ខេត្តក្រចេះ៖ កម្លាំងនរគបាលប្រឆាំងការជួញដូរមនុស្ស និងការពារអនីតិជននៃស្នងការដ្ឋាននគរបាលខេត្តក្រចេះ នៅរសៀលថ្ងៃទី២១ ខែមករា ឆ្នាំ២០១៩នេះ បានសម្រេចបញ្ជូន ជនសង្ស័យប្រុសស្រីចំនួន៣នាក់ ពាក់ព័ន្ធករណីជួញដូរផ្លូវភេទ (បើកហាងម៉ាស្សាបង្កប់សេវាផ្លូវភេទ) ទៅកាន់សាលាដំបូងខេត្ត ដើម្បីចាត់ការតាមច្បាប់។
ជនសង្ស័យទាំង៣នាក់ ដែលត្រូវសមត្ថកិច្ចជំនាញចាប់បញ្ជូនទៅតុលាការ រួមមាន ទី១-ឈ្មោះអិន ចាន់ដារ៉ា ភេទប្រុស អាយុ៣២ឆ្នាំ រស់នៅឃុំជើងគ្រាវ ស្រុករលាប្អៀ ខេត្តកំពង់ឆ្នាំង ទី២-ឈ្មោះអេង លក្ខិណា ភេទស្រី អាយុ១៧ឆ្នាំ រស់នៅភូមិក្បាលដំរី ឃុំក្រែក ស្រុកពញាក្រែក ខេត្តត្បូងឃ្មុំ និងទី៣-ឈ្មោះឈូក រចនា ភេទស្រី អាយុ១៧ឆ្នាំ រស់នៅភូមិអូរឬស្សី សង្កាត់អូរឬស្សី ក្រុងក្រចេះ។
សមត្ថកិច្ចជំនាញ បានឱ្យដឹងថា ការឃាត់ខ្លួនជនសង្ស័យទាំង៣នាក់ខាងលើ ធ្វើឡើងដោយកម្លាំងនរគបាលប្រឆាំងការជួញដូរមនុស្ស និងការពារអនីតិជននៃស្នងការដ្ឋាននគរបាលខេត្តក្រចេះ ដឹកនាំដោយលោកស្រី នៅ រតនា ស្នងការរង ក្រោមការសម្របសម្រួលពីលោកកែវ សុជាតិ ព្រះរាជអាជ្ញាខេត្តក្រចេះ ដោយប្រតិបត្តិការនេះ ធ្វើឡើងកាលពីថ្ងៃទី១៩ ខែមករា ឆ្នាំ២០១៩ នៅចំណុចផ្ទះកោសជប់ ស្ថិតក្នុងភូមិក្បាលស្នួល ឃុំស្នួល ស្រុកស្នួល។
ប្រភពដដែលបញ្ជាក់ថា ក្រោយពីសមត្ថកិច្ចឃាត់ខ្លួន និងឆែកឆេរ ក៏ដកហូតបានវត្ថុតាងមួយចំនួន រួមមាន ទូរស័ព្ទចំនួន២គ្រឿង ស្រោមអនាម័យប្រើប្រាស់រួចមួយចំនួន និងស្រោមអនាម័យមិនទាន់ប្រើជាច្រើន សម្ភារៈប្រើប្រាស់គ្រឿងញៀនមួយចំនួន។
បច្ចុប្បន្នជនសង្ស័យប្រុសស្រីខាងលើ ត្រូវបានសមត្ថកិច្ចរៀបចំកសាងសំណុំរឿងបញ្ជូនទៅកាន់សាលាដំបូងខេត្តរួចរាល់ហើយ៕