ភ្នំពេញ៖ ហេតុការណ៍នេះបានកើតមានការភ្ញាក់ផ្អើលឡើង កាលពីវេលាម៉ោង៩និង៣០នាទីយប់ ថ្ងៃទី១០ ខែមករា ឆ្នាំ២០១៩ តាមបណ្តោយផ្លូវសហព័ន្ធរុស្សីនៅចំណុចមុខក្រសួងការពារជាតិ ស្ថិតនៅក្នុងសង្កាត់ស្រះចក ខណ្ឌដូនពេញ។
បុរសដែលឡើងទៅសម្ងំលើដំបូលផ្ទះគេទាំងយប់នេះ មានឈ្មោះលុយ សុភាព អាយុ៣៩ឆ្នាំ មុខរបរ និងស្នាក់នៅមិនពិតប្រាកដ។
តាមប្រភពពីកន្លែងកើតហេតុ បានឱ្យដឹងថា នៅមុនពេលកើតហេតុ គេបានឃើញបុរសខាងលើ មិនដឹងថាដើរមកពីណានោះទេ សង្ស័យថាប្រើប្រាស់ថ្នាំញៀនហួសកម្រិត (បែកថ្នាំ) បានធ្វើសកម្មភាពឡើងទៅលើដំបូលផ្ទះ របស់ប្រជាពលរដ្ឋ ដែលនៅទល់មុខក្រសួងការពារជាតិ រួចសម្ងំជិត១ម៉ោង បង្កឱ្យមានការភ្ញាក់ផ្អើលទៅដល់ប្រជាពលរដ្ឋនាំគ្នាចោមរោមមើល និងរាយការណ៍ប្រាប់សមត្ថកិច្ចប៉ុស្តិ៍ស្រះចកចុះមកអន្តរាគមន៍ ដោយនាំគ្នាលួងលោមឱ្យចុះមកក្រោមវិញ ខ្លាចមានគ្រោះថ្នាក់បាក់ដំបូល។
លុះក្រោយពីព្យាយាមនិយាយលួងលោមអស់រយៈពេលមួយសន្ទុះធំរួចមក ទើបបុរសខាងលើព្រមចុះមកក្រោមវិញតាមសម្រួល ហើយសមត្ថកិច្ចក៏ធ្វើការឃាត់ខ្លួន នាំទៅកាន់សាលាខណ្ឌដូនពេញ ដើម្បីយកទៅមន្ទីរសង្គមកិច្ចធ្វើការអប់រំ៕