ខេត្តកណ្តាល ៖ ករណីអំពើហិង្សាផ្តើមចេញពីភ្លើងប្រចណ្ឌនេះ បានកើតឡើងកាលពីវេលាម៉ោង៦និង៣០នាទីព្រលប់ ថ្ងៃទី១០ ខែធ្នូ ឆ្នាំ២០១៨ នៅត្រង់ចំណុចភូមិទ្រាំងក្រោម ឃុំតាឯក ស្រុកខ្សាច់កណ្តាល។
បុរសរងគ្រោះ ដែលរងរបួសបែកថ្ងាស មានឈ្មោះនូ គង់ អាយុ៦៣ឆ្នាំ មុខរបរកសិករ មានលំនៅភូមិចាន់រ៉ា ឃុំស្ពឺខ ស្រុកបាភ្នំ ខេត្តព្រៃវែង។ ចំណែកជនសង្ស័យ មានឈ្មោះឡាច សាមឿន អាយុ៦៤ឆ្នាំ មុខរបររត់ម៉ូតូឌុប មាន លំនៅភូមិក្រោលគោ សង្កាត់គីឡូម៉ែត្រលេខ៦ ខណ្ឌឬស្សីកែវ រាជធានីភ្នំពេញ។
តាមប្រភពពីសមត្ថកិច្ច បានឱ្យដឹងថា កន្លងមក ជនសង្ស័យឈ្មោះឡាច សាមឿន និងស្ត្រីឈ្មោះស្រេង ចាន់ថូ បានចាប់ចិត្តស្រឡាញ់គ្នា រហូតព្រមព្រៀងរួមរស់នឹងគ្នាដូចប្តីប្រពន្ធ ដោយស្នាក់នៅផ្ទះជួលជាមួយគ្នានៅឯរាជធានីភ្នំពេញ។ លុះក្រោយមក ដោយសារតែរស់នៅមិនសូវចុះសម្រុង និងតែងកើតមានជំលោះ បែកផ្សែងសឹងរាល់ថ្ងៃ ទើបខាងស្រីឈ្មោះស្រេង ចាន់ថូ បានសុំបែកចែកផ្លូវគ្នាជាមួយជនសង្ស័យជាប្រុសស្នេហ៍ចាស់ រួចក៏ងាកមកស្រឡាញ់ជនរងគ្រោះឈ្មោះនូ គង់ វិញ និងបាននាំគ្នា មករស់នៅភូមិទ្រាំងក្រោម ឃុំតាឯក ស្រុកខ្សាច់កណ្តាល។
ប្រភពដដែលបន្តថា ក្រោយមករឿងរ៉ាវអតីតស្រីស្នេហ៍មានប្រុសថ្មីនេះ ក៏ដឹងដល់ជនសង្ស័យ ធ្វើឱ្យជនសង្ស័យមួម៉ៅក្តៅចិត្តិ នៅថ្ងៃកើតហេតុ ក៏បានទាញម៉ូតូ ជិះម៉ូតូឌុបចេញពីភ្នំពេញ សំដៅមកភូមិទ្រាំងក្រោម ឃុំតាឯក ស្រុកខ្សសាច់កណ្តាល បំណងមកសុំជានាជាមួយគ្នាវិញផង ដោយបានយកញញួរមកជាមួយផង។ លុះពេលមកដល់ផ្ទះ ដោយឃើញឈ្មោះស្រេង ចាន់ថូ (អតីតស្រីស្នេហ៍) និងជនរងគ្រោះឈ្មោះនូ គង់ កំពុងនៅជាមួយគ្នាកៀកកើស្នេហាគ្នាយ៉ាងល្អូកល្អិន ធ្វើឱ្យជនសង្ស័យផ្ទុះភ្លើង ប្រចណ្ឌ ទាញញញួរទៅវាយឈ្មោះ នូ គង់ បណ្តាលឱ្យមានរបួស លើថ្ងាស១កន្លែង កញ្ចឹងក១កន្លែង និងជង្គង់ឆ្វេង១ កន្លែង ឃើញដូចនោះ អ្នកជិតខាងបានឃាត់បំបែកចេញពីគ្នា៕