ភ្នំពេញ៖តារាចម្រៀងហង្សមាសលោកយក់ ដួងតារា ដែលត្រូវបានមហាជនស្គាល់និយមស្ដាប់បទកន្រ្ទឹមរបស់លោកជាច្រើនបទនោះបានបង្ហាញអារម្មណ៍រំភើបរហូតដល់ថាទឹកភ្នែកលោកមិនស្រក់ចេញមកខាងក្រៅនោះទេ ប៉ុន្ដែបានស្រក់ជ្រាបចូលទៅក្នុងទ្រូង តែម្ដងនៅពេលដែលលោកបានជួបអ្នកដឹកនាំកម្មវិធីសិល្បៈជាន់ខ្ពស់ល្បីល្បាញឈ្មោះលោកគួច ខេវិន ហៅហាងបាយមួយនៅក្រុងតាខ្មៅកាលពីពេលថ្មីៗនេះ។លោកដួងតារា ថាអ្វីដែលលោករំភើបខ្លាំងនោះគឺទោះជាលោកខេវិន ឡើងខ្ពស់ប៉ុណ្ណា ក៍នៅតែមានការរាប់អានរូបលោកដែលជាតារាចម្រៀងសាមញ្ញម្នាក់ហើយថាសម្ដីលោកខេវិន ប្រៀបដូចជាស្ដៅ តែជាឱសថ សម្រាប់លោក។លើសពីនេះទៅទៀតលោកថាលោកខេវិន មានការអាណិតចំពោះលោកដែលមើលទៅសុខភាពស្គមជាងមុននិងថែមទាំងផ្ដល់ថវិការមួយចំនួនឲ្យលោកសម្រាប់ដោះស្រាយនៅពេលមានភាពទាល់ណាមួយទៀតផង…។
លោកយក់ ដួងតារា បង្ហោះសារនៅលើហ្វេសបុកកាលពីថ្ងៃទី១៧ខែមករាឆ្នាំ២០២២ ថា”ថ្ងៃនេះខ្ញុំបានជួបបងប្រុស(គួច ខេវិន)ដោយចៃដន្យ នៅហាងញាំបាយ១កន្លែងនាទីក្រុងតាខ្មៅ។អ្វីដែលខ្ញុំចង់និយាយពេលនេះ គឺខ្ញុំសូមថ្លែងអំណរគុណដល់ទឹកចិត្តដ៏សប្បុរសធម៌ពិតៗរបស់បងប្រុស ដែលមានមកលើរូបប្អូន ទោះបងបានខ្ពង់ខ្ពស់ប៉ុណ្ណា នៅដល់ទីណា ក៏បងមិនបោះបង់ប្អូនដែរ។ បងជាមនុស្សដែលមានសំដីស្ដៅ តែជាឱសថសម្រាប់ប្អូន។បងបានពោលពាក្យមកកាន់រូបប្អូនថា ឥឡូវប្អូនស្រកសាច់ស្គមជាងមុនច្រើន បងថាអាណិតអាសូរប្អូនណាស់! និងបាននិយាយរឿងរ៉ាវខ្លះៗទាក់ទងនិងសិល្បៈដោយស្នាមញញឹមរបស់បង ព្រមទាំងបទពិសោធន៍ធ្លាប់រួមការងារជាមួយគ្នា១ចំនួននាពេលកន្លងមក។មុនលាគ្នា បងបានផ្ដល់ថវិការ១ចំនួនមកឲ្យប្អូនដើម្បីដោះស្រាយភាពទាល់ណាមួយ ដោយទឹកចិត្តនិងបេះដូង ដែលមិនមែនជាការសម្ដែង ហើយបងក៏មិនបានសុំឲ្យខ្ញុំផុសដែរ។តែនេះខ្ញុំសុំការអនុញ្ញាតដោយត្រង់ ដើម្បីបានសម្ដែងនូវការដឹងគុណចំពោះបងប្រុស ដែលធ្លាប់ជួយប្អូនកន្លងមក រួមទាំងតារាមួយចំនួនផ្សេងទៀត ដែលបានទទួលភាពល្បីល្បាញនិងមានកិត្តិយសមុខមាត់មកទល់សព្វថ្ងៃនេះ ដោយសារមានបងជាអ្នកនៅពីក្រោយ ជួយបណ្ដុះបណ្ដាលជ្រោមជ្រែងផងដែរ។ពេលដែលខ្ញុំបានទទួលថវិការពីបងប្រុស ទឹកភ្នែករបស់ខ្ញុំមិនបានបង្ហាញឲ្យឃើញផ្នែកខាងក្រៅនោះទេ គឺវាស្រក់ជ្រាបចូលទៅក្នុងទ្រូង មានអារម្មណ៍ថារំភើបនិងផ្សារៗ រកនិយាយមិនចេញ។ចុងក្រោយសូមគោរពជូនពរបងប្រុស ឱ្យមានសុខភាពល្អបរិបូណ៌ ប្រាជ្ញាឈ្លាសវៃ ជោគជ័យគ្រប់ភារកិច្ច និងរីកចំរើនក្នុងមុខរបរអាជីវកម្មតូចធំ ត្រជាក់ត្រជុំ សុខដុម នៅក្នុងក្រុមគ្រួសារ ជួបនូវពុទ្ធពរ ៤ ប្រការ គឺអាយុ វណ្ណៈ សុខៈ ពលៈ កុំបីឃ្លាតឡើយ។(សូមអរគុណនូវទឹកចិត្តដ៏ល្អរបស់បងប្រុស!) ថ្ងៃច័ន្ទ ទី១៧.ខែមករា ២០២២”។
គូរបញ្ជាក់ថាមិនមែនតែលោកយក់ ដួងតារា ម្នាក់ទេតែមានសិល្បករជាច្រើនរូបមកហើយដែលលោកគួច ខេវិន ធ្លាប់បានជួយបណ្ដុះបណ្ដាលរហូតពួកគេទទួលបានជំនាញបន្ដអាជីពការងារសិល្បៈរហូតមកដល់បច្ចុប្បន្នពិសេសលោកក៍ធ្លាប់បានជួយសិល្បករចាស់ជរានិងជនដែលជួបបញ្ហាជីវភាពលំបាកនាពេលកន្លងមកជាច្រើនលើកច្រើនសារផងដែរ។ក្រុមសិល្បករទាំងនោះតែងតែគោរពនិងដឹងគុណដល់លោកគួច ខេវិន និងចាត់ទុកជាអ្នកដឹកនាំកម្មវិធីសិល្បៈដ៍គូរឲ្យគោរពម្នាក់រយៈពេលជាង២០ឆ្នាំមកនេះ។ដោយឡែកលោកយក់ ដួងតារា វិញទោះជាលោកនៅតែជាតារាហង្សមាសមែន ប៉ុន្ដែស្ថានភាពជីវភាពរបស់លោកមិនសូវធូធារនោះទេ ព្រោះចេញពីច្រៀងសម្ដែងនៅឆាកតន្រ្ដីទាំងឡាយនៅភ្នំពេញ វិលទៅស្នាក់នៅវត្តអារ៉ាមមួយនៅខេត្តតាកែវ ។លោកដួងតារា ដែលជាកូនកំព្រាតាំងពីតូចនោះពេលនេះលោកក៍មិនទាន់ភរិយាដែរ ក្រោយប្រេះឆាស្នេហ៍ចាស់ជាច្រើនឆ្នាំ។សកម្មភាពរបស់លោកដួងតារា ក្នុងការបញ្ចេញសារដឹងគុណលោកខេវិន នេះជាគំរូល្អមួយសម្រាប់តារាផ្សេងៗទៀតគឺមិនត្រូវភ្លេចអ្នកធ្លាប់ជួយជ្រោមជ្រែងនិងត្រួសត្រាយផ្លូវដែលប្រៀបបានជាគ្រូរបស់ពួកគេឲ្យបានឈជើងក្នុងសិល្បៈមួយនេះឡើយ៕
