ភ្នំពេញ ៖ ជនសង្ស័យ២នាក់ បានធ្វើសកម្មភាពលួចកាច់កញ្ចក់រថយន្តបានសម្រេច បំរុងជិះយកទៅលក់ ត្រូវបានកម្លាំងសមត្ថកិច្ចប៉ុស្តិ៍ទំនប់ទឹក ល្បាតឃើញក៍ឃាត់ខ្លួនយកទៅសាកសួរកាលពីវេលាម៉ោង១និង២០នាទីរំលងអាធ្រាត្រ ឈានចូលថ្ងៃទី៥ ខែធ្នូ ឆ្នាំ២០១៧ នៅជិតស្ពានអាកាសស្ទឹងមានជ័យ ផ្លូវព្រះមុនីរ៉េត សង្កាត់ទំនប់ទឹក ខណ្ឌចំការមន។
ជនសង្ស័យមានឈ្មោះ អាត រតនៈ ភេទប្រុស អាយុ៣៥ឆ្នាំ ស្នាក់នៅផ្ទះលេខ២៣E1 ផ្លូវ៣៨៨ក្រុម៣៤ សង្កាត់ទួលស្វាយព្រៃ១ ខណ្ឌចំការមន និងម្នាក់ទៀតមានឈ្មោះ អ៊ូ ចាន់វី ភេទប្រុសអាយុ៣៥ឆ្នាំ ស្នាក់នៅមិនពិតប្រាកដ មានស្រុកកំណើតនៅភូមិអូរឬស្សី ឃុំរកាកណ្តាល ស្រុកក្រចេះ ខេត្តក្រចេះ ដកហូតម៉ូតូម៉ាកស៊ុយស៊ូគីស្មាស រ៉េវ៉ូ ពណ៌ខ្មៅ ពាក់ស្លាកលេខភ្នំពេញ 1I-6784 និងកញ្ចក់រថយន្តម៉ាក Lexus RX330 មួយគូ។
តាមសម្តីលោកមេប៉ុស្តិ៍ទំនប់ទឹក បានឲ្យដឹងថា មុននិងឈានដល់ការឃាត់ខ្លួនជនសង្ស័យទាំង២នាក់នេះបាន គឺកម្លាំងសមត្ថកិច្ចរបស់លោកបានធ្វើការល្បាតក្នុងមូលដ្ឋាន ដើម្បីទប់ស្កាត់បទល្មើសផ្សេងៗ និងការពារសុវត្តិភាពជូនប្រជាពលរដ្ឋ ខណៈពេលនោះស្រាប់តែប្រទះឃើញបុរស២នាក់ខាងលើ ដែលជាជនសង្ស័យកំពុងតែជិះម៉ូតូធ្វើដំណើរតាមផ្លូវ ដោយមានការសង្ស័យកម្លាំងសមត្ថកិច្ចបានសុំធ្វើការត្រូវពិនិត្យ ក៍ស្រាប់តែឃើញកញ្ចក់រថយន្តមួយគូ ក៍បានយកទៅសាកសួរនៅប៉ុស្តិ៍នគរបាលទំនប់ទឹក ។
នៅចំពោះមុខសមត្ថកិច្ច ជនសង្ស័យទាំង២នាក់បានសារភាពថា ពួកគេពិតជាបានធ្វើសកម្មភាពកញ្ចក់រថយន្តរបស់គេមួយគ្រឿង ម៉ាក Lexus RX330 នៅម្តុំផ្ទះល្វែង ជិតផ្សារទំនើបសុវណ្ណាសង្កាត់ទំនប់ទឹក ខណ្ឌចំការមន នៅដែលកាច់បានហើយ ពួកគេបំរុងយកទៅលក់នៅម្តុំផ្សារតូច ក៍ត្រូវសមត្ថកិច្ចឃាត់ខ្លួនបានតែម្តងទៅ។ ជនសង្ស័យទាំងនោះបានបន្តទៀតថា ពួកគេធ្លាប់ធ្វើសកម្មភាពកាច់កញ្ចក់រថយន្តបានចំនួន២ដងរួចមកហើយ។
ក្រោយពេលកើតហេតុ ជនសង្ស័យត្រូវបានសមត្ថកិច្ចកសាងសំណុំរឿងបញ្ជូនទៅអធិការដ្ឋានខណ្ឌចំការមន ឃុំខ្លួនបណ្តោះអាសន្នសិន រង់ចាំម្ចាស់រថយន្តមកដាក់ពាក្យបណ្តឹង ទើបចាត់ការតាមនីតិវិធី ៕
