ភ្នំពេញ ៖ តារាចម្រៀង ឆោម និមល បានមកដល់ស្រុកប្រទេសកម្ពុជា កាលពីខែកុម្ភៈ ដោយដឹកនាំតារា ចម្រៀងក្រុមរបស់នាង ឈ្មោះ «Dengue fever music» (ក្រុមតន្ត្រីគ្រុនឈាម) ច្រៀងសម្ដែងកម្មវិធីមួយ នៅហាងបារាំងមួយ នៅកោះនរា រាជធានីភ្នំពេញ កាលពីថ្ងៃទី២១ ខែមីនា ឆ្នាំ២០២៥ និងនៅទីក្រុងប៉ាតាយ៉ា ប្រ ទេសថៃ កាលពីពេលថ្មីៗនេះ។ និមល ឲ្យដឹងថានៅថ្ងៃបុណ្យចូលឆ្នាំខ្មែរ ខាងមុខនេះ នាងនឹងចេញច្រៀងសម្ដែងជាលើកទី១ សម្រាប់កម្មវិធីអង្គរសង្រ្កាន្ដ នៅខេត្តសៀមរាប រយៈពេល៣ថ្ងៃ ហើយនាងមានអារម្មណ៍រំភើបណាស់ ព្រោះបានជួបសិល្បករធ្លាប់រួមអាជីពជាមួយគ្នា ក្រោយបែកគ្នាជាច្រើនឆ្នាំ ដោយសារតែនាងចេញទៅរស់នៅអាមេរិក រយៈពេលជាង២០ឆ្នាំមកហើយ ។
ក្នុងបទសម្ភាសន៍ផ្ទាល់កាលពីថ្ងៃទី២ ខែមេសា ឆ្នាំ២០២៥ ឆោម និមល ប្រាប់ «នគរធំ » ថា ក្រុមចម្រៀង «Dengue fever music» របស់នាង ធ្លាប់មកចម្រៀងសម្ដែងនៅកម្ពុជា ចំនួន៨ដង មកហើយ ការមកលើកនេះ ក្រោយអាក់ខានតាំងពីឆ្នាំ២០១៧ ។ នាងថា មកស្រុក លើកនេះ បានដឹកនាំក្រុមចម្រៀងរបស់នាង ដែលមានសមាជិកទាំងអស់ ៦នាក់នោះ ច្រៀងនៅកោះនរា នៅហាងបារាំងមួយ ដែលអាចផ្ទុកមនុស្សបានត្រឹមតែ ៥០០នាក់ តែភ្ញៀវទៅកើនដល់ទៅជាង ៨០០នាក់ ព្រោះសំបុត្រលក់ដាច់អស់គ្មានសល់។ និមល ប្រាប់ថា ក្រុមចម្រៀងនាង មានការគាំទ្រច្រើនជាភ្ញៀវបរទេស ដូចជាក្នុងចំណោមភ្ញៀវទាំង ៨០០នាក់នោះ ក្នុងនោះមានភ្ញៀវខ្មែរ តែត្រឹម ២០% ប៉ុណ្ណោះ ។ ចំពោះបទចម្រៀង នាងថាក្រុមនាង ច្រៀងចង្វាក់រ៉ុក អែនរ៉ូល (Rock and Roll) មានដូចជាបទអ្នកស្រី រស់ សេរីសុទ្ធា «ឆ្នាំអូន១៦ » ដែលលាយជាភាសារបរទសពាក់កណ្ដាល។ នាងថាការសម្ដែងនៅប៉ាតាយ៉ា ក៏ក្រុមនាងបានជោគជ័យដែរ ព្រោះមានការគាំទ្រច្រើន ពីភ្ញៀវអន្ដរជាតិ ហើយជាលើកទី១ ដែលនាងបានដឹកនាំក្រុមច្រៀង ចម្រៀងរបស់នាង ទៅសម្ដែងនៅប្រទេសថៃ ។
អ្នកនាងនិមល បានឲ្យដឹងដែរថា ក្រៅពីដឹកនាំក្រុមតន្ត្រីបានជោគជ័យ ទាំងនៅកម្ពុជា និងថៃ ក្រុមចម្រៀងនាងក៏បានជួបជាមួយថ្នាក់ដឹកនាំមួយចំនួនផងដែរ តែពេលនេះ សមាជិក ៥រូបផ្សេងទៀត បានវិលទៅស្រុកគេវិញអស់ហើយ នៅឡើយតែរូបនាង ដែលត្រូវជាប់ច្រៀងសម្ដែង ទាំង៣ថ្ងៃ សម្រាប់ពិធីបុណ្យចូលឆ្នាំខ្មែរ នៅខេត្តសៀមរាប រហូតចប់បុណ្យចូល ទើបនាងត្រូវវិលត្រឡប់ទៅអាមេរិក វិញ ។
ឆោម និមល បានឲ្យដឹងផងដែរថា ក្រុមចម្រៀងគ្រុនឈាម របស់នាង ធ្លាប់បានចេញទៅច្រៀងសម្ដែងទាំងនៅប៉ែកអឺរ៉ុបនិងអាស៊ី ដោយមានគេស្គាល់និងគាំទ្រច្រើន ។ សម្រាប់តំបន់អាស៊ី ក្រុមចម្រៀងនាង បានចេញទៅច្រៀងនៅប្រទេសកម្ពុជា, ឡាវ, ថៃ, វៀតណាម, ឥណ្ឌូនេស៊ី, ហ្វីលីពីន, ជប៉ុន, កូរ៉េ និងហុងកុង ជាដើម ។
ឆោម និមល មានអាយុ៤៥ឆ្នាំហើយ មានស្វាមីជាជនជាតិបរទេស រស់នៅទីក្រុង ឡូសអែនចេលេស (Los Angeles) រដ្ឋ កាលីហ្វ័រញ៉ា (California) សហរដ្ឋអាមេរិក រយៈពេលជាង ២០ឆ្នាំហើយ ។ប៉ុន្ដែនិមល ថាសព្វថ្ងៃនាងគ្មានកូនឡើយ។ និមក ប្រាប់ថា អតីតតារាខ្មែរដែលទៅរស់នៅទីក្រុងជាមួយនាង និងជួបគ្នាពេលមានកម្មវិធីនោះ មានដូចជា លោក យស បូវណ្ណៈ, សុវណ្ណ មុនី និងអ្នកនាងមាស សុម៉ាលី ជាដើម ។
គួររំលឹកថា ឆោម និមល កើតនៅឆ្នាំ១៩៨០ មានឪពុកឈ្មោះ ឆោម ឆន ជាតារាចម្រៀងអាយ៉ៃ និងម្ដាយឈ្មោះអ៊ូច សារិន ជាតារាចម្រៀងអាយ៉ៃដូចគ្នា ។ និមល មានបងប្អូន៥នាក់ (ស្រី៣ ប្រុស២) នាងជាកូនពៅក្នុងគ្រួសារត្រកូល «ឆោម» ល្បីក្នុងអាជីពសិល្បៈ ក្នុងនោះមាន បងស្រី ឆោម ឆវិន និងបងប្រុស លោកឆោម ប៊ុនយ៉ុង (បច្ចុប្បន្នជាព្រះសង្ឃ) និងក្មួយស្រី ឆោម ឆពុំ ។ ឆោម និមល និងបងប្រុសនាង លោកឆោម ប៊ុនយ៉ុង បានជាប់ជ័យលាភីលេខ១ ដូចគ្នា កម្មវិធី «ពានរង្វាន់អប្សរា» ឆ្នាំ១៩៩៧ ហើយអ្នកទាំងពីរ ច្រៀងឆ្លងឆ្លើយគ្នា ល្បីបទ «ថ្ងៃមង្គលយើង» និងបទ «ភ័ព្វសំណាង» ។ ភាពល្បីល្បាញរបស់ឆោម និមល នាពេលនោះ ត្រូវបានព្រះករុណាព្រះបាទសម្តេចព្រះនរោត្តម សីហនុ ព្រះបរមរតនកោដ្ឋ សព្វព្រះទ័យជ្រើសរើសឲ្យសម្ដែងក្នុងខ្សែភាពយន្ដមួយ ដែលមានចំណងជើងថា «ជ្រើសរើសភរិយា ឲ្យសមហេតុផល» ដែលឆោម និមល សម្ដែងជាមួយតួឯកប្រុស លោកយុត្ថារ៉ា ឆាន្នី ។
ឆោម និមល បន្ថែមថា ទោះជានាងទៅរស់នៅស្រុកគេ ជាច្រើនឆ្នាំ តែនាងនឹករលឹកដល់សិល្បកររួមអាជីព និងបងប្អូនខ្មែរជានិច្ច ។ នាងថា ពិតជាសប្បាយចិត្តខ្លាំងដែលបានច្រៀងសម្ដែងនៅអង្គរសង្រ្កាន្ដ ជាលើកដំបូង នៅឆ្នាំនេះ លើទឹកដីខេត្តសៀម ព្រោះលើកទី១ក្នុងអាជីព ដែលនាងបានច្រៀងក្នុងព្រឹត្តិការណ៍សង្រ្កាន្ដ លើទឹកដីមាតុភូមិកម្ពុជា ជាពិសេសនៅទឹកដីសៀមរាប អង្គរ ៕
