ខេត្តមណ្ឌលគិរី៖ ហេតុការណ៍នេះបង្កឱ្យមានការភ្ញាក់ផ្អើលឡើងកាលពីវេលាម៉ោង១០និង១៥នាទីព្រឹក ថ្ងៃទី១៩ ខែមករា ឆ្នាំ២០១៩ នៅចំណុចអូរតេ ស្ថិតក្នុងភូមិពូរង៉ោល ឃុំមេម៉ង់ ស្រុកកែវសីមា។
បុរសរងគ្រោះដែលបាត់បង់ជីវិតនេះ មានឈ្មោះក្រើត ក្រាក់ អាយុ៣៥ឆ្នាំ ជាជនជាតិដើមភាគតិចព្នង មុខរបរកសិករ មានលំនៅក្នុងភូមិឃុំកើតហេតុខាងលើ។
តាមប្រភពពីកន្លែងកើតហេតុ បានឱ្យដឹងថា នៅមុនពេលកើតហេតុ បុរសរងគ្រោះរួមនឹងអ្នករួមការងារប៉ុន្មាននាក់ទៀត បាននាំគ្នារៀបចំដាក់កៅឡាក់ដើម្បីទាញឈើ លុះពេលកំពុងអូសទាញឈើ ស្រាប់តែទំពក់កៅឡាក់បានរបូត ធ្វើឱ្យវាត់មកចំក្បាលរបស់ជនរងគ្រោះ បណ្តាលឱ្យបែកក្បាលស្លាប់ភ្លាមៗមួយរំពេច។
ក្រោយកើតហេតុ សាកសពជនរងគ្រោះត្រូវបានអ្នករួមការងារ ដឹកបញ្ជូនមកដល់ផ្ទះ និងបានរាយការណ៍ប្រាប់សមត្ថកិច្ចឱ្យចុះមក ពិនិត្យផងដែរ។
បន្ទាប់ពីពិនិត្យ និងធ្វើកោសល្យវិច័យរួចរាល់ សមត្ថកិច្ចជំនាញបានបញ្ជាក់ថា ជនរងគ្រោះពិតជាស្លាប់ដោយសារគ្រោះថ្នាក់ការងារប្រាកដមែន ដោយកៅឡាក់របូតទំពក់វាត់ចំក្បាល បណ្តាលឱ្យស្លាប់នៅនឹងកន្លែងតែម្តង៕