ឱក សុគន្ធកញ្ញា ត្រូវបានគូដណ្តឹងរបស់នាង លោកអ៊ឹង សុខលី ដែលជាអ្នកគ្រប់គ្រងទូរទស្សន៍ហង្សមាស នោះ ចាត់តាំងឱ្យអនាគតភរិយារបស់លោក ធ្វើជាគណៈកម្មការក្នុងកម្មវិធីប្រលងចម្រៀង ដែលទិញសិទ្ធិមកពីបរទេស X Factor Cambodia រដូវកាលទី១ ដែលតំណែងធំនេះត្រូវបានមហាជនគិតទុកជាមុនស្រេចទៅហើយថា ពេលដែលសុគន្ធកញ្ញា ក្លាយទៅជាប្អូនថ្លៃលោកថៅកែហង្សមាស ឧកញ៉ាអ៊ឹង ឆៃងួន នោះ គឺអំណាចនាងកាន់តែខ្លាំង ហើយនឹងមិនត្រូវបានដកចេញពីកម្មវិធីណាមួយទេ គឺមានតែដាក់ថែមទៀត ឥឡូវអ្វីៗដូចការគិតទុកមុនរបស់ទស្សនិកជនមែន។
ឱក សុគន្ធកញ្ញា នឹងត្រូវចាប់ដៃជាមួយគ្រូបង្វឹក៣រូបផ្សេងទៀតមានដូចជា ខេមរៈ សិរីមន្ត, ណុប បាយ៉ារិទ្ធ និងសុខ សីឡាលីន ផងដែរ។ នេះជាតំណែងធំទី៤ របស់ឱក សុគន្ធកញ្ញា នៅទូរទស្សន៍ហង្សមាស បន្ទាប់ពីនាងបានក្តាប់ជាប់នូវគណៈកម្មការ និងគ្រូបង្វឹកក្នុងកម្មវិធី The Voice Cambodia, The Voice Kids Cambodia និង Cambodian idol រួចជាស្រេចទៅហើយ។
ប្រភពបានឱ្យដឹងថា បើមានកម្មវិធីណាល្អដែលទូរទស្សន៍ហង្សមាស នឹងចេញកម្មវិធីលំដាប់ថ្នាក់ពិភពលោកនោះ លោកអ៊ឹង សុខលី ដែលបញ្ជាផ្ទាល់លើទូរទស្សន៍នេះ នឹងបញ្ជូនគូដណ្តឹងរបស់លោក សុគន្ធកញ្ញា ទៅកាន់កម្មវិធីថែមទៀត ហើយមូលហេតុដែលលោកសុខលី មើលមិនសូវឃើញតារាចម្រៀងស្រីណាផ្សេងពីអនាគតភរិយារបស់លោកនោះ ព្រោះតែសំអាងថា សុគន្ធកញ្ញា ជាតារាចម្រៀងស្រីល្បីជាងគេនៅហង្សមាស ដែលមានសមត្ថភាពល្អ តែអ្វីដែលពិសេសបំផុតនោះ គឺលោកសុខលី ចង់ឱ្យសុគន្ធកញ្ញា កាន់តែល្បីថែមទៀត ហេតុនេះហើយ គឺត្រូវតែដាក់កម្មវិធីឱ្យសុគន្ធកញ្ញា កាន់ឱ្យកាន់តែច្រើនថែមទៀតកាន់តែល្អ។
ទោះជាយ៉ាងណា តារាចម្រៀងកំពូលទើស ម៉ៃ សុគន្ធ បានសម្តែងការខកចិត្ត ដែលហង្សមាស បានដាក់ឱក សុគន្ធកញ្ញា ឱ្យកាន់កម្មវិធីច្រើនពេក ហាក់ដូចជាចង់សាំ បើទោះជាសុគន្ធកញ្ញា ជាអ្នកចម្រៀងមានសមត្ថភាពម្នាក់ក៏ដោយ។ ការទើសរបស់លោកសុគន្ធ នៅពេលនេះ ដោយសារតារាដែលនាយចឺម ថា មិនចង់ជ្រលក់មាត់រករូបនេះ គិតថា ពេជ្រ សោភា ក៏អាចកាន់តំណែង X Factor Cambodia ជំនួសសុគន្ធកញ្ញា បានដែរ ព្រោះសោភា ក៏ជាអ្នកចម្រៀងម្នាក់ដែលមានសមត្ថភាពដែរនៅហង្សមាស។
ទោះជាយ៉ាងណាលោកអ៊ឹង សុខលី មិនអាចដាក់តារាណាជំនួសអនាគតភរិយាលោកបានឡើយ ដែលកុំថាឡើយតារាកំពូលទើស ម៉ៃ សុគន្ធ ឱ្យយោបល់ ទោះជាអ្នកណាស្នើសុំ ក៏មិនអាចជាដាច់ខាត ព្រោះថា ទូរទស្សន៍ហង្សមាស នៅក្រោមការគ្រប់គ្រងរបស់លោកផ្ទាល់ ចំណែកកម្មវិធី X Factor នោះ ហង្សមាស ចំណាយទិញសិទ្ធិខ្លួនឯង អ៊ីចឹងចង់លោកដាក់សុគន្ធកញ្ញា ឱ្យធ្វើជាគណៈកម្មការតែម្នាក់ឯងក៏បានដែរ។
ឱក សុគន្ធកញ្ញា នៅតែមានអត្តចរិកដូចមុនដដែល បើទោះជានាងជិតក្លាយទៅជាភរិយាស្របច្បាប់របស់លោកអ៊ឹង សុខលី ហើយ ក៏ដូចជាក្លាយទៅជាប្អូនថ្លៃថៅកែហង្សមាស លោកឧកញ៉ាអ៊ឹង ឆៃងួន ក៏ដោយ គឺនាងនៅតែត្រូវបានអ្នកគាំទ្រសរសើរថា រួសរាយ និងមិនឆ្មើងឆ្មៃដដែល។
ចំណែកតារាចម្រៀងរួមទ្រនំហង្សមាស វិញ បានឱ្យដឹងថា សុគន្ធកញ្ញា មិនដែលតាំងខ្លួនថា ជាប្អូនថៅកែហង្សមាស នោះទេ គឺពីមុនម៉េច នៅតែចឹងដដែល។
ថ្វីត្បិតមានការលើកឡើងថា ឱក សុគន្ធកញ្ញា មិនតាំងខ្លួនថា ជាប្អូនថ្លៃថៅកែហង្សមាស ដើម្បីបង្ក្រាបតារារួមទ្រនំក្តី តែសុគន្ធកញ្ញា ត្រូវបានគេរំពឹងថា នាងនឹងកាន់តែមានអំណាច និងឥទ្ធិពលខ្លាំងជាងនេះថែមទៀត នៅពេលដែលនាងរៀបការជាមួយលោកអ៊ឹង សុខលី នៅពាក់កណ្តាលឆ្នាំ២០១៩ ហើយនាងនឹងក្លាយទៅជាប្អូនថ្លៃថៅកែហង្សមាស លោកឧកញ៉ាអ៊ឹង ឆៃងួន ឆាប់ៗនេះ។
ទស្សនិកជនជឿថា ហង្សមាស នឹងមិនឱ្យតារាស្រីទ្រនំនេះល្បីជាងប្អូនថ្លៃថៅកែហង្សមាស គឺ សុគន្ធកញ្ញា ឡើយ៕