ការថែសម្រស់ ជារឿងចាំបាច់មួយសម្រាប់នារីគ្រប់វ័យ ទាំងការប្រើផលិតផលរក្សាសម្រស់ និងវិធីធម្មជាតិ។ ដោយឡែកវិធីធម្មជាតិ ៧យ៉ាង ខាងក្រោមនេះ អ្នកអាចសាកល្បងជ្រើសប្រើងាយៗដូចខាងក្រោម ដែលមានច្រើនវិធី អ្នកអាចជ្រើសប្រើរូបមន្តមួយណាក៏បាន ដើម្បីថែស្បែកមុខ និងស្បែកក …។
១- រូបមន្តថែបំប៉នស្បែកមុខ ដោយទឹកឃ្មុំ ៖
-លាងមុខឲ្យស្អាត ជូតឲ្យស្ងួត ប្រើចុងម្រាមដៃ ជ្រលក់ទឹកឃ្មុំ យកមកលាបលើមុខ និងក រួចម៉ាស្សាមុខដោយចុងម្រាមដៃ យ៉ាងថ្នមៗ ប្រមាណ ៥នាទី រហូតទឹកឃ្មុំស្អិត ម៉ាស្សាបន្តទៀតលែងកើត ទុកវាមួយស្របក់។
-ដេកសម្រាក ដោយឲ្យផ្នែកក្បាលស្ថិតនៅទាបជាងចុងជើង ដើម្បីឲ្យលោហិតមកចិញ្ចឹមស្បែកមុខ និងក បានល្អឡើង។
-សម្រាកមួយសន្ទុះ សឹមប្រើកន្សែងពោះគោ ជ្រលក់ទឹកសើម យកមកជូតទឹកឃ្មុំចេញ។
២- រូបមន្តថែបំប៉នស្បែកមុខ ដោយផ្លែប៉ោម ៖
-ចិតផ្លែប៉ោម ខ្វេះយកស្នូលនិងគ្រាប់ចេញ រួចកិនឲ្យម៉ដ្ឋ។ ក្នុងពេលកិន ត្រូវដាក់ទឹកឃ្មុំ ចូលទៅផង ។
-នៅពេលកិនចូលគ្នាសព្វល្អហើយ យកមកលាបបំពោកមុខ។
-ទុកចោល ២០នាទី សឹមប្រើទឹកដោះគោស្រស់ ត្រជាក់ៗ មកលាងមុខចេញ រួចលាងសម្អាតដោយទឹកត្រជាក់ មួយសាទៀត។
៣- រូបមន្តថែស្បែកមុខ ដោយឪឡឹក ៖
-ចិតឪឡឹក ជាចំណិតស្តើងៗ យកមកបិទឲ្យពេញផ្ទៃមុខ រួចយកក្រណាត់ស ឬកន្សែងស មកគ្របមុខ។
-គេងសម្រាក ប្រមាណ កន្លះម៉ោង រួចលាងមុខដោយទឹក្រជាក់។
៤- រូបមន្តថែស្បែកមុខ ដោយស៊ុតស ៖
-គោះពងមាន់ ១គ្រាប់ ញែកយកស៊ុតក្រហមចេញ ទុកតែស៊ុតស ចាក់ដាក់ក្នុងកែវ ហើយប្រើសម វាយស៊ុតស ឲ្យឡើងពពុះ។
-យកជក់ទន់ៗ ជ្រលក់ស៊ុតស លាបលើមុខ និងក ឲ្យសព្វ។
– ទុកចោល ប្រមាណ ២០នាទី រហូតស៊ុតស ចាប់ផ្តើមរឹង សឹមលាងចេញដោយទឹកត្រជាក់។
៥- រូបមន្តថែស្បែកមុខ ដោយទឹកក្រូចឆ្មារ និងទឹកឃ្មុំ ៖
-ផ្សំទឹកឃ្មុំ ១ស្លាបព្រាបាយ ជាមួយទឹកក្រូចឆ្មារ ១ស្លាបព្រាកាហ្វេ កូរឲ្យចូលគ្នាសព្វ។
-យកល្បាយខាងលើ មកលាបឲ្យពេញផ្ទៃមុខ និងក។
– ទុកចោល យ៉ាងតិច កន្លះម៉ោង សឹមលាងចេញដោយទឹកក្តៅឧណ្ហៗ។
៦- រូបមន្តថែស្បែកមុខ ដោយប៉េងប៉ោះ ៖
-ហាន់ប៉េងប៉ោះ ជាចំណិតក្រាស់ៗ យកមកមកត្រដុសឲ្យសព្វផ្ទៃមុខ និងក ថ្នមៗ ជាពិសេស បរិវេណដែលមានមុនអង្កាម ឬមុនខ្សាច់ ។
-ប៉េងប៉ោះ មានវីតាមីន សេ (Vitamin C) និងអាស៊ីដ អេអេចអេ (AHA) នឹងជួយបកស្បែកផ្នែកខាងលើដែលងាប់ខូច ឲ្យជ្រុះចេញ។
– ប្រើសំឡី ជ្រលក់ទឹកត្រជាក់ ជូតគ្រាប់ប៉េងប៉ោះចេញ រួចលាងមុខ ដោយទឹកត្រជាក់។
៧- រូបមន្តថែស្បែកមុខ ដោយទឹកដោះគោជូរ ៖
-យកទឹកដោះគោជូរ ដែលក្លាស្សេត្រជាក់ខ្លាំង មកលាបបំពោកមុខ និងក ឲ្យសព្វ។
– ទុកចោល ២០នាទី ឬយូរជាងនេះ រួចប្រើកន្សែងពោះគោ ទន់ៗ ជូតចេញ។
រូបមន្តនេះ ប្រើបានផលល្អណាស់ នៅរដូវក្តៅ នឹងជួយឲ្យស្បែកមុខដែលស្លេកស្លាំង ប្រែពណ៌ជម្ពូ ស្រស់ថ្លា៕