សហរដ្ឋអាមេរិក ៖ រដ្ឋបាលលោកប្រធានាធិបតី ដូណាល់ ត្រាំ (Donald Trump) បានប្រកាសពីផែនការយកពន្ធរហូតដល់ ៣៥២១% លើឧបករណ៍ថាមពលពន្លឺព្រះអាទិត្យ (សូឡា) ដែលនាំចូលពីប្រទេសអាស៊ាន ចំនួន៤ រួមទាំងប្រទេសកម្ពុជា ផងដែរ។
តាមប្រភពទីភ្នាក់ងារព័ត៌មាន BBC បានរាយការណ៍នៅថ្ងៃទី២៣ ខែមេសា ឆ្នាំ២០២៥ ថា ក្រសួងពាណិជ្ជកម្មសហរដ្ឋអាមេរិក បានប្រកាសពីគម្រោងដំឡើងពន្ធលើផ្ទាំងសូឡា ដែលនាំចូលពីក្រុមហ៊ុនក្នុងប្រទេសចំនួន៤ ក្នុងតំបន់អាស៊ីអាគ្នេយ៍ គឺថៃ កម្ពុជា ម៉ាឡេស៊ី និងវៀតណាម ក្នុងអត្រាខ្ពស់បំផុត ៣៥២១% ។
ការផ្លាស់ប្តូរនេះ កើតឡើងបន្ទាប់ពីក្រុមហ៊ុនផលិតឧបករណ៍ថាមពលពន្លឺព្រះអាទិត្យធំៗ ជាច្រើន កាលពីឆ្នាំមុន ពួកគេបានអំពាវនាវឱ្យរដ្ឋបាលប្រធានាធិបតី ចូ បៃដិន (Joe Biden) ការពារអាជីវកម្មរបស់ពួកគេ នៅក្នុងស ហរដ្ឋអាមេរិក បណ្ដាលឲ្យក្រសួងពាណិជ្ជកម្ម ចាប់ផ្ដើមស៊ើបអង្កេតរកការពិត។
ក្រុមហ៊ុននាំចេញឧបករណ៍សូឡារបស់កម្ពុជា មួយចំនួន នឹងប្រឈមនឹងការយកពន្ធរហូតដល់ទៅ ៣៥២១% ដោយសារការស៊ើបអង្កេតរបស់ក្រសួងពាណិជ្ជកម្មសហរដ្ឋអាមេរិក បានរកឃើញថា ផលិតផលផ្ទាំងសូឡាដែលនាំចូលសហរដ្ឋអាមេរិក មួយចំនួនផលិតដោយក្រុមហ៊ុនចិន ។
ប្រភពដដែល ឲ្យដឹងបន្តថា ក្នុងរយៈពេលប៉ុន្មានឆ្នាំចុងក្រោយនេះ ក្រុមហ៊ុនចិន ជាច្រើន កំពុងផ្លាស់ប្តូរផលិតកម្មទៅកាន់ប្រទេសអាស៊ីអាគ្នេយ៍ ដើម្បីចៀសវាងការយកពន្ធនាំចូលនៅសហរដ្ឋអាមេរិក ដែលត្រូវបានអនុវត្តចាប់តាំងពីអាណត្តិដំបូងរបស់លោកប្រធានាធិបតី ដូណាល់ ត្រាំ (Donald Trump)។
នៅឆ្នាំ២០២៣ សហរដ្ឋអាមេរិក បាននាំចូលឧបករណ៍សូឡា ពីប្រទេសថៃ កម្ពុជា ម៉ាឡេស៊ី និងវៀតណាម ដែលមានតម្លៃសរុប ១២ពាន់លានដុល្លារ៕