ភ្នំពេញ៖សុគន្ធ និសា បានបង្ហាញភាពស្និតស្នាលជាមួយថៅកែរាម តាមរយៈការឃោសនាផលិតផលហើយមានព័តមានថារូបនាងក៍ជាមុខសញ្ញានៃការចង់បានរបស់ផលិតកម្មជើងថ្មីមួយនេះដែរ បន្ទាប់ពីរាមឆក់បានមាស សុខសោភា មុនហង្សមាស រួមទាំអន្ទងបានដួង វីរៈសិទ្ធ ដោយជោគជ័យនោះ។ទោះជាយ៉ាងណារហូតមកដល់ពេលនេះសុគន្ធ និសា នៅតែគ្មានចេតនាក្នុងការទៅចោលហង្សមាសជាលើកទី២នោះទេ តែការស្និតស្នាលជាមួយថៅកែរាម នោះជាមុខរបរក្រៅពីអាជីពចម្រៀងប៉ុណ្ណោះហើយពេលនេះនាងនៅតែជាតារារបស់ហង្សមាសដដែល។យ៉ាងណាអ្នកជំនាញសិល្បៈជឿរថាក្រោយមានព័តមានថៅកែរាម ពេញចិត្តសុគន្ធ និសា នេះហង្សមាសអាច នឹងពិចារណាប្រគល់តំណែងធំណាមួយដែលនៅទំនេរពីព្រាប សុវត្ថិ ដែលដើរចេញទៅបាត់បន្សល់កៅអីទំនេរដូចជាCambodian Idol ,The Voice Kids Cambodia និងCambodian Idol Junior នោះឲ្យទៅនិសា ដើម្បីលួងលោមចិត្តនាងឲ្យបន្ដស្នាក់នៅទ្រនុំធំនេះជាបន្ដទៀតជាមិនខាន ក្រោយនាងរបូតកៅអីជាCoach កម្មវិធី The Voice Kids រដូវកាលទី២ដែលធ្លាក់ទៅកណ្ដាប់ដៃសួស វីសា ។ ប៉ុន្ដែលោកវណ្ណា ដែលជាអ្នកដឹកនាំកម្មវិធីប្រលងចម្រៀងធំៗរបស់ហង្សមាសធ្លាប់អះអាងថាថ្នាក់ដឹកនាំមិនទាន់គិតគូរដល់តំណែងដែលព្រាប សុវត្ថិ ធ្លាប់កាន់នោះថានឹងឲ្យតារាណាជំនួសនោះទេ បើទោះជាបណ្ដារកម្មវិធីទាំងនោះបានប្រកាសពីរដូវកាលថ្មីក្ដី តែនោះគ្រាន់តែជាការត្រៀមខ្លួនប៉ុណ្ណោះ។
ក្រៅពីសុគន្ធ និសា តារាដែលអាចគេមើលឃើញថាអាចរ៉ាប់រ៉ាងកិច្ចការដែលលោកព្រាប សុវត្ថិ បន្សល់នោះមានដូចជាពេជ្រ សោភា និងលោកខេម ប៊ុនថៃ ជាដើម។តែអ្នកជំនាញសិល្បៈយល់ថាឱកាសដែលសុគន្ធ និសា ឆក់បានកៅអីទំនេររបស់ព្រាប សុវត្ថិ នៅពេលនេះគឺជាពេលវេលាល្អបំផុតព្រោះគេជឿរថាថៅកែហង្សមាសនឹងមិនមើលរំលងនាងទៀតនោះទេ ដោយសារតែការផ្ដល់តួនាទីធំឲ្យនាងរ៉ាប់រងនោះគឺសាកសមបំផុតសម្រាប់តារាចម្រៀងដែលមានបទពិសោធន៍យ៉ាងជោគជាំក្នុងអាជីពចម្រៀងរយៈពេលជាង១០ឆ្នាំមកនេះឬអាចនិយាយបានថា ព្រួញ១បាញ់បានសត្វ២ គឺទី១៖ធ្វើឲ្យកម្មវិធីឲ្យកាន់តែមានភាពទាក់ទាញ និងទី២៖ចងជើងនិសា មិនឲ្យចេញពីហង្សមាសផងដែរ។
សុគន្ធ និសា ធ្លាប់ប្រាប់អ្នកយកព័តមានយើងថាការដែលបានគ្មានមុខនៅកម្មវិធីThe Voice Kids Cambodia រដូវកាលទី២នោះគឺមកពីនាងបានសុំថ្នាក់ដឹកនាំឈប់ ព្រោះគ្មានពេលវេលាគ្រប់គ្រាន់មិនមែនគេដកនាងចេញឡើយ។ប៉ុន្ដែនាងទទួលស្គាល់ថានៅពេលគ្មានមុខនាងពីកម្មវិធីនោះគឺពិតជាធ្វើឲ្យប៉ៈពាល់ដល់កេរ្ដិ៍ឈ្មោះរបស់នាងតិចតួចមែនព្រោះថាអ្នកខ្លះអាចនិយាយថាមកពីនាងធ្វើការងារនោះមិនកើតទើបគេលែងឲ្យធ្វើ…។
ទោះជាសុគន្ធ និសា នឹងត្រងយកតំណែងព្រាប សុវត្ថិ ខ្លះៗនាពេលខាងមុខក្ដី តែនាងបានបាត់បង់ដៃគូច្រៀងឆ្លងឆ្លើយជាមួយកំពូលតារាចម្រៀងរូបនេះ ខណៈដែលការចាប់ដៃជាមួយលោកប៊ុនថៃ ប្រហែលជាមិនអាចទៅរួចនោះទេព្រោះនិសា ធ្លាប់ប្រាប់ថាសម្លេងនាងនិងសិរីមន្ដ មិនស៊ីគ្នាឡើយ ។ប៉ុន្ដែរយៈពេលជាង៤ឆ្នាំមកនេះគេឃើញអាជីពចម្រៀងរបស់និសា ហាក់នៅទ្រឹងបន្ដិចពោលគឺមិនសូវមានសន្ទុះដូចមុននោះទេក្រោយពីមានស្វាមីមក។
សុគន្ធ និសា បានរៀបការជាមួយលោកចៅ សម្បត្តិ ជាអាណិជនខ្មែរមកពីរដ្ឋBoston សហរដ្ឋអាមេរិក និងជានាយផ្នែកប្រតិបត្តិរបស់ក្រុមហ៊ុនមែនញូឡាយប្រចាំកម្ពុជាតែចំណងស្នេហារយៈពេលជាង៤ឆ្នាំមកនេះនាងនិងមិនទាន់ពពោះឡើយ ក្រោយពីអាកខានយកកូនទី២ដោយសារតែនាងបានកើតកូវីដកាលពីដើមខែមីនាឆ្នាំ២០២១ ។និសា ធ្លាប់អះអាងថាមូលហេតុដែលនាងអត់កូននៅពេលនេះព្រោះតែនាងនិងស្វាមីបានពិភាក្សារគ្នាថាចង់បានកូនតាមគម្រោង ហេតុនេះហើយនៅពេលដែលពេលវេលាមកដល់នឹងមានកូនដូចគេដែរហើយ៕