បន្ទាប់ពីព្រមានប្ដឹងអ្នកនាង Somrith Ya Nuth ឡើងតុលាការ កាលពីថ្ងៃទី២៨ ខែតុលា ឆ្នាំ២០២០ នោះ នៅទីបំផុត អ្នកមេម៉ាយកូន២ អ្នកនាងឈិន សុធារី ពេលនេះបានភ្ជាប់ស្នេហ៍ថ្មីជាមួយលោកកែវ ពិសិដ្ឋ អតីតប្ដីអ្នកនាង Somrith Ya Nut ជាចំហតែម្ដង ក្រោយពីមានព័ត៌មានថា ពោះម៉ាយកូន២ រូបនេះ បានលែងលះប្រពន្ធដើមដាច់ស្រាច់ តែ២ថ្ងៃប៉ុណ្ណោះមុនពេលដែលលោកថៅកែដីឡូតិ៍រូបនេះ ធ្វើពិធីជប់លៀងខួបកំណើតឲ្យសុធារី កាលពីថ្ងៃទី១៩ ខែកុម្ភៈ ឆ្នាំ២០២១។
ព័ត៌មានបានឲ្យដឹងថា លោកកែវ ពិសិដ្ឋ បានឡើងតុលាការជាលើកទី២ ហើយលែងលះជាមួយអ្នកនាង Somrith Ya Nuth កាលពីថ្ងៃទី១៧ ខែកុម្ភៈ ឆ្នាំ២០២១ ខណៈដែលកូនទាំង២ របស់លោក ត្រូវបានទៅលើអតីតភរិយាឃុំគ្រង។
ក្រោយលែងប្រពន្ធដើមបានតែ២ថ្ងៃប៉ុណ្ណោះ លោកកែវ ពិសិដ្ឋ បានជប់លៀងធំខួបកំណើតឲ្យឈិន សុធារី ដោយលោកហៅសុធារី សុទ្ធតែប្រពន្ធពេញៗមាត់ទៀតផង។
អ្នកសិល្បៈមួយចំនួនក៏បានទៅអបអរសុធារី ផងដែរ ពិសេសការរកបានគូស្នេហ៍ថ្មីជាបុរសទ្រព្យស្ដុក និងជាថៅកែលក់ដីឡូតិ៍ រូបសង្ហានេះ។
ប្រភពបានឲ្យដឹងថា ក្រោយរកបានគូស្នេហ៍ថ្មីជាពោះម៉ាយកូន២នេះភ្លាមៗ សុធារី បានបើកហាង Cosmetic មួយកន្លែង ដែលគ្រោងធ្វើពិធីសម្ពោធទ្រង់ទ្រាយធំនាពេលខាងមុខនេះទៀតផង។
ដោយឡែក មិត្តភក្ដិអ្នកនាង Somrith Ya Nuth បានសម្ដែងការអាណិតអាសូរនាង ព្រោះថាអតីតប្ដីលែងនាងបានតែ២ថ្ងៃ ក៏ជប់លៀងផឹកស៊ីយ៉ាងសប្បាយក្អាកក្អាយ ជាមួយគូស្នេហ៍ថ្មីតែម្ដង បើទោះជាតាមព័ត៌មានថា លោកពិសិដ្ឋ នៅតែជាប់ភារកិច្ចជួយទំនុកបម្រុងចិញ្ចឹមកូនទាំង២ របស់លោក ដែលរស់នៅជាមួយអតីតប្រពន្ធក្ដី។
ឈិន សុធារី បានបង្ហាញទឹកមុខរីករាយ ក្រោយគូស្នេហ៍ថ្មីលែងលះប្រពន្ធដើមដាច់ស្រាច់នេះ ហើយកាលពីថ្ងៃទី១០ ខែមីនា ឆ្នាំ២០២១ នាងបានដឹកដៃប្រុសស្នេហ៍ទៅសែនក្រុងពលីលក់ដីឡូតិ៍ និងផ្ទះល្វែងទៀតផង។
កូនចៅលោកពិសិដ្ឋ បានហៅសុធារី ថា “មេស្រីៗ” ហើយនាងមានកូនចៅគោរពមិនចាញ់ជំទាវឡើយ។ ប៉ុន្ដែទន្ទឹមនឹងនេះ បែរជាមានអ្នកខ្លះនាំគ្នាខ្សឹបខ្សៀវគ្នាថា មិនដឹងថាចំណងស្នេហាថ្មីរបស់សុធារី អាចរក្សាបានភាពគង់វង្សរហូត ឬយ៉ាងណានោះទេ ព្រោះតាមព័ត៌មានថា គូស្នេហ៍ថ្មីរបស់នាងដែលជាថៅកែដីឡូតិ៍នេះ ក៏ធ្លាប់មានស្រីផ្សេងទៀត ប្រជែងស្នេហ៍សុធារី ផងដែរ ទើបអ្នកខ្លះថា អ្នកនាង Somrith Ya Nuth ហាក់ធូរទ្រូង ក្រោយលែងលះដាច់ស្រេចជាមួយអតីតប្ដីរូបនេះ។
អ្នកនាងឈិន សុធារី មិនអាចទាក់ទងបានទេកាលពីរសៀលថ្ងៃទី២២ ខែមីនា ឆ្នាំ២០២១ ព្រោះទូរស័ព្ទចូលត្រូវបានបុរសម្នាក់ លើកជំនួស និងថា មិនមែនលេខរបស់សុធារី នោះទេ។
អតីតតារាសម្ដែង ចម្រៀង និងពិធីការិនីរូបនេះ មិនទាន់មានដំណឹងរៀបការជាមួយលោកកែវ ពិសិដ្ឋ ជាចំហឡើយ ក្រោយអ្នកទាំង២ សាងស្នេហ៍ជាសាធារណៈ ទើបតែបានជាង១ខែនេះ។
ដោយឡែក លោកកែវ ពិសិដ្ឋ វិញពេលនេះបង្ហាញក្ដីស្រលាញ់ចំពោះសុធារី ពេញបេះដូងតែម្ដង ដែលធ្វើឲ្យមិត្តភក្ដិរបស់សុធារី លាន់មាត់ថា ”ពោះម៉ាយកូន២ ប៉ះមេម៉ាយកូន២ សមគ្នាតែម្ដង…”។
ឈិន សុធារី បានរៀបការជាមួយតារាសម្ដែងសុវណ្ណ មករា កាលពីថ្ងៃទី២២ ខែតុលា ឆ្នាំ២០១៥ ដោយទទួលបានកូនភ្លោះប្រុសស្រី អាយុជាង៤ឆ្នាំ ហើយអ្នកទាំង២ ក៏បានចែកផ្លូវគ្នាកណ្ដាលទី។ ក្រោយធ្លាក់ខ្លួនមេម៉ាយ សុធារី បានចោទប្រកាន់តារាសម្ដែងវ័យក្មេងម្នាក់ថា បានឆក់ប្ដីនាង តែអ្នកសម្ដែងរូបនោះបានប្រកែក។
មុនភ្ជាប់ស្នេហ៍ជាមួយលោកកែវ ពិសិដ្ឋ អ្នកនាងឈិន សុធារី ក៏ប៉ះស្នេហ៍អតីតតារាសម្ដែងលោកងួន វ៉ារី ផងដែរ តែអ្នកទាំង២ មិនដែលហ៊ានចេញមុខបំភ្លឺឡើយ៕ ដោយ ៖ ហ៊ឹម វិចិត្រ