ខេត្តព្រះសីហនុ៖ ជនសង្ស័យ៣នាក់ សុទ្ធសឹងជាក្មេងស្ទាវឈាមរាវ ញៀនថ្នាំ ដែលធ្វើសកម្មភាពចូលភ្ជង់ប្លន់ជនរងគ្រោះ២នាក់ឪពុក និងកូនស្រីដល់ក្នុងផ្ទះ រហូតឈានដល់ការចាក់បុរសជាឪពុកបណ្តាលឱ្យរយះក្បាលពោះ កាលពីព្រលប់ ថ្ងៃទី១៦ ខែមករា ឆ្នាំ២០១៩ ត្រង់ចំណុច ភូមិ២ សង្កាត់លេខ០៤ ក្រុងព្រះសីហនុ ត្រូវបានសមត្ថកិច្ច្ចស្រាវជ្រាវចាប់ខ្លួនបានហើយ កាលពីវេលាម៉ោង៩យប់ ថ្ងៃទី១៧ ខែមករា ឆ្នាំ២០១៩។
ជនសង្ស័យទាំង៣នាក់ ដែលត្រូវសមត្ថកិច្ចចាប់ឃាត់ខ្លួន រួមមាន ទី១-ឈ្មោះតូច តាច ភេទប្រុស អាយុ១៤ឆ្នាំ មុខរបរ និងស្នាក់នៅមិនពិតប្រាកដ (កាន់កាំភ្លើងជ័រភ្ជង់)។ ទី២-ឈ្មោះឆាយ ប៊ុនឈឿ ភេទប្រុស អាយុ១០ឆ្នាំ ស្នាក់នៅមិនពិតប្រាកដ (អ្នកមើលផ្លូវ)។ និងទី៣-ឈ្មោះភត្រា ឬឈ្មោះញឹល ទិត្យ ភេទប្រុស អាយុ២១ឆ្នាំ មុខរបរមិនពិតប្រាកដ ស្នាក់នៅផ្ទះជួលស្ថិតក្នុងភូមិ១ សង្កាត់៤ ក្រុងព្រះសីហនុ (អ្នកយកកាំបិតចាក់ជនរងគ្រោះ)។
ចំណែកជនរងគ្រោះដែលត្រូវជនសង្ស័យចាក់១កាំបិតចំពោះ មានឈ្មោះលី កៅ ភេទប្រុស អាយុ៥២ឆ្នាំ មានមុខរបរជាអាជីវករក្នុង ផ្សារលើ ក្រុងព្រះសីហនុ។ ចំណែកកូនស្រីម្នាក់ទៀត ដែលស្ថិតក្នុងហេតុការណ៍ខាងលើ និងត្រូវជនសង្ស័យភ្ជង់កាំភ្លើងគំរាមដែរនោះ ទើបនឹងមាន អាយុ១០ឆ្នាំប៉ុណ្ណោះ។ ជនរងគ្រោះទាំង២នាក់ឪពុកនិងកូន ស្នាក់នៅផ្ទះកើតហេតុខាងលើ។
លោកស្នងការរងបញ្ជាក់ថា ក្រោយការស្រាវជ្រាវ សមត្ថកិច្ចបានកំណត់មុខសញ្ញាបានថា តាមពិតក្រុមមួយនេះជាក្រុមក្មេងញៀនថ្នាំ មិនមែនជាក្រុមចោរប្លន់ប្រដាប់អាវុធឡើយ។ ករណីនេះ ការិយាល័យនគរបាលព្រហ្មទណ្ឌកម្រិតធ្ងន់ កំពុងកសាងសំណុំរឿងតាមនីតិវីធី បញ្ជូនទៅសាលាដំបូងខេត្តព្រះសីហនុ។
គួររំលឹកថា កាលពីវេលាម៉ោង៦ និង៤៥នាទីព្រលប់ ថ្ងៃទី១៦ ខែមករា ឆ្នាំ២០១៩ មានករណីប្លន់មួយួបានកើតឡើង នៅត្រង់ចំណុច ក្បែរឱសថស្ថានកំពង់សោមថ្មីឈុត ស្ថិតក្នុងភូមិ២ សង្កាត់លេខ០៤ ក្រុងព្រះសីហនុ ដោយជនសង្ស័យ១ក្រុម ប្រដាប់ដោយកាំបិត និងកាំភ្លើងខ្លី បានចូលទៅធ្វើសកម្មភាពភ្ជង់ប្លន់ជនរងគ្រោះ២នាក់ឪកូនដល់ក្នុងផ្ទះ ដោយម្នាក់ភ្ជង់កាំភ្លើងគំរាមកូនស្រី ចំណែកម្នាក់ទៀតចូលទៅភ្ជង់កាំបិត បុរសជាឪពុកដល់ក្នុងបន្ទប់ទឹក និងបានប្រតាយប្រតប់ចាក់ជនរងគ្រោះ១កាំបិតចំពោះ លុះជនរងគ្រោះស្រែកឆោឡោ ផ្អើលដល់ប្រជាពលរដ្ឋចេញមកជួយ ក៏ភ័យស្លន់ស្លោ នាំគ្នារត់គេចខ្លួនអស់៕
