នារីមួយចំនួនមានបញ្ហាស្បែកមុខ រន្ធរោមធំ មិនម៉ដ្ឋរលោង ដែលអ្នកអាចកែបញ្ហានេះបាន។
ក្រៅពីផលិតផលសម្រាប់ថែបំប៉នស្បែក អ្នកអាចកែបញ្ហាស្បែកមុខគ្រើម មិនម៉ដ្ឋរលោងនេះបាន តាមការណែនាំពីអ្នកជំនាញ ដូចខាងក្រោម ៖
១-លាងមុខយ៉ាងទន់ភ្លន់ ៖
អ្នកត្រូវលាងសម្អាតស្បែកមុខ ឲ្យបានស្អាតជាប្រចាំ ដោយទឹកធម្មតា ឬទឹកត្រជាក់ ១ថ្ងៃ ២ដង។
២- ប្រើទឹកជូតសម្អាតស្បែកមុខ ៖
អ្នកត្រូវប្រើទឹកជូតសម្អាតស្បែកមុខ (ថូនឺរ) ជូតស្បែកមុខ ក្រោយពេលលាងមុខរួច ដើម្បីអនាម័យស្បែកមុខ និងបន្តឹងរន្ធរោម ការពារវត្ថុកខ្វក់ស្ទះក្នុងរន្ធរោម។
៣- ស្អំទឹកកក ៖
យកទឹកកក មកស្អំមុខ ជាប្រចាំ រាល់ព្រឹក និងមុនពេលគេង ដោយស្អំម្តងៗ ប្រមាណ ២០-៣០វិនាទី។
៤- ម៉ាសក៍មុខ ៖
អ្នកគួរម៉ាសមុខ ជាប្រចាំ ដើម្បីថែបំប៉ន និងបន្ថែមសំណើមដល់ស្បែកមុខ កាត់បន្ថយការរីកធំរបស់រន្ធរោម ឬរន្ធញើស។
៥- ខាត់ស្បែក ៖
អ្នកគួរខាត់ស្បែក សម្អាតរន្ធរោម ក្នុង ១សប្តាហ៍ ១-២ដង ដើម្បីកម្ចាត់វត្ថុកខ្វក់ដែលកកស្ទះរន្ធរោមនៃស្បែកមុខ និងជម្រុះកោសិកាស្បែកដែលងាប់ខូច ជំរុញឲ្យកោសិកាស្បែកថ្មីលូតលាស់ឡើងមកជំនួស។
៦- ចៀសវាងអាហារខ្លាញ់ ៖
ទទួលទានអាហារដែលមានប្រយោជន៍ ដោយចៀសវាងអាហារមានខ្លាញ់ខ្ពស់ សម្រាក (គេង) ឲ្យបានគ្រប់គ្រាន់ និងកាត់បន្ថយភាពតានតឹង៕