២៤ឆ្នាំ មុខរបរមិនពិតប្រាកដ និងទី៦-ឈ្មោះគឿត សាវី អាយុ១៨ឆ្នាំ មុខរបរមិនពិតប្រាកដ អ្នកទាំង៣ មានលំនៅក្នុងភូមិបឹងរុន ឃុំសំឡូត ស្រុកសំឡូត ជាមួយគ្នា។ ដោយឡែក ជនរងគ្រោះជាម្ចាស់ចម្ការ មានឈ្មោះសូត្រ ណុង ហៅម៉ម នឿន អាយុ៥៦ឆ្នាំ រស់នៅភូមិឃុំកើតហេតុខាងលើ។
តាមប្រភពពីសមត្ថកិច្ច បានឱ្យដឹងថា នៅមុនពេលកើតហេតុ ជនសង្ស័យទាំង៦នាក់ខាងលើ បាននាំគ្នាលួចចូលទៅកាប់ឈើធ្នង់នៅក្នុងចម្ការរបស់ឈ្មោះសូត្រ ណុង ហៅម៉ម នឿន នៅចំណុចទីតាំងកើតហេតុខាងលើ។ លុះពេលកំពុងធ្វើសកម្មភាព ម្ចាស់ចម្ការបានទៅទាន់ តែត្រូវក្រុមជនសង្ស័យទាញកាំភ្លើងអាកា បាញ់គំរាមមិនឱ្យម្ចាស់ចម្ការចូលជិតឡើយ ទើបម្ចាស់ចម្ការរាយការណ៏ប្តឹងសមត្ថកិច្ចតែម្តង៕