ខេត្តតាកែវ៖ យុវជន២នាក់ជិះម៉ូតូដឹកគ្នាក្នុងល្បឿនយ៉ាងលឿនដូចហោះ រួចក៏បោះពួយធ្លាក់ពីលើស្ពានថ្ម បណ្តាលឱ្យបាក់កស្លាប់ទាំង២នាក់ យ៉ាងអាណោចអាធ័ម កាលពីវេលាម៉ោង១១និង១០នាទី ថ្ងៃទី១៩ ខែមករា ឆ្នាំ២០១៩ នៅចំណុចលើផ្លូវក្រាលកៅស៊ូ ភូមិក្រាំងធ្នង់ ឃុំរវៀង ស្រុកសំរោង។
ជនរងគ្រោះទាំង២នាក់ ដែលជិះម៉ូតូហោះធ្លាក់ស្ពានស្លាប់ រួមមាន ទី១-ឈ្មោះតេង ផានិត្យ ភេទប្រុស អាយុ២១ឆ្នាំ មុខរបរកសិករ រស់នៅភូមិស្រីប្រសើរ ឃុំស្លា ស្រុកសំរោង (ជាអ្នកបើកម៉ូតូ) និងទី២-ឈ្មោះសុខ វណ្ណនុត ភេទប្រុស អាយុ១៨ឆ្នាំ មុខរបរកសិករ រស់នៅភូមិ ឃុំជាមួយគ្នា (អ្នករួមដំណើរ)។
តាមប្រភពពីកន្លែងកើតហេតុ គេឃើញជនរងគ្រោះទាំង២នាក់ បានជិះម៉ូតូ១គ្រឿង ម៉ាកស៊ុយស៊ូគីនិច ពណ៌ផ្កាឈូកលាយខ្មៅ ពាក់ស្លាក លេខ ភ្នំពេញ 1CW-7489 ដឹកគ្នាតាមបណ្តោយផ្លូវក្រាលកៅស៊ូក្នុងល្បឿនយ៉ាងលឿន លុះមកដល់ចំណុចកេតិហេតុខាងលើ មិនដឹងជាយ៉ាងម៉េច ក៏ស្រាប់តែម៉ូតូបានរេចង្កូតធ្លាក់ស្ពានថ្ម បណ្តាលឱ្យជនរងគ្រោះទាំង២នាក់បាក់កស្លាប់នៅនឹងកន្លែងយ៉ាងអាណោចអាធ័មតែម្តង។
ក្រោយកើតហេតុ សមត្ថកិច្ចបានចុះមកពិនិត្យ ដល់ទីតាំងកើតហេតុ រួចក៏បានធ្វើកំណត់ហេតុ ប្រគល់សាកសពជនរងគ្រោះទៅឱ្យក្រុមគ្រួសារ ដើម្បីរៀបចំធ្វើបុណ្យតាមប្រពៃណី៕
