ភ្នំពេញ ៖ យុវជនពីរនាក់ជិះម៉ូតូមួយគ្រឿង ទៅទិញប្រហិតចៀន បានជួបនារីម្នាក់កំពុងតែទិញដែរ ក៏បាននិយាយញ៉ែញ៉ងពីរបីម៉ាត់ បែរជានារីរូបនេះជិះម៉ូតូទៅហៅបក្សពួកប្រុសៗប្រាំនាក់មកដេញវាយ បណ្តាលឲ្យយុវជនទាំងពីររត់ចូលទឹកទន្លេម្នាក់ និងម្នាក់ទៀតរត់ចោលម៉ូតូបាតជើងសព្រាត ហេតុការណ៍នេះកើតហេតុឡើងកាលពីវេលាម៉ោង១១យប់ ថ្ងៃទី២០ ខែតុលា ឆ្នាំ២០១៧ ត្រង់ចំណុចខាងត្បូង ប៉ុស្តិ៍នគរបាលរដ្ឋបាលជ្រោយចង្វារ ៥០០ម៉ែត្រ តាមបណ្តោយផ្លូវជាប់មាត់ទន្លេត្រើយខាងកើត ស្ថិតក្នុងសង្កាត់ជ្រោយចង្វារ ខណ្ឌជ្រោយចង្វារ។
បើតាមសម្តីពីយុវជនរងគ្រោះទាំងពីរនាក់បានរៀបរាប់ប្រាប់ឲ្យដឹងថា នៅមុនពេលកើតហេតុរូបគេទាំងពីរនាក់បានជិះម៉ូតូមួយគ្រឿង ម៉ាកធូដេ ពណ៌ក្រហម ពាក់ស្លាកលេខភ្នំពេញ ១GA-5687 មកទិញប្រហិតចៀននៅត្រង់ចំណុចកើតហេតុខាងលើ ហើយក៏បានជួបនារីម្នាក់ដែលកំពុងតែទិញប្រហិតចៀននៅកន្លែងកើតហេតុដែរ ។ ខណៈពេលនោះយុវជនរងគ្រោះទាំងពីរនាក់បានសួរទៅនារីរូបនោះថា អូនទិញអីគេ ស្រាប់តែនារីរូបនោះបានឆ្លើយមកវិញថា ពួកហ៊ែងចាំមើលទៅ រួចហើយនាងបានជិះម៉ូតូចេញទៅបាត់ ស្រាប់តែមួយសន្ទុះក្រោយមកក៏មានយុវជនបង្កមួយក្រុម មានគ្នាប្រាំនាក់ ជិះម៉ូតូពីរគ្រឿង មិនចាំម៉ាក បានជិះមកឈប់ក្បែរយុវជនរងគ្រោះ ហើយក៏សួរទៅយុវជនរងគ្រោះថា មិញពួកហ៊ែងនិយាយស្អី ភ្លាមៗនោះជនបង្កទាំងប្រាំនាក់បានធ្វើសកម្មភាពវាយទៅលើយុវជនរងគ្រោះ បណ្តាលឲ្យយុវជនរងគ្រោះម្នាក់ភ័យរត់ទៅលោតចូលទឹកទន្លេ រីឯម្នាក់ទៀតរត់ចោលម៉ូតូបាតជើងសព្រាត ។ បន្ទាប់មកយុវជនបង្កទាំងនោះបានលើជិះម៉ូតូរត់គេចខ្លួនបាត់ស្រមោល។
ក្រោយពេលកើតហេតុសមត្ថកិចមូលដ្ឋានបានចុះមកដល់ចំណុចកើតហេតុ ហើយបាននាំយុវជនរងគ្រោះទាំងពីរនាក់ទៅសួរនាំ និងដាក់ពាក្យបណ្តឹងនៅប៉ុស្តិ៍នគរបាលរដ្ឋបាលជ្រោយចង្វា៕