ភ្នំពេញ៖សារ៉ាយ សក្ខណា បានផ្អាកការងារសិល្បៈទាំងស្រុងហើយ ខណៈដែលពេលនេះនាងពពោះកូនទី៣ ជាង៦ខែ នឹងត្រៀមសម្រាលនាអំឡុងខែវិច្ឆិកា ឆ្នាំ២០២៤ ខាងមុខនេះ។សក្ខណា ថាការមានកូន៣នាក់គឺគ្រប់គ្រាន់សម្រាប់រូបនាង ហេតុនេះនាងគ្មានគម្រោងយកកូនទី៤ នោះទេ ។
សារ៉ាយ សក្ខណា បានប្រាប់អ្នកយកព័តមានយើងតាមទូរស័ព្ទកាលពីរសៀលថ្ងៃទី៣១ កក្កដា ថានាងនឹងត្រៀមសម្រាលកូននៅខ្មែរនៅខែ១១ ពោលគឺមិនទៅសម្រាលនៅអាមេរិកនោះទេ ហើយពេលនេះនាងបានផ្អាកការងារសិល្បៈដូចជាការថតភាពយន្ដទាំងស្រុងទៅហើយ ប៉ុន្ដែនៅបន្ដថតស្ពតជាធម្មតា។សារ៉ាយ សក្ខណា ថ្លែងថា”ខ្ញុំនឹងសម្រាលកូននៅខែវិច្ឆិកា ខាងមុខនេះ។ខ្ញុំសម្រាលនៅខ្មែរ អត់ទៅសមម្រាលនៅអាមេរិកទេ ។កូនទី៣នេះជាកូនប្រុស ហើយសម្រាប់ខ្ញុំគិតថាមានកូន៣នាក់នេះគឺគ្រប់គ្រាន់ហើយ ខ្ញុំអត់មានគម្រោងយកកូនទី៤នោះទេ “។
ការអះអាងរបស់សារ៉ាយ សក្ខណា ថាសម្រាលកូននៅខ្មែរនេះខុសពីមិត្តភក្ដិរបស់នាងបង្ហើបប្រាប់ថានាងអាចនឹងហោះទៅសម្រាលកូននៅអាមេរិកដើម្បីកើតភ្លាម បានសញ្ជាតិអាមេរិកភ្លែតតែម្ដង។ប៉ុន្ដែសក្ខណា បញ្ជាក់ច្បាស់ៗថានាងនឹងផ្ដល់កំណើតឲ្យកូនទី៣របស់នាងសម្រាលនៅមន្ទីសម្ភពមួយនៅខ្មែរ មិនមែននៅអាមេរិកដូចកូនទី១និងទី២ឡើយ ។សក្ខណា ថាអំឡុងពេលដែលនាងមានផ្ទៃពោះកាន់តែធំនេះ ក៍គ្មានផលិតកម្មហៅថតរឿងទៀតដែរ ព្រោះគេដឹងថានាងពោះធំ ប៉ុន្ដែនាងនៅតែទទួលធ្វើការងារសិល្បៈខ្លីៗដូចជាការថតស្ពត ។
សារ៉ាយ សក្ខណា មកខ្មែរលើកនេះខុសពីរាល់ដងព្រោះនាងនៅស្រុកកំណើតបានដល់ទៅជាង១ឆ្នាំ ហើយក៍ទទួលបានកូនម្នាក់ទៀត ដែលនេះជាកាដូមិនអាចកាត់ថ្លៃបាន ស្របពេលដែលនាងក៍បានយកកូនទាំងពីរនាក់មកឲ្យរៀនសាលាភាសារខ្មែរក្នុងស្រុកផងដែរ ព្រោះខ្លាចពួកគេនៅអាមេរិកតាំងពីតូចដល់ធំរៀនតែសាលាបរទេសអត់ចេះភាសារខ្មែរ ។ប្រភពបានឲ្យដឹងថាសក្ខណា ត្រូវផ្អាកការងារសិល្បៈយ៉ាងហោចណាស់ក៍៥ខែដែរ ដើម្បីត្រៀមនិងថែរក្សារសុខភាពទាំងមុននិងក្រោយសម្រាលកូនរួច ប៉ុន្ដែនាងមានគ្លីនិកកែសម្ផស្សមួយនៅម្ដុំទួលគោក ហេតុនេះប្រាក់ចំណូលពីមុខជំនួញផ្នែកសម្រស់នោះគឺនៅតែមាន។
គួររំលឹកថាសារ៉ាយ សក្ខណា បានរៀបការជាមួយអាណិកជនខ្មែរមកពីអាមេរិកលោកមេធាវីប៊ុន កែវមេត្រី កាលពីថ្ងៃទី១២ ខែធ្នូ ឆ្នាំ២០១៣ ដែលចំណងស្នេហាជាង១០ឆ្នាំនេះ ទទួលបានចំណងដៃកូន២នាក់គឺកូនស្រីឈ្មោះMataysia អាយុជាង៨ឆ្នាំ និងកូនប្រុសឈ្មោះព្រីនស្ទីន អាយុជា៣ឆ្នាំ ។មុនពពោះកូនប្រុសទី៣នេះសក្ខណា ធ្លាប់ប្រាប់ថានាងចង់បានកូនភ្លោះ ព្រោះចង់បង្កើតម្ដង២ តែពេលនេះលទ្ធផលបានម្ដងតែមួយទេ ហើយនាងពេញចិត្តនឹងទទួលយក ប៉ុន្ដែនាងថាលែងចង់បានកូនថែមទៀតហើយ ។
សារ៉ាយ សក្ខណា ស្ថិតក្នុងចំណោមតារាយកស្វាមីជាបុរសខ្មែរអាមេរិកមានដូចជាអ្នកនាងអម្ពរ ទេវី ,គឹម លក្ខិណា ,វ៉េត រតនា ,សុគន្ធ និសា និងខៀវ សុខារ៉ាវី ជាដើម ប៉ុន្ដែក្នុងចំណោមនោះមានតែរូបនាងនិងអ្នកនាងសុគន្ធ និសា ទេដែលនាំស្វាមីមករស់នៅខ្មែរ ហើយសក្ខណា និងនិសា បន្ដការងារសិល្បៈដូចកាលនៅលីវ ។សក្ខណា និងសុគន្ធ និសា ពេលនេះក៍មានហាងគ្លីនិករក្សារសម្រស់ដូចគ្នាផងដែរ ទើបអ្នកទាំងពីររក្សារបានរូបរាងស្វែល មិនសូវឡើងទម្ងន់ និងបែកសាច់នោះទេ ទើបធ្វើឲ្យតារាទាំងពីរនៅតែមានទីផ្សារការងារសិល្បៈ។
ក្រៅពីសារ៉ាយ សក្ខណា តារាដែលមានកូន៣នាក់ដូចគ្នាគិតត្រឹមឆ្នាំ២០២៤ នេះមានដូចជាអ្នកនាងគង់ សុជាតិ ,លោកព្រាប សុវត្ថិ និងខេមរៈ សិរីមន្ដ ជាដើម ។សម្រាប់សក្ខណា វិញនាងក៍ចង់ឲ្យកូនស្រីច្បង Mataysia បន្ដស្នងតំណែងសិល្បៈពីនាងដែរ ប៉ុន្ដែនាងថានឹងគោរពទៅតាមឆន្ទៈរបស់កូនថាតើចង់សិល្បៈជំនាញផ្សេង ឬរៀនផ្នែកសិល្បៈ នាងនឹងបំពេញបំណងរបស់កូនជានិច្ច ៕
