ឱក សុគន្ធកញ្ញា បានតេស្ដអវិជ្ជមានកូវីដ-១៩ លើកទី២ កាលពីថ្ងៃទី២០ ខែមីនា ឆ្នាំ២០២១ ធ្វើឲ្យប្អូនថ្លៃថៅកែហង្សមាស រូបនេះ បានធូរទ្រូងបន្ដិចឡើងវិញហើយ បន្ទាប់ពីនាងបានភ័យបុកពោះ ព្រោះព្រួយបារម្ភ និងខ្លាចមានលទ្ធផលអាក្រក់កើតមានឡើង បើទោះជាមិត្តរួមក្រុម និងអ្នកគាំទ្រជាច្រើនបានជូនពរឲ្យនាងឆ្លងផុតពីគ្រោះកំណាច ដោយសារតែជំងឺផ្លូវដង្ហើម ដែលកំពុងតែវាយលុកក្រុមហ៊ុនហង្សមាស បណ្ដាលឲ្យតារាបានឆ្លងជាបន្ដបន្ទាប់គ្នា។
ទោះជាយ៉ាងណា សុគន្ធកញ្ញា កំពុងតែបន្ដធ្វើចត្តាឡីស័ក ដើម្បីត្រៀមខ្លួនធ្វើតេស្ដជាលើកទី៣ នាពេលខាងមុខនេះទៀត។
ថ្វីត្បិតតែឱក សុគន្ធកញ្ញា មានសំណាងល្អដោយអវិជ្ជមានកូវីដ-១៩ ទាំង២លើកក្ដី ប៉ុន្ដែនាងនៅតែមិនទាន់ធានាសុវត្ថិភាព ១០០% ថា គេចផុតពីកូវីដនោះឡើយ ព្រោះថាតារាចម្រៀងរួមក្រុម អ្នកនាងសួស វីសា ក៏តេស្ដអវិជ្ជមានដល់ទៅ២លើកដែរ តែនៅពេលដែលតេស្ដលើកទី៣ ស្រាប់តែឃើញកូវីដ-១៩ ធ្វើឲ្យវីសា ស្រក់ទឹកភ្នែក។
ដោយឡែក សុគន្ធកញ្ញា ប្រឈមហានិភ័យខ្ពស់ ព្រោះថាពេលនេះតារាចម្រៀងហង្សមាស ដល់ទៅ៦ដួងហើយ ដែលបានឆ្លងកូវីដ-១៩ ហេតុនេះហើយបានជាពេលនេះ សុគន្ធកញ្ញា សម្រេចចិត្តផ្អាកច្រៀងសម្ដែងនៅលើឆាកតន្រ្ដីហង្សមាស ដែលដឹកនាំដោយស្វាមីនាង រួមទាំងការថតស្ពតផ្សេងៗផងដែរ។
ចំណែកតារាផ្សេងៗទៀតនៅហង្សមាស ក្រៅពីសុគន្ធកញ្ញា នោះ ពួកគេកំពុងតែមានសភាពតឹងតែងអារម្មណ៍ដូចគ្នា ព្រោះតែមិត្តរួមក្រុមបានតេស្ដឃើញកូវីដ-១៩ ច្រើនហួសការស្មាន ហេតុនេះហើយបានជាមានអ្នកខ្លះបារម្ភពេក រហូតដល់ដេកលែងលក់ក៏មានដែរ។
ឱក សុគន្ធកញ្ញា បានស្ងប់ស្ងាត់រយៈពេលជាង១ឆ្នាំមកហើយ ក្រោយរៀបការប្ដីនិងមានកូន១ នាងមិនទាន់មានបទចម្រៀងណាល្បីខ្លាំងដូចកាលនៅលីវឡើយ។ សុគន្ធកញ្ញា សង្ឃឹមថា ការវាយលុកបទចម្រៀងចូលឆ្នាំខ្មែរ របស់នាង នឹងអាចស្ដារមុខមាត់ឡើងវិញបានខ្លះជាមិនខាន តាមរយៈការសម្រឹតសម្រាំងជាពិសេសរបស់ស្វាមីនាង ។
ប៉ុន្ដែគួរឲ្យស្ដាយ ព្រោះតែកូវីដ-១៩ ផ្ទុះខ្លាំងពេក ធ្វើឲ្យគម្រោងចេញថត MV របស់នាងត្រូវជាប់គាំងទ្រឹងតែម្ដង ហើយពេលនេះ នាងនិងគ្រួសារបង្ខំចិត្តឃុំខ្លួនដើម្បីរង់ចាំធ្វើសំណាកជាលើកទី៣ នៅចុងខែមីនា នេះម្ដងទៀត។
តារារួមអាជីពបានឲ្យដឹងថា សុគន្ធកញ្ញា ទោះជាគ្មានបទល្បីៗដូចមុនទៀតមែន ប៉ុន្ដែនាងនៅតែជាតារាចម្រៀងម្នាក់ ដែលមានឥទ្ធិពលខ្លាំងជាងគេនៅហង្សមាស ដែលប្រៀបបានថៅកែ ឬម្ចាស់ផលិតកម្មនេះទៅហើយ អីចឹងតើមានអ្នកណាបណ្ដោយឲ្យម្ចាស់ផលិតកម្ម លែងល្បី ឬត្រូវតារាផ្សេងរបស់ផលិតកម្មនេះ នាំមុខនាងបានទៅ?
គួររំលឹកថា ឱក សុគន្ធកញ្ញា បានដឹកដៃលោកអ៊ឹង សុខលី រៀបការកាលពីថ្ងៃទី១៦ ខែឧសភា ឆ្នាំ២០១៩ និងសម្រាលបានកូនប្រុសម្នាក់ ឈ្មោះអ៊ឹង បញ្ញាបុត្រ កាលពីថ្ងៃទី១១ ខែវិច្ឆិកា ឆ្នាំ២០១៩។ កញ្ញា ជាតារាចម្រៀងតែម្នាក់ដែលត្រូវបានមហាជនចាត់ទុកថា ជោគជ័យទាំងចម្រៀងនិងស្នេហា កាលពីឆ្នាំ២០១៩-២០២០ ហើយពេលនេះ សុគន្ធកញ្ញា តែងតែបង្ហាញរូបភាពសុភមង្គលក្នុងគ្រួសារដែលតារាផ្សេងៗជាច្រើនច្រណែននាង។
ប្អូនថ្លៃថៅកែហង្សមាស រូបនេះ មិនទាន់មានរាងស្វែលដូចកាលនៅក្រមុំទេ ប៉ុន្ដែនាងកាន់តែកាលីពជាមួយការជិះរថយន្ដទំនើបៗ ដូចជា Audi និង Range Rover ជាដើម៕ ដោយ ៖ ហ៊ឹម វិចិត្រ