ភ្នំពេញ ៖ ជនសង្ស័យម្នាក់ក្នុងចំណោមបក្ខពួក២នាក់ ត្រូវបានកម្លាំងព្រហ្មទណ្ឌខណ្ឌចំការមន ឃាត់ខ្លួនយកទៅធ្វើការសាកសួរ បន្ទាប់ពីជនសង្ស័យរូបនោះបានធ្វើសកម្មភាពឆក់យកកាបូបស្ពាយពីជនរងគ្រោះម្នាក់មិនបានសម្រេច។ ហេតុការណ៍នេះបានកើតឡើងនៅវេលាម៉ោង ៩និង៤៥នាទីយប់ ថ្ងៃទី១០ ខែកញ្ញា ឆ្នាំ២០១៧ ជិតអាគារ៤២ជាន់ សង្កាត់បឹងកេងកង១ ខណ្ឌចំការមន ហើយឃាត់ខ្លួនបាននៅផ្លូវម៉ៅសេទុង ជិតនិងស្ថានីយប្រេងឥន្ធនៈកាល់តិច សង្កាត់បឹងកេងកង១ ខណ្ឌចំការមន។
ជនសង្ស័យមានឈ្មោះ សុខ វិសាល ភេទប្រុស អាយុ១៨ឆ្នាំ មុខរបរមិនពិតប្រកដ ស្នាក់នៅផ្ទះជួល សង្កាត់បឹងកេងកង១ ខណ្ឌចំការមន ដកហូតម៉ូតូម៉ាកឌ្រីមសង់ ស៊េរីឆ្នាំ២០១០ ពណ៌ខ្មៅ ពាក់ស្លាក់លេខស្វាយរៀង 1C-8733។
តាមសម្តីសមត្ថកិច្ចខណ្ឌចំការមន បានឲ្យដឹងថា មុនពេលកើតហេតុមានជនរងគ្រោះម្នាក់បានជិះម៉ូតូកង់បីតាមមហាវិថីព្រះមុនីវង្ស ក្នុងទិសដៅពីជើងទៅត្បូង ខណៈនោះស្រាប់តែមានជនសង្ស័យ២នាក់បានជិះម៉ូតូម៉ាក់ឌ្រីមសង់ ស៊េរីឆ្នាំ២០១០ ពណ៌ខ្មៅមួយគ្រឿង បានធ្វើដំណើរតាមផ្លូវមកពីក្រោយ រួចជនសង្ស័យទាំងនោះបានធ្វើសកម្មភាពឆក់យកកាបូបស្ពាយពីនារីរងគ្រោះម្នាក់ដែលកំពុងជិះម៉ូតូកង់បី តែមិនបានសម្រេច ហើយស្របពេលនោះដែរ ជនរងគ្រោះបានស្រែកថាចោរៗ ផ្អើលដល់ប្រជាពលរដ្ធដែលធ្វើដំណើរតាមផ្លូវ ហើយគាប់ជួនពេលនោះដែរកម្លាំងព្រហ្មទណ្ឌខណ្ឌចំការមន និងកម្លាំងអន្តរាគមន៍ខណ្ឌ បានល្បាតឆ្លងកាត់ទីនោះ ឃើញហេតុការណ៍ផ្ទាល់ភ្នែក ក៍បានដេញតាមជនសង្ស័យទាំង២នាក់នោះ រហូតដល់ផ្លូវម៉ៅសេទុង ទល់មុខស្ថានីយប្រេងឥន្ធនៈកាល់តិច ស្រាប់តែជនសង្ស័យដួលម៉ូតូ ទើបកម្លាំងសមត្ថកិច្ចឃាត់ខ្លួនជនសង្ស័យម្នាក់ជាអ្នកធ្វើសកម្មភាព ចំណែកអ្នកបើកម៉ូតូបានរត់គេចខ្លួនបាត់ ។
ចំណែកជនសង្ស័យដែលឃាត់ខ្លួនបាន ត្រូវបានសមត្ថកិច្ចនាំខ្លួនយកទៅសាកសួរនៅអធិការដ្ធានខណ្ឌចំការមន។ នៅចំពោះមុខសមត្ថកិច្ចជនសង្ស័យរូបនោះបានសារភាពថា ពួកគេពិតជាបានធ្វើសកម្មភាពឆក់យកការបូបស្ពាយពីនារីរងគ្រោះម្នាក់ដែលជិះម៉ូតូកង់បី ពិតប្រាកដមែន តែពេលធ្វើសកម្មភាពឆក់មិនបានសម្រេច ក៍ត្រូវសមត្ថកិច្ចឃាត់ខ្លួនបានតែម្តង។
ប្រភពដដែលបានបន្តទៀតថា នៅពេលដែលពួកគេធ្វើសកម្មភាពឆក់ គឺពួកគេមានគ្នាបីនាក់បានជិះម៉ូតូ២គ្រឿង ដោយមួយគ្រឿងម៉ាកស៊ុយសុគីនិច និងមួយគ្រឿងទៀតម៉ាកឌ្រីមសង់ហើយពួកគេធ្លាប់ធ្វើសកម្មភាពឆក់ចំនួន១០ដង់រួចមកហើយ ។ ក្រោយពេលកើតហេតុ ជនរងគ្រោះមិនបានមកដាក់ពាក្យបណ្តឹងនោះទេ ចំណែកជនសង្ស័យវិញ យោងតាមសម្តីសារភាព ត្រូវបានសមត្ថកិច្ចកសាងសំណុំរឿង រួចឃុំខ្លួននៅអធិការដ្ធានខណ្ឌចំការមន ដើម្បីបញ្ជួុនទៅតុលាការ៕