ភ្នំពេញ៖ឱក សុគន្ធកញ្ញា ធ្លាប់ក្ដាប់តំណែងជាតារាស្រីឈានមុខគេរយៈពេលជិត១០ឆ្នាំនៅហង្សមាសមុនពេលដែលនាងមានប្ដីនិងកូន ខណៈដែលនៅឆ្នាំ២០១៩-២០២១ នាងត្រូវបានគេមើលឃើញថាមិនសូវមានសន្ទុះខ្លាំងក្លាដូចកាលនៅលីវឡើយ ព្រោះមិនទាន់មានបទចម្រៀងផ្ទុះដូចមុនស្របពេលដែលរូបរាងនាងក៍មានការប្រែប្រួលខ្លះៗដូចជាឡើងគីឡូជាងមុនបន្ដិចឬអ្នកខ្លះហៅថាបែកសាច់។សុគន្ធកញ្ញា បានបន្ធូរដៃអស់ជាង២ឆ្នាំក្នុងអាជីពចម្រៀងព្រោះតែកូវីដ ទើបធ្វើឲ្យនាងមិនអាចបញ្ចេញសម្ថភាពពេញទំហ៊ឹងដូចមុននោះទេ ប៉ុន្ដែសម្រាប់ឆ្នាំ២០២២ នេះតារាកូន១បានពង្រឹងទីផ្សារចម្រៀងឡើងវិញទាំងការចេញបទថ្មីៗដូចជាចាប់ដៃជាមួយសុខ ស្រីនាង ចេញចម្រៀងជាខ្សែរឿង”ស្នេហាខ្ញុំ ផ្លូវ២” ហើយនៅថ្ងៃចូលឆ្នាំខ្មែរ៣ថ្ងៃនាងចេញច្រៀងសម្ដែងជាប់ៗគ្នាតែម្ដង។ទោះជាយ៉ាងណាតាមការសង្កេតជាក់ស្ដែងសម្រាប់ទីផ្សារចម្រៀងសុគន្ធកញ្ញា នៅឆ្នាំ២០២២ នេះគឺនៅតែមិនទាន់កក្រើក និងខ្លាំងក្លាដូចកាលនៅលីវឡើយ ស្របពេលដែលបច្ចុប្បន្នតារាថ្មីៗរះកាន់តែច្រើនទើបធ្វើឲ្យចំនួនអ្នកគាំទ្រមានការបែកខ្ញែកជាហេតុធ្វើឲ្យមានភាពស្រពិចស្រពិលនៅឡើយចំពោះថាតើសុគន្ធកញ្ញា នឹងរក្សារតំណែងជាតារាស្រីឈានមុខគេនៅហង្សមាសបានទៀតឬអត់នោះ?ប៉ុន្ដែអ្នកជំនាញសិល្បៈនៅតែអះអាងថាទោះជាក្នុងករណីបែបណាក៍ដោយក៍ដាច់ខាតថៅកែហង្សមាសនឹងមិនធ្វើឲ្យសុគន្ធកញ្ញា ធ្លាក់ចុះជាដាច់ខាត។
ក្រៅពីវាយលុកទីផ្សារចម្រៀងជាថ្មីម្ដងទៀតនោះឱក សុគន្ធកញ្ញា ក៍ឡើងទៅអង្គុយកៅអីជាគណៈកម្មារការCambodian Idol រដូវកាលទី៤ ផងដែរដែលនេះជាការបង្ហាញថាទោះជាបទចម្រៀងនាងមិនសូវចេញបុកនិងផ្ទុះកក្រើកដូចមុនក្ដី ប៉ុន្ដែនាងនៅតែអាចធ្វើឲ្យទីផ្សារលេចធ្លោតាមរយៈការងារសិល្បៈផ្សេងទៀតក្រៅពីច្រៀង។អ្វីដែលគូរឲ្យកត់សម្គាល់នោះសុគន្ធកញ្ញា ក៍ត្រៀមថតសម្ដែងភាពយន្ដជាមួយលោកឧកញ៉ាខែម ប៊ុនថៃ នាពេលខាងមុខនេះផងដែរ។ដោយឡែកអ្នកនៅក្នុងរង្វង់សិល្បៈមើលឃើញថាសុគន្ធកញ្ញា នៅតែអាចចាប់ទីផ្សារConcerts ធំៗបានដូចមុនដដែលព្រោះថាបណ្ដារការប្រគុំតន្រ្ដីទាំងឡាយរបស់ហង្សមាសនោះគឺស្វាមីនាងលោកអ៊ឹង សុខលី ជាអ្នកគ្រប់គ្រងនិងដឹកនាំបញ្ជារស្ទើតែទាំងស្រុងនៅហង្សមាស ហេតុនេះហើយគ្មានហេតុផលណាមួយដែលថាលោកសុខលី ត្រូវមើលរំលងឬមិនដាក់ឧត្តមភរិយារបស់លោកចូលទៅកម្មវិធីសំខាន់ៗនោះទេ។
តាមរយៈការចេញអុកឡុកអាជីពចម្រៀងសារជាថ្មីក្រោយមានស្វាមីនិងកូន១នេះគេអាចសន្និដ្ឋានបានថានៅឆ្នាំ២០២២ នេះឱក សុគន្ធកញ្ញា នឹងធ្វើឲ្យទីផ្សារចម្រៀងនាងលេចធ្លោជាង២ឆ្នាំមុននេះបន្ដិចជាមិនខានព្រោះថាក្រៅពីប្រើទេពកោសល្យចាស់របស់ខ្លួនជានាថការីរបាំបុរាណម្នាក់នៅលើបទចម្រៀងថ្មីៗនោះនាងក៍ចាប់ផ្ដើមពង្រឹងMV រួមទាំងការត្រៀមខ្លួនធ្វើជាCoach កម្មវិធីវិធីThe Voice Cambodia រដូវកាលទី៤នាពេលខាងមុខនេះផងដែរ។ប៉ុន្ដែរឿងសំខាន់ដែលសុគន្ធកញ្ញា អាចធ្វើឲ្យនាងមានការប្រែប្រួលទីផ្សារសិល្បៈសារជាថ្មីនោះគឺការសម្រកគីឡូឲ្យវិលទៅដូចដើមវិញទើបអាចទៅរួច ប្រសិនបើនៅតែកាម៉ាប់ៗបន្ដិចបែបនេះទៀតនោះសុគន្ធកញ្ញា ប្រាកដជាពិបាកទប់ទល់តារាថ្មីៗដូចជានាងតន់ ច័ន្ទសីម៉ា និងរ៉េត ស៊ូហ្សាណា ជាដើមមិនខានព្រោះ”រលកក្រោយ ច្រានរលកមុន”។អ្វីដែលមហាជនចាប់អារម្មណ៍នោះគេគេចង់ឃើញសុគន្ធកញ្ញា ចាប់ដៃជាមួយលោកឧកញ៉ាកូន៣ខែម ប៊ុនថៃ ថតភាពយន្ដជាលើកដំបូងឲ្យចេញជារូបរាងដែលពេលនោះប្រាកដជានាងល្បីថែមមួយក្រឺតទៀតជាមិនខាន។
ថ្វីត្បិតតែឱក សុគន្ធកញ្ញា នៅតែមិនទាន់ច្បាស់លាស់ពីការក្សារតំណែងជើងខ្លាំងនៅហង្សមាសតទៅទៀតបាន១០០%មែន ប៉ុន្ដែតារាកូន១ពេលនេះរស់នៅជាមួយជីវិតយ៉ាងស៊ីវីល័យដោយមានផ្ទះវីឡារ និងជិះរថយន្តទំនើបៗដូចជាRange Rover និងAudi ជាដើម។រឿងដែលសុគន្ធកញ្ញា កាន់តែមានភាពកក់ក្ដៅថែមទៀតនោះគឺក្រោយមានកូន១នេះ ស្វាមីនាងលោកអ៊ឹង សុខលី ដែលធ្លាប់មានសង្សារច្រើននាក់មុនរៀបការនោះបែជារឹតតែស្រលាញ់និងថ្នាក់ថ្នមនាងលើសដើម ទើបលេចឭថាសុគន្ធកញ្ញា ត្រៀមយកកូនថែមម្នាក់ទៀតដើម្បីឲ្យស្នេហាកាន់តែរឹងមាំជាងនេះ៕