ខេត្តកោះកុង ៖ កម្លាំងអធិការដ្ឋាននគរបាលក្រុងខេមរភូមិន្ទ នៃស្នងការដ្ឋាននគរបាលខេត្តកោះកុង កាលពីវេលាម៉ោង ១២និង៤៥នាទី រំលងអធ្រាត្រ ឈាចូលថ្ងៃទី០៣ ខែវិច្ឆិកា ឆ្នាំ២០២២ បានធ្វើការឃាត់ខ្លួនក្មេងទំនើង៣នាក់ ជិះម៉ូតូមានអាវុធក្នុងដៃ និងលាក់អាវុធនៅតាមខ្លួន ខណៈពេលដែលកងកម្លាំងកំពុងចេញល្បាតក្នុងភូមិសាស្ត្រ ស្ថិតនៅចំណុចភូមិ៣ សង្កាត់ស្មាច់មានជ័យ ក្រុងខេមរភូមិន្ទ។
យោងតាមរបាយការណ៍របស់អធិការដ្ឋាននគរបាលក្រុងខេមរភូមិន្ទ បានឱ្យដឹងថា ជនសង្ស័យទាំង៣នាក់ ដែលត្រូវបានសមត្ថកិច្ចឃាត់ខ្លួន រួមមាន ៖ ទី១-ឈ្មោះណាត់ សុខណា ហៅក្តាន់ ភេទប្រុស អាយុ២០ឆ្នាំ មុខរបរកម្មករនេសាទ រស់នៅភូមិ៣ ឃុំប៉ាកខ្លង ស្រុកមណ្ឌលសីមា (អ្នកកាន់អាវុធមុខស្រួច)។ ទី២-ឈ្មោះសួរ គីរីន ភេទប្រុស អាយុ១៦ឆ្នាំ មុខរបរនៅផ្ទះ រស់នៅភូមិ២ ឃុំប៉ាកខ្លង ស្រុកមណ្ឌលសីមា (មានកាំបិតប៉័ងតោជាប់ខ្លួន) និងទី៣-ឈ្មោះពាន សុភ័ក្រ ភេទប្រុស អាយុ១៧ឆ្នាំ មុខរបរកម្មករសំណង់ រស់នៅភូមិ២ ឃុំប៉ាកខ្លង ស្រុកមណ្ឌលសីមា។
ប្រភពដដែល បន្តថា មុនពេលឃាត់ខ្លួនក្រុមអ្នកលេងកាំបិតហោះខាងលើនេះ កម្លាំងជំនាញបានជិះល្បាតក្នុងភូមិសាស្ត្រ ដើម្បីទប់ស្កាត់បទល្មើសផ្សេងៗដែលអាចកើតមានឡើងជាយថាហេតុ។ លុះមកដល់ចំណុចខាងលើ ប្រទះឃើញជនសង្ស័យមានកាន់អាវុធក្នុងដៃ ក៏ចាប់ឃាត់ខ្លួន និងដកហូតវត្ថុតាង រួមមាន ៖ ម៉ូតូ ១គ្រឿង កាំបិតប៉័ងតោ១ និងកូនកាំបិតចុងស្រួច១។
ជនសង្ស័យទាំង៣នាក់ រួមនិងវត្ថុតាង ត្រូវបនាកម្លាំងជំនាញកសាងសំណុំរឿង បញ្ជូនទៅចាត់ការបន្តតាមនីតិវិធី៕