សមាគមបាល់ទាត់ប៉ូឡូញកាលពីថ្ងៃអង្គារបានស្វែងរកភាពច្បាស់លាស់ពីស្ថាប័នគ្រប់គ្រងបាល់ទាត់ពិភពលោក FIFA លើការប្រកួតជម្រុះបាល់ទាត់ពិភពលោកប៉ះជាមួយក្រុមជម្រើសជាតិរុស្ស៊ីនៅទីក្រុងមូស្គូខែក្រោយបន្ទាប់ពីរុស្ស៊ីបានបញ្ជាឱ្យកងទ័ពចូលទៅក្នុងតំបន់ផ្តាច់ខ្លួនអ៊ុយក្រែន។ប្រធានាធិបតីរុស្ស៊ីលោក វ្ល៉ាឌីមៀ ពូទីន បានផ្តល់ការទទួលស្គាល់ជាផ្លូវការដល់តំបន់បំបែកខ្លួនពីរនៅភាគខាងកើតអ៊ុយក្រែនកាលពីថ្ងៃចន្ទ ដែលបង្កឱ្យមានការថ្កោលទោសពីលោកខាងលិច និងជំរុញឱ្យមានការភ័យខ្លាចចំពោះការប្រឈមមុខដាក់គ្នាផ្នែកយោធានៅក្នុងតំបន់។
នៅក្នុងសេចក្តីថ្លែងការណ៍មួយថា សហព័ន្ធប៉ូឡូញ FA បានស្នើសុំឱ្យFIFAបំភ្លឺជាបន្ទាន់នូវបញ្ហាដែលទាក់ទងនឹងការរៀបចំការប្រកួត។ការប្រកួតជម្រុះរវាងរុស្សី និងប៉ូឡូញដើម្បីទទួលបានកៅអីមួយក្នុងព្រឹត្តិការណ៍បាល់ទាត់ពិភពលោក ឆ្នាំនេះនៅប្រទេសកាតាគ្រោងធ្វើនៅថ្ងៃទី ២៤ ខែមីនា។
ការលើកឡើងរបស់សមាគមបាល់ទាត់ប៉ូឡូញ ស្របពេលមានការសង្ស័យថាវិស័យបាល់ទាត់របស់ប្រទេសរុស្ស៊ីអាចនឹងជាប់ទណ្ឌកម្មពិភពលោក។វាបានបន្ថែមថា បញ្ហានេះក៏មានការព្រួយបារម្ភផងដែរចំពោះស៊ុយអែត និងសាធារណរដ្ឋឆេក ដែលអាចប្រឈមមុខនឹងរុស្ស៊ីក្នុងទីក្រុងម៉ូស្គូក្នុងវគ្គផ្ដាច់ព្រ័ត្រវគ្គ Playoff៕
