ខេត្តក្រចេះ៖ ករណីប៉ុនប៉ងមនុស្សឃាតនេះ បានកើតឡើងកាលពីថ្ងៃទី២១ ខែមករា ឆ្នាំ២០១៩ នៅចំណុចខាងក្រោយផ្សារដើមឈ្លីច ស្ថិតក្នុងភូមិស្រែស្តៅ សង្កាត់អូរឫស្សី ក្រុងក្រចេះ។
ជនសង្ស័យ មានឈ្មោះខន សុខឃី ហៅធី អាយុ៣៣ឆ្នាំ មុខរបរកម្មករសំណង់ មានលំនៅក្នុងភូមិឃុំកើតហេតុខាងលើ។ ចំណែកស្ត្រីរងគ្រោះ មានឈ្មោះខូយ ស្រីទូច អាយុ៤២ឆ្នាំ មានលំនៅក្នុងភូមិឃុំជាមួយគ្នា។
តាមប្រភពពីកន្លែងកើតហេតុ បានឱ្យដឹងថា នៅមុនពេលកើតហេតុ គេឃើញជនសង្ស័យបានផឹកស្រាស្រវឹងជោកជាំ រួចក៏ដើររករឿង បង្កជម្លោះជាមួយគេឯងពេញភូមិ។ លុះបន្តិចក្រោយមក ជនសង្ស័យក៏បានទៅរករឿងស្ត្រីរងគ្រោះឈ្មោះខូយ ស្រីទូច រហូតផ្ទុះជាជម្លោះតឹងសរសៃកដាក់គ្នា បន្ទាប់មកស្រាប់តែជនសង្ស័យបានស្ទុះទៅទាញស្នមុខ៣ សម្រាប់ចាក់ត្រី យកមកដេញចាក់ទៅលើស្ត្រីរងគ្រោះ ប៉ុន្តែសំណាងល្អ ស្ត្រីរងគ្រោះបានរត់គេចទាន់ ហើយរំពេចនោះ ជនសង្ស័យមិនទាន់អស់ចិត្ត ក៏ព្យាយាមដេញចាក់ស្ត្រីរងគ្រោះថែមទៀត តែត្រូវបានអ្នកជិតខាងជួយចាប់ឃាត់ទាន់ពេលវេលា និងបានរាយការណ៍ប្រាប់កម្លាំងអាវុធហត្ថខេត្តចុះមកឃាត់ខ្លួនជនសង្ស័យតែម្តង។
ក្រោយពីចាប់ឃាត់ខ្លួនជនសង្ស័យខាងលើនាំយកទៅសាកសួរ សមត្ថកិច្ចជំនាញ បានពិនិត្យធ្វើតេស្តឃើញថា ជនសង្ស័យបានប្រើប្រាស់នូវសារធាតុញៀន។
បច្ចុប្បន្នជនសង្ស័យ និងវត្ថុតាង ត្រូវបានឃាត់ខ្លួន និងរក្សាទុកជាបណ្តោះអាសន្ននៅកងរាជអាវុធហត្ថខេត្តក្រចេះ ដើម្បីរៀបចំកសាងសំណុំរឿងបញ្ជូនទៅកាន់សាលាដំបូងខេត្ត ចាត់ការបន្តតាមនីតិវិធី៕