កាលពីថ្ងៃអង្គារទី ២៨ ធ្នូ ២០២១ លោកZhao Lijan អ្នកនាំពាក្យក្រសួងការបរទេសចិនបាននិយាយ ថា សហរដ្ឋអាមេរិកមិនអើពើនឹងកាតព្វកិច្ចក្រោមសន្ធិសញ្ញាអវកាសខាងក្រៅដែលធ្វើអោយអវកាសយានិកប្រឈមនឹងគ្រោះថ្នាក់។នេះបើយោងតាមការចេញផ្សាយរបស់សារព័ត៌មានរ៉យទ័រកាលពីថ្ងៃអង្គារ។ថ្លែងក្នុងសន្និសីទកាសែតជាប្រចាំថ្ងៃអ្នក នាំពាក្យក្រសួងការបរទេសបានបញ្ជាក់ថា ចិនជំរុញឱ្យសហរដ្ឋអាមេរិកធ្វើការទទួលខុសត្រូវ។ការបញ្ចេញប្រតិកម្មបែបនេះស្របពេលពលរដ្ឋចិនបានរិះគន់តាមប្រព័ន្ធអ៊ីនធឺណែតប្រឆាំងនឹងមហិច្ឆតាអវកាសរបស់ស្ថាបនិក ក្រុមហ៊ុនTesla លោក Elon Musk ។ កាលពីថ្ងៃចន្ទប្រទេសចិនបានត្អូញត្អែរថា ស្ថានីយ៍អវកាសរបស់ខ្លួនត្រូវបានបង្ខំឱ្យចាត់វិធានការគេចវេស ដើម្បីជៀសវាងការប៉ះទង្គិចជាមួយផ្កាយរណបដែលបង្ហោះដោយកម្មវិធី Starlink របស់ លោក Elon Musk ។
របាយការណ៍ដែលដាក់ជូនដោយបេសកកម្មអចិន្ត្រៃយ៍របស់ខ្លួននៅទីក្រុងវីយែនអានថាប្រទេសចិនមានបំណងស្នើសុំអគ្គលេខាធិការអង្គការសហប្រជាជាតិឱ្យផ្សព្វផ្សាយព័ត៌មានដែលបានរៀបរាប់ខាងលើទៅកាន់រដ្ឋភាគីទាំងអស់នៃសន្ធិសញ្ញាអវកាសខាងក្រៅ។ទីក្រុងប៉េកាំងបានអំពាវនាវឱ្យអង្គការសហប្រជាជាតិរំលឹកសហរដ្ឋអាមេរិកឱ្យគោរពតាមសន្ធិសញ្ញាគ្រប់គ្រងលំហអាកាស បន្ទាប់ពីផ្កាយរណបអវកាសបានបាញ់បង្ហោះដោយក្រុមហ៊ុនអវកាស SpaceX របស់មហាសេដ្ឋីបច្ចេកវិទ្យា Elon Musk ស្ទើរតែបុកជាមួយស្ថានីយអវកាសរបស់ខ្លួនពីរដងកាលពីឆ្នាំមុន៕
