ភ្នំពេញ ៖ ក្រោយពីមានករណីម្ចាស់ពិធីមង្គលការមួយបានជួលក្រុមបម្រើភេសជ្ជៈភ្ញៀវ ដែលក្រុមហ៊ុន ”វឌ្ឍនៈពិធីការ” មកឲ្យបម្រើក្នុងពិធីមង្គលការ ប៉ុន្តែដូចជួលឱ្យមកលួចស្រាបៀរជាប្រព័ន្ធ សរុបអស់ស្រាបៀរ ABC ច្រើនកេសរួចមក ថៅកែក្រុមហ៊ុនវឌ្ឍនៈពិធីការ បានចេញមុខបកស្រាយបំភ្លឺ។
យោងតាមលិខិតបំភ្លឺរបស់លោក អ៊ង ផល្លី ប្រធានក្រុមហ៊ុន “វឌ្ឍនៈពិធីការ” បានឲ្យដឹងថា កាលពីថ្ងៃទី៣០ តុលា កន្លងមក លោក បានទទួលពិធីមង្គលការរបស់ភ្ញៀវមួយ នៅក្នុងភូមិព្រៃកី សង្កាត់ភ្លើងឆេះរទេះ ខណ្ឌពោធិសែនជ័យ រាជធានីភ្នំពេញ ។ ម្ចាស់កម្មវិធីបានជួលក្រុម ”វឌ្ឍនៈពិធីការ” ចំនួន១៩នាក់ ឲ្យមកបម្រើការងារ ក្នុងពិធីមង្គលការ។ ហើយក្រុមហ៊ុនក៏បានជ្រើសរើសបុគ្គលិកចំនួន១៩នាក់ តាមសំណើរបស់ភ្ញៀវដែលមកជួលនោះ។ ក្នុងចំណោមបុគ្គលិកទាំង១៩នាក់ មានម្នាក់ជាអ្នកគ្រប់គ្រងស្តុកភេសជ្ជៈ ពិធីការទទួលភ្ញៀវ៥នាក់ អ្នកម្រើភេសជ្ជៈ៥នាក់ និងបុគ្គលិកបម្រើទឹកកក៨នាក់ ។
ក្នុងលិខិតបំភ្លឺរបស់លោកអ៊ង ផល្លី បានរៀបរាប់ថា ពេលដែលចាប់ផ្តើមធ្វើការ បានរាប់ចំនួនបុគ្គលិកម្តងទៀត ស្រាប់តែឃើញលើស២នាក់ ដែលសរុបមានគ្នាទៅដល់២១នាក់ឯណោះ ។ ហើយមនុស្ស២នាក់នោះ បានពាក់អាវបន្លំ (ឡូហ្គោចាស់) ដូចបុគ្គលិក “វឌ្ឍនៈពិធីការ” ដែរ ហើយអ្នកដែលបន្លំខ្លួននោះជាមនុស្សស្គាល់គ្នា ដែលក្នុងនោះមានបុគ្គលិករបស់លោកម្នាក់ បានគប់គិតគ្នាជាមួយជនបន្លំទាំង២នាក់នោះ ហើយក្រោយពេលដែលមានបញ្ហាកើតឡើង ជនទាំង២នាក់នោះ បានគេចខ្លួនបាត់ទៅ ។
ទោះជាយ៉ាងណា ថៅកែក្រុមហ៊ុន “វឌ្ឍនៈពិធីការ” ទទួលស្គាល់ថា បុគ្គលិកម្នាក់កាន់ស្តុកភេសជ្ជៈ ឈ្មោះ រឿន ផាន់ណា ភេទប្រុស អាយុ១៩ឆ្នាំ ពិតជាបានចូលដៃចូលជើងលួចមែន។ បុគ្គលិកម្នាក់នេះទើបតែចូលបម្រើការបានមួយរយៈខ្លី ហើយតំណាងក្រុមហ៊ុនក៏បានដាក់ពាក្យប្តឹងទៅលើបុគ្គលនោះរួចហើយដែរ។
ចំណែកឯស្រាបៀរ ABC ដែលថាបុគ្គលិករបស់លោកលួចនោះ មិនដល់ចំនួន២០កេសទេ មានតែស្រាបៀរ ABC សរុបទៅចំនួន៧៤កំប៉ុង (ស្មើរនឹង៣កេស និង០២កំប៉ុង) និងស្រាបៀរថៃហ្គើរ ចំនួន១កេសតែប៉ុណ្ណោះ ហើយក្រុមហ៊ុនរបស់លោកមិនប្រកែកឡើយ ក៏បានសងទៅម្ចាស់ពិធីមង្គលការទាំងអស់ហើយដែរ។
ទោះជាយ៉ាងណា ប្រធានក្រុមហ៊ុនខាងលើបានទទួលស្គាល់ថា នេះជាកំហុសមួយរបស់ក្រុមហ៊ុនមួយ ហើយអ្វីដែលសោកស្តាយនោះ គឺជ្រើសរើសបុគ្គលិកមកចំមនុស្សខូច មិនស្មោះត្រង់ ហើយគ្រប់គ្រងមិនច្បាស់លាស់ និងមេការម្នាក់ទៀត មិនបានដើរត្រួតពិនិត្យគ្រប់កន្លែងក្នុងពិធីការនោះថែមទៀត ។
ជាចុងក្រោយ លោក អ៊ង ផល្លី ក៏បានសុំអភ័យទោសចំពោះម្ចាស់កម្មវិធីមង្គលការខាងលើ ដែលបុគ្គលិករបស់លោកបានបង្កបញ្ហា ហើយក្រុមហ៊ុននឹងកែប្រែការផ្តល់សេវាជូនដល់អតិថិជនឲ្យល្អថែមទៀត ហើយសន្យាថាមិនឲ្យមានករណីបែបនេះកើតមានឡើងលើកទី២ តទៅទៀតទេ និងសុំឲ្យអតិថិជនបន្តគាំទ្រក្រុមហ៊ុន “វឌ្ឍនៈពិធីការ” តទៅទៀត ។
គួររំលឹកថា កាលពីវេលាម៉ោង៩យប់ ថ្ងៃទី៣០ ខែតុលា ឆ្នាំ២០១៧ មានករណីភ្ញាក់ផ្អើលមួយ ដោយម្ចាស់ដើមការដែលមានទីតាំងនៅភូមិព្រៃកី សង្កាត់ភ្លើងឆេះរទេះ ខណ្ឌពោធិ៍សែនជ័យ រាជធានីភ្នំពេញ បានជួលក្រុមបុគ្គលិកក្រុមហ៊ុនពិធីការ “វឌ្ឍនៈពិធីការ” មកបម្រើភ្ញៀវ តែបែរជាដូចឲ្យមកលួចស្រាបៀរ ABC អស់២០កេស ហើយត្រូវបានរកឃើញភស្តុតាង កាបូបដាក់ស្រាបៀរដែលមានជនសង្ស័យទុកចោលនៅខាងក្រោយផ្ទះម្ចាស់ដើការ ៕