ខេត្តកណ្តាល ៖ ប្តីប្រពន្ធ២នាក់ រួមនឹងបក្ខពួកម្នាក់ទៀត បានព្រួតគ្នាវាយទៅលើបុរសម្នាក់ បណ្តាលឱ្យរយះចិញ្ចើមរងរបួសធ្ងន់ ខណៈដែលពួកគេធ្លាប់កើតមានទំនាស់ពាក្យសម្តីជាមួយគ្នាពីរឿងរកត្រី លុះពេលជួបមុខ ភ្លើងកំហឹងចាស់ឆាបឆេះឡើង ក៏ព្រួតគ្នាស្រាយគំនុំចាស់ បង្កឱ្យមានការភ្ញាក់ផ្អើលឡើង កាលពីវេលាម៉ោង២រសៀល ថ្ងៃទី០៧ ខែធ្នូ ឆ្នាំ២០១៧ នៅចំណុចផ្លូវចូលវត្តទួលរាជា ស្ថិតក្នុងភូមិព្រែកតាដុល ឃុំពោធិ៍បាន ស្រុកកោះធំ។
បុរសរងគ្រោះដែលត្រូវគូទំនាស់ មានគ្នា៣នាក់ ព្រួតវាយបណ្តាលឱ្យរយះចិញ្ចើម មានឈ្មោះទក ធី អាយុ២៨ឆ្នាំ មុខរបរកសិករ មានលំនៅក្នុងភូមិឃុំកើតហេតុខាងលើ។ ចំណែកជនសង្ស័យមានគ្នា៣នាក់ រួមមាន ទី១-ឈ្មោះ ជា បូរ៉ា ភេទស្រី អាយុ៣០ឆ្នាំ មុខរបរកម្មការិនីរោងចក្រ (ឃាត់ខ្លួន) ទី២-ឈ្មោះឃុល បូរ៉ា ភេទប្រុស អាយុ២៥ឆ្នាំ មុខរបរកសិករ ត្រូវជាប្តីរបស់ស្ត្រីឈ្មោះជា បូរ៉ា (គេចខ្លួន) និងទី៣-ឈ្មោះស្រឿង ក្រត ភេទប្រុស អាយុ២៣ឆ្នាំ មុខរបរកសិករ (គេចខ្លួន)។ ជនសង្ស័យទាំង៣នាក់ខាងលើ មានលំនៅក្នុងភូមិឃុំកើតហេតុខាងលើជាមួយជនរងគ្រោះដែរ។
តាមប្រភពពីកន្លែងកើតហេតុ បានឱ្យដឹងថា នៅមុនពេលកើតហេតុរយៈពេល៥ថ្ងៃ ជនរងគ្រោះឈ្មោះទក ធី បានទៅបង់សំណាញ់នៅចំណុចប្រឡាយ៣៨ រួចក៏បានជួបជនសង្ស័យ ឈ្មោះឃុល បូរ៉ា និងឈ្មោះស្រឿង ក្រត ហើយបានទាក់ពាក្យគ្នាជាមួយជនសង្ស័យទាំងពីរនាក់ ពីរឿងដាក់មងបីជាន់ និងដើរឆក់ត្រី។ ដោយពេលនោះ ជនរងគ្រោះបាននិយាយទៅកាន់ជនសង្ស័យឈ្មោះឃុល បូរ៉ា និងស្រឿង ក្រត ថា បងឯងរកអីរកទៅ កុំមកក្បែរកន្លែងបង់ត្រី ហ្នឹង!” ពេលនោះជនសង្ស័យក៏ឆ្លើយថា “អញចង់រក អញចង់កូរ”។
ប្រភពដដែលបន្តថា លុះរំលងបានចំនួន ៥ថ្ងៃ នៅថ្ងៃកើតហេតុ ជនរងគ្រោះបានជិះម៉ូតូទៅបង្កៃសន្ទូច ស្រាប់តែពេលទៅដល់ពាក់កណ្តាលផ្លូវ ក៏បានជួបនឹងជនសង្ស័យឈ្មោះ ស្រឿង ក្រត តែពេលនោះត្រូវបានស្ត្រីឈ្មោះ ហ៊ីម ខេង ដែលត្រូវជាម្តាយក្មេករបស់ជនរងគ្រោះ ដេញជនរងគ្រោះជាកូនប្រសាត្រឡប់ទៅផ្ទះវិញ ព្រោះខ្លាចមានរឿង។ ស្រាប់តែពេលជនរងគ្រោះជិះម៉ូតូមកដល់ច្រកចូលវត្តទួលរាជា ជនសង្ស័យឈ្មោះស្រឿង ក្រត បានជិះម៉ូតូទៅកៀរម៉ួតូរបស់ជនរងគ្រោះ និងបានហៅជនសង្ស័យ២នាក់ប្តីប្រពន្ធខាងលើ នាំគ្នាចូលទៅវាយជនរងគ្រោះ ដោយប្រើដុំឈើ បណ្តាលឱ្យជនរងគ្រោះទទួលរងរបួសរយះចុងចិញ្ចើមខាងឆ្វេង ដេរចំនួន៣ថ្នេរ និងរបួសធ្ងន់ ត្រង់ក្បាលផ្នែកខាងក្រោយ។
ក្រោយពីធ្វើសកម្មភាពព្រួតវាយទៅលើជនរងគ្រោះរួច ក្រុមជនសង្ស័យទាំង៣នាក់ បាននាំគ្នារត់គេចខ្លួនបាត់។ ចំណែកជនរងគ្រោះត្រូវបានក្រុមគ្រួសារដឹកបញ្ជូនទៅព្យាបាលរបួស រួចទៅដាក់ពាក្យបណ្តឹងនៅប៉ុស្តិ៍រដ្ឋបាលពោធិ៍បាន។ បន្ទាប់មក សមត្ថកិច្ចបានចុះស្រាវជ្រាវ រហូតឃាត់ខ្លួនជនសង្ស័យបានម្នាក់ ឈ្មោះជា បូរ៉ា នៅព្រឹកថ្ងៃទី០៨ ខែធ្នូ ឆ្នាំ២០១៧ បញ្ជូនមកកាន់អធិការដ្ឋាននគរបាលស្រុកកោះធំ តែម្តង។
ស្ត្រីសង្ស័យឈ្មោះជា បូរ៉ា ត្រូវបានសមត្ថកិច្ចរៀបចំកសាងសំណុំរឿងបញ្ជូនខ្លួនទៅកាន់សាលាដំបូងខេត្ត ដើម្បីចាត់ការបន្តតាមនីតិវិធី។ ចំណែកបក្ខពួក២នាក់ទៀត ដែលបានរត់គេចខ្លួន សមត្ថកិច្ចកំពុងស្រាវជ្រាវតាមចាប់ខ្លួន នាំយកមកផ្តន្ទាទោសតាមច្បាប់៕