ភ្នំពេញ ៖ យុវជន២នាក់ជិះម៉ូតូលឿនពេក ប្រញាប់ទៅជក់ថ្នាំញៀន បានទាក់ដៃចង្កូតជាមួយម៉ូតូមួយគ្រឿងទៀត ដួលបម្រុងលើកម៉ូតូរត់ ត្រូវសមត្ថកិច្ចជួយលើក ស្រាប់តែជ្រុះថ្នាំញៀនប្រភេទម៉ាទឹកកកចំនួន២កញ្ចប់តូច ត្រូវសមត្ថកិច្ចឃាត់ខ្លួន កាលពីវេលាម៉ោង១១យប់ថ្ងៃទី១២ ខែកញ្ញា តាមបណ្តោយផ្លូវព្រះសុរាម្រិត នៅចំណុចវិមានឯករាជ្យ ស្ថិតនៅក្នុងសង្កាត់ចតុមុខ ខណ្ឌដូនពេញ។
ជនសង្ស័យទី១ មានឈ្មោះផាន់ វណ្ណះ ភេទប្រុស អាយុ២០ឆ្នាំ មុខរបរធ្វើការរោងចក្រ ស្នាក់នៅមិនពិតប្រាកដ ។ ជនសង្ស័យទី២ មានឈ្មោះឌី ភេទប្រុស អាយុ១៨ឆ្នាំ មុខរបរធ្វើការរោងចក្រ ស្នាក់នៅសង្កាត់ចោមចៅ ខណ្ឌពោធិ៍សែនជ័យ។
សាក្សីដែលឃើញហេតុការណ៍បានឲ្យដឹងថា មុនពេលកើតហេតុគេបានឃើញយុវជន២នាក់ ជិះម៉ូតូម៉ាកហុងស្តុបពី ពណ៌ស ពាក់ស្លាកលេខភ្នំពេញ 1AY-6777 ធ្វើដំណើរមកតាមបណ្តោយផ្លូវព្រះសុរាម្រិត ក្នុងទិសដៅពីកើតទៅលិចក្នុងល្បឿនយ៉ាងលឿន ខណៈពេលមកដល់ចំណុចកើតហេតុក៏ស្រាប់តែទាក់ដៃចង្កូតម៉ូតូម្ខាងទៀត មិនចាំម៉ាក បណ្តាលឲ្យដួលខ្លួនឯង ត្រូវសមត្ថកិច្ចចរាចរណ៍ប្រចាំគោលដៅនោះ ជួយលើកម៉ូតូ ក៏ស្រាប់តែជ្រុះថ្នាំញៀនប្រភេទម៉ាទឹកកកចំនួន២កញ្ចប់ ត្រូវសមត្ថកិច្ចមូលដ្ឋានឃាត់ខ្លួនយកទៅអធិការដ្ឋានខណ្ឌដូនពេញ ដើម្បីសួរនាំ។
ក្រោយពេលទៅដល់ខណ្ឌ ជនសង្ស័យ២នាក់នោះ បានប្រាប់សមត្ថកិច្ចថា ខ្លួនទិញថ្នាំញៀននេះមកពីប្លុកបឹងកក់ ក្នុងមួយកញ្ចប់ តម្លៃ២ម៉ឺនរៀល ដើម្បីយកទៅប្រើប្រាស់តែប៉ុណ្ណោះ។
ក្រោយពេលកើតហេតុជនសង្ស័យទាំង២នាក់ ត្រូវសមត្ថកិច្ចកសាងសំណុំរឿងបញ្ចូនទៅកាន់តុលាការ ដើម្បីចាត់ការទៅតាមនីតិវិធី៕