ខេត្តពោធិ៍សាត់ ៖ នារីវ័យក្មេងម្នាក់ ត្រូវម្តាយទុកឱ្យនៅចាំផ្ទះ មើលថែប្អូន២នាក់ ខណៈឪពុកម្តាយរវល់ចេញទៅធ្វើចម្ការ លុះពេលកំពុងឈរលាងចាននៅខាងក្រាយផ្ទះ ស្រាប់តែលេចមុខប្រុសល្មោភកាមម្នាក់ ចូលមកចាប់ដៃ ឱបថើប សើយសំពត់ ប្រុងរំលោភទាំងកំរោល តែត្រូវនារីរងគ្រោះស្រែកឆោឡោ និងប្រឹងរើបម្រះ ទើបធ្វើឱ្យជនល្មោភកាមធ្វើអីមិនកើត ក៏ដើរចេញបាត់ទៅ លុះម្តាយឪពុកត្រឡប់មកផ្ទះវិញ កូនក្រមុំក៏ទម្លាយរឿងប្រាប់ រួចដាក់ពាក្យបណ្តឹងឱ្យសមត្ថកិច្ចចាប់អូសកជនសង្ស័យ នាំយកទៅចាត់ការតាមច្បាប់។
ករណីប៉ុនប៉ងរំលោភសេពសន្ថវៈនេះ បានកើតឡើង កាលពីវេលាម៉ោង ១០ព្រឹក ថ្ងៃទី០៨ ខែសីហា ឆ្នាំ២០២២ នៅចំណុច រោងបាយខាងក្រោយផ្ទះនារីរងគ្រោះ ស្ថិតក្នុងភូមិជង្រុក ឃុំផ្ទះរុង ស្រុកតាលោសែនជ័យ។ រហូតដល់វេលាម៉ោង ១២និង២០នាទី ថ្ងៃត្រង់ ថ្ងៃដដែល ក្រោយពីទទួលបានពាក្យបណ្តឹងពីក្រុមគ្រួសារនារីរងគ្រោះ សមត្ថកិច្ចបានចុះស្រាវជ្រាវ ចាប់ខ្លួនជនសង្ស័យបាន ខណៈដែលជននេះ កំពុងសម្ងំប្រើប្រាស់ថ្នាំញៀន នៅផ្ទះអ្នកភូមិម្នាក់។
ជនសង្ស័យល្មោភកាមដែលប៉ុនប៉ងរំលោភកូនក្រមុំគេ និងត្រូវបានសមត្ថកិច្ចចាប់ឃាត់ខ្លួន មានឈ្មោះយួន ឌីណា ភេទប្រុស អាយុ២៨ឆ្នាំ មុខរបរមិនពិតប្រាកដ និងជាមុខសញ្ញាប្រើប្រាស់ថ្នាំញៀន មានលំនៅក្នុងភូមិជង្រុក ឃុំផ្ទះរុង ស្រុកតាលោសែនជ័យ។
លោកវរសេនីយ៍ឯក អ៊ុល ហៃ អធិការនគរបាលស្រុកតាលោសែនជ័យ បានឱ្យដឹងកាលពីថ្ងៃទី០៩ ខែសីហា ឆ្នាំ២០២២ ថា នៅមុនឈានដល់ការឃាត់ខ្លួនជនសង្ស័យឈ្មោះយួន ឌីណា ខាងលើនេះ សមត្ថកិច្ចបានទទួលពាក្យបណ្តឹងពីស្ត្រីជាម្តាយរបស់នារីរងគ្រោះ ដោយបានប្តឹង ចោទប្រកាន់ទៅជនសង្ស័យឈ្មោះយួន ឌីណា ថា បានប៉ុនប៉ងចាប់រំលោភកូនស្រីរបស់គាត់ ខណៈដែលពួកគាត់ជាឪពុកម្តាយ មិននៅផ្ទះ។
យោងតាមពាក្យបណ្តឹងរបស់ម្តាយនារីរងគ្រោះ បានរៀបរាប់ថា មុនពេលកើតហេតុ កាលពីវេលាម៉ោងជាង១០ព្រឹក ថ្ងៃទី០៨ ខែសីហា ឆ្នាំ២០២២ កូនស្រីរបស់គាត់ បាននៅផ្ទះ ៣នាក់បងប្អូន ខណៈពេលដែលពួកគាត់ជាឪពុកម្តាយ ចេញទៅធ្វើការនៅឯចម្ការ។ ស្រាប់តែក្រោយមក ខណៈដែលកូនស្រីរបស់គាត់កំពុងឈរលាងចាននៅរោងបាយ ខាងក្រោយផ្ទះ ក៏លេចមុខជនសង្ស័យឈ្មោះយួន ឌីណា បានមកដល់ រួចដើរចូលមកចាប់ដៃកូនស្រីគាត់ បន្ទាប់មកក៏ធ្វើសកម្មភាពបៀតបៀន និងប៉ុនប៉ងរំលោភសេពសន្ថវ: ប៉ុន្តែពេលនោះ កូនស្រីរបស់គាត់បានស្រែក និងរើបម្រះជាច្រើនដង ទើបឈ្មោះ យួន ឌីណា បានព្រមលែង ហើយបានដើរចេញទៅបាត់។
ក្រោយមក នៅពេលដែលពួកគាត់ជាឪពុកម្តាយ ត្រឡប់មកពីចម្ការវិញ កូនស្រីក៏បានរៀបរាប់រឿងរ៉ាវប្រាប់ពួកគាត់ ទើបពួកគាត់ប្រញាប់នាំកូនស្រី ទៅដាក់ពាក្យបណ្តឹងឱ្យសមត្ថកិច្ចជួយអន្តរាគមន៍តែម្តង។
បន្ទាប់ពីទទួលបានពាក្យបណ្តឹងខាងលើ សមត្ថកិច្ចនគបាលមូលដ្ឋាន បានចុះធ្វើការស្រាវជ្រាវរហូតឈានដល់ការ ឃាត់ខ្លួនជនសង្ស័យបាន ខណៈដែលជនសង្ស័យ និងបក្ខពួក កំពុងសម្ងំប្រើប្រាស់គ្រឿងញៀន នៅចំណុចផ្ទះឈ្មោះម៉ុន មឿន។
ជនសង្ស័យ ត្រូវបានសមត្ថកិច្ចស្រុកតាលោសែនជ័យ ឃាត់ខ្លួនមកសាកសួរ និងកសាងសំណុំរឿង បញ្ជូនទៅស្នងការដ្ឋាននគបាលខេត្ត ដើម្បីចាត់ការបន្តតាមនីតិវិធី៕