ភ្នំពេញ ៖ បុរសជនជាតិចិន ២នាក់ មិនដឹងថាមានរឿងអ្វីនោះទេ បានបើករថយន្តដេញបុកគ្នាប្រសាចពេញផ្លូវ និងធ្វើឲ្យរថយន្តរេចង្កូតជ្រុលទៅបុកម៉ូតូមួយគ្រឿង ដែលជិះស្របទិសគ្នាចំពីក្រោយពេញទំហឹង រុញផ្ទប់ឡើងលើចិញ្ចើមផ្លូវ ជ្រុលទៅបុកបង្គោលថ្ម និងដើមត្របែកព្រៃនៅមុខស្ថានទូតវៀតណាម បាក់អស់១ថែមទៀត ទើបកល់រថយន្តទៅមុខលែងរួច តែសំណាងល្អមនុស្សរងរបួសតិចតួច ហេតុការណ៍នេះបានកើតឡើងនៅវេលាម៉ោង១០និង៣០នាទីយប់ ថ្ងៃទី២៤ ខែធ្នូ ឆ្នាំ២០១៧ ទុលមុខស្ថានទូតវៀតណាម ផ្លូវព្រះមុនីវង្ស សង្កាត់ទន្លេបាសាក់ ខណ្ឌចំការមន ។
យោងតាមសម្តីអ្នកឃើញហេតុការណ៍បានឲ្យដឹងថា នៅមុនពេលកើតហេតុ គេបានឃើញរថយន្ត២គ្រឿង បើកប្រដេញគ្នា តាមផ្លូវព្រះមុនីវង្ស ក្នុងទិសដៅពីត្បូងទៅជើង មិនដឹងថាមានរឿងអ្វីនោះទេ មួយគ្រឿងម៉ាកតូយ៉ូតាព្រូស ពាក់ស្លាកលេខភ្នំពេញ 2AM-3410 ជិះគ្នា២នាក់ ជាជនជាតិចិន និងមួយគ្រឿងទៀត ម៉ាកកាមេរីបាឡែន មិនចាំស្លាកលេខ ខណៈមកដល់ចំណុចកើតហេតុ ស្រាប់តែរថយន្តកាមរីបាឡែន បានបើកបំបុកគូថរថយន្តតូយ៉ូតាព្រូស ដែលកំពុងបើកដោយជនជាតិចិន ពេញទំហឹង និងធ្វើឲ្យរថយន្តព្រូសរេចង្កូតជ្រុលទៅបុកម៉ូតូ ម៉ាកអាខុនពណ៌ស ពាក់ស្លាកលេខភ្នំពេញ 1Y-0165 ជិះដោយបុរសពីរនាក់ ធ្វើដំណើរក្នុងទិសដៅស្របគ្នា ចំពីក្រោយពេញទំហឹង រុញផ្ទប់ឡើងលើចិញ្ចើមផ្លូវ បុកនិងបង្គោលថ្ម និងដើមត្របែកព្រៃបាក់អស់មួយដើម ទើបកល់រថយន្ត ក្រពិតផ្នែកខាងមុខ ទៅមុខលែងរួច តែសំណាងល្អមិនមានគ្រោះថ្នាក់ដល់មនុស្សដែលជិះក្នុងរថយន្តនោះទេ ដោយឡែកខាងអ្នកបើកម៉ូតូរបួសរលាត់ដៃរលាត់ជើងតិចតួច មិនបានទៅមន្ទីរពេទ្យ ។ ចំណែកម៉ូតូរងការខូចខាត ខ្ទេចខ្ទីស្ទើរតែទាំងស្រុង ។ ដោយឡែករថយន្តបង្កម៉ាកកាមរី បាឡែន បានបើករថយន្តគេចខ្លួនបាត់ស្រមោល ។ ភ្លាមៗនោះដែរ អ្នកបើកបររថយន្តព្រូស ត្រូវបានសមត្ថកិច្ចឃាត់ខ្លួនយកទៅសាកសួរ និងអធិការដ្ធានខណ្ឌចំការមន ផងដែរ ។
ក្រោយពេលកើតហេតុ អ្នកបើកបរ ព្រមទាំងរថយន្តនិងម៉ូតូត្រូវបានសមត្ថកិច្ចជំនាញបានចុះមកធ្វើការវាស់វែងយកទៅរក្សារទុកនៅការរិយាល័យចរាចរណ៍ជើងគោករាជធានីភ្នំពេញ ដើម្បីរង់ចាំធ្វើការដោះស្រាយ ៕