ភ្នំពេញ ៖ យុវជន២នាក់ចេញពីផឹកស៊ីវិញបានជិះម៉ូតូលឿនពេកខ្លាចបុករថយន្តនៅខាងមុខបានចាប់ហ្វ្រាំងម៉ូតូទាំងបង្ខំបណ្ដាលឲ្យដួលម៉ូតូ ចូលទៅក្នុងរថយន្តមិនចាំម៉ាកមួយគ្រឿង ធ្វើអោយបើករយះមុខដូចគេកាប់មួយពូថៅស្លាប់នៅនិងកន្លែង ចំនែកអ្នកអង្គុយខាងក្រោយរងរបួសបែកក្បាល ហេតុការណ៍នេះកើតឡើងនៅវេលាម៉ោង១២និង១៥នាទីរំលងអាធ្រាត្រឈានចូល ថ្ងៃទី១៦ ខែមករា ឆ្នាំ២០១៧ទុលមុខនិងបុរីចំការមន ផ្លូវព្រះនរោត្ដម សង្កាត់ទន្លេបាសាក់ខណ្ឌចំការមន ។
ជនរងគ្រោះរងរបួសធ្ងន់ឈ្មោះនួន អ៊ូប៉ៃ ភេទប្រុស អាយុ១៩ឆ្នាំ មុខរបរកម្មករ ស្នាក់នៅផ្ទះ១៧៥៣ផ្លូវជាតិលេខ២ ភូមិព្រែកតាឡុង សង្កាត់ចាក់អង្រែក្រោម ខណ្ឌមានជ័យ ។
សពជនរងគ្រោះមានឈ្មោះ ដន់ ភេទប្រុស អាយុ១៩ឆ្នាំមុខរបរសិស្ស ស្នាក់នៅភូមិទួលរកា សង្កាត់ចាក់អង្រែក្រោម ខណ្ឌមានជ័យ ។
តាមសំដីបុរសដែលរងរបួសបែកក្បាលបាននិយាយថាពួកគេទើបនិងចេញពីដើរលេងនៅកោះពេជ្រវិញគោលបំណងត្រលប់ទៅផ្ទះវិញនៅម្តុំចាក់អង្រែក្រោម ដោយបានជិះម៉ូតូធំម៉ាកKAWSAKI ពណ៌សរ ពាក់ស្លាកលេខ ភ្នំពេញ 1FK 9990បានធ្វើដំនើរតាមផ្លូវព្រះនរោត្ដម ក្នុងទិសដៅពីជើងទៅត្បូងក្នុងល្បឿនលឿននិងស្រវឹងផងនោះ ខណៈមកដល់ចំនុចកើតហេតុ អ្នកបើកលឿនពេក រួចហើយខ្លាចជ្រុលទៅបុកនិងរថយន្តដែលនៅខាងមុខ ទើបចាប់ហ្វ្រាំងទាំងបង្ខំទើបបណ្ដាលអោយដួលម៉ូតូចូលទៅក្រោមរថយន្តដឹកដីមួយគ្រឿងមិនចាំម៉ាកនិងពណ៌ ដែលធ្វើដំណើរស្របទិសគ្នា ធ្វើអ្នកបើកម៉ូតូផ្ទុបមុខទៅចំដែករថយន្តពីក្រោយ បណ្ដាលឲ្យរយះដូចគេកាប់មួយពូថៅហូរឈាមស្លាប់គួរឲ្យអនោចអធម័នៅនិងកន្លែងកើតហេតុតែម្តង ។ចំនែកបុរសអង្គុយខាងក្រោយរងរបួសបែកក្បាលខាងក្រោយហូរឈាម ត្រូវបានរថយន្តសង្គ្រោះដឹកយកទៅសង្គ្រោះនៅគ្លីនិកឯកជន សុខលាភមេត្រី ។ ភ្លាមៗនោះដែលរថយន្តដឹកដីបានបន្ថែមល្បឿនបើករត់គេខ្លួនបាត់ស្រមោល ។
ក្រោយពេលកើតហេតុសពជនរងគ្រោះត្រូវសមត្ថកិច្ចធ្វើកំណត់ហេតុរួចបានរថយន្តដឹកសពដឹកយកទៅតម្កល់នៅវត្តតាំងកសាងដើម្បីអោយសាច់ញាតិមកទទួលយកទៅធ្វើបុណ្យ ដោយឡែកម៉ូតូត្រូវបានសមត្ថកិច្ចយកទៅរក្សាទុកនៅអធិការដ្ធានខណ្ឌចំការដើម្បីប្រគល់អោយក្រុមគ្រួសារសាច់ញាតិរបស់ជនរងគ្រោះវិញ ៕
ណនរ៉ាត់