Dj Mike សន្យាថា បងប្អូនទាំងឡាយនៅខេត្តសៀមរាប ប្រាកដជាបានសប្បាយរីករាយជាមិនខានឡើយ នៅរាត្រីថ្ងៃទី២២ ខែធ្នូនេះ ព្រោះយាយគ្រវីសក់ Sitang buathong នឹងបង្កការភ្ញាក់ផ្អើល ដោយអុកឡុកពេញផ្សារ Palm Container Night Market ចាប់ពីក្បាលព្រលប់ដល់យប់អាធ្រាត្រ។
តារាសម្ដែង និងជា DJ រូបសង្ហានោះ អះអាងថា ក្បាច់រាំចម្លែកៗរបស់យាយគ្រវីសក់ Sitang Buathong បានត្រៀមរួចជាស្រេច ដោយចាប់ដៃគូជាមួយរូបលោកផ្ទាល់នៅឆាកតន្ដ្រីផ្សារ ផាម កុងតឺណឺរ នោះ បន្ទាប់ពីពេលថ្ងៃលោកត្រូវដឹកដៃយាយគ្រវីសក់ ទស្សនាប្រាង្គប្រាសាទអង្គរវត្ត និងប្រាសាទជាច្រើនទៀត ព្រោះថា នេះជាលើកទី១ហើយ ដែល Sitang Buathong បានមកប្រទេសកម្ពុជា។
គួរបញ្ជាក់ថា Sitang Buathong ជាជនជាតិថៃ ហៅយាយគ្រវីសក់ ត្រូវបានគេស្គាល់តាមបណ្ដាញសង្គមហើយទោះជាមានរូបរាងមិនសូវស្អាតក្ដី តែគាត់ទៅដល់ណា ផ្អើលអ្នកទស្សនាទៅចោមរោម និងថតរូបសែលហ្វីជាមួយ ទើបធ្វើឲ្យ Dj Mike នាំគាត់មករាំក្នុងកម្មវិធីសម្ពោធក្លឹប Voulez Vous នៅភ្នំពេញរាត្រីថ្ងៃទី២១ ខែធ្នូ និងបង្ហួសទៅខេត្តសៀមរាប រាត្រីថ្ងៃទី២២ ខែធ្នូ នៅផ្សារផាម កុងតឺណឺរ ដែលលោក Mike សង្ឃឹមថា នឹងមានទស្សនិកជនជាច្រើនចូលរួមជាមិនខាន តាមរយៈភាពល្បីល្បាញរបស់លោកយាយគ្រវីសក់ ទៅបង្ហាញខ្លួននោះ៕
